VOV4.Jarai - Hăng tơlơi kiăng djru ba mơnuih ƀon sang ƀơi anih dŏ pơčlah plai ƀiă tơnap tap, neh met wa ƀơi tơring Dăk Nông hơmâo pơhrui pơƀut hơdôm rơtuh tơn añăm pơtăm djŏp mơta mơ-it kơ ƀon prong Hồ Chí Minh hăng hơdôm boh tơring čar kual Dơnung gum djru bruă pơgang klin Covid-19.

Ayong K’Tư, dŏ pơ kual ataih Bon Sê Rê A, să Dăk Som, tơring glông Dăk Glong tơring čar Dăk Nông ƀu kơnong djru abih pơtơi hơmâo mơng sang anŏ ñu đôč ôh mơ̆, ñu hyu ĕp lu añăm amăng glai jơman jơman brơi kơ neh met wa pơ hơdôm boh tơring čar kual Dơnung glăk hơmâo arăng kŏm đuăi hyu hăng dŏ pơčlah pơgang klin. Ayong K’Tư brơi thâo:

“Kâo bhrơi dua tạ pơtơi hăng djŏp añăm pơtăm kah hăng hơbơi čên, añăm hla biăp. Ƀơi anai hơmâo djuai añăm anun yua hnun sang anŏ kâo nao pĕ pơ glai ba mơ-it kơ mơnuih dŏ pơ ƀon prong. Hrơi blan pơ anăp, sang anŏ kâo ăt djru dong mơn boh ƀơr, rơbung. Ră anai glăk bơyan rơbung čăt, yua anun hơmâo rơbung glai hăng rơbung pla pơ sang, sang anŏ kâo ăt djru brơi dong mơn kơ mơnuih ƀon sang pơ ƀon prong adih”.

Añăm pơtăm, boh troh hơmâo ba mơ-it kơ tơring čar gah dơnung.

Hrup tui anun mơn, ƀơi kual guai lŏn ia plơi Thuận Hải, să Thuận Hạnh, tơring glông Dăk Song, sang anŏ ayong Trịnh Văn Khởi hơmâo djru rơbêh 2 tơn añăm pơtăm kah hăng trong dô, añăm bơi anung, pơtơi kơ neh met wa pơ anih hơmâo klin. Ñu ăt hyu jak iâu neh met wa amăng plơi gum djru, aset tŭ mơn samơ̆ pran jua thâo pap yơh prong, rim čô mơnuih djru brơi aset gơnam đah mơng djru mơnuih ƀon sang pơ anih hơmâo klin plai ƀiă tơnap.

 “Sang anŏ gơmơi hơmâo añăm hla rok, hơbơi, trong dô, rơpuah, plôi, pơtơi, boh ƀơr lĕ gơmơi djru abih laih. Amăng hơdôm hrơi anai lăng klin dŏ kơtang đôč, dua rơkơi bơnai gơmơi pơčrông hyu iâu neh met wa gum ngă tom, djru ba neh met wa pơ anih hơmâo klin. Hrơi anai kâo hăng ƀing adơi ayong hyu iâu arăng djru pơtơi, boh pơneh, añăm súp lơ hơmâo giăm 4 tơn či pioh hăng rơdêh mơmot anai ba nao pơ mơnuih ƀon sang ƀon prong Hồ Chí Minh hăng Bình Dương”.

Ƀơi să Dăk Buk So, tơring glông Tuy Đức, tơring čar Dăk Nông, neh met wa ăt djru ba hơmâo rơbêh 30 tơn añăm pơtăm ba nao pơ mơnuih ƀon sang ƀơi anih hơmâo klin. Ơi Nguyễn Văn Anh, Khua git gai Ping gah, Khua jơnum min mơnuih ƀon sang să Dăk Buk So brơi thâo:

“Ƀơi să anai tơnap tap mơn yua dah dŏ pơ guai lŏn ia ataih yaih. Samơ̆ lơ̆m hơmâo khua mua djŏp anom bruă iâu pơthưr djru ba gơnam tam kơ mơnuih ƀon sang dŏ pơ anih hơmâo klin lĕ gơmơi tŭ ư djru mơtăm yơh. Hơmâo neh meh wa pơgiăng nao hlao añăm, hơbơi, boh troh pơ Jơnum min mơnuih ƀon sang să, hơmâo mơnuih đa lĕ iâu hlăk ai, đah kơmơi, ană plơi mut nao tơl đang pĕ mă, đah mơng djru kơ ƀing tơnap tap”.

Neh met wa ƀơi tơring glông Tuy Đức ba nao añăm pơtăm kơ kual hơmâo klin.

Mah kual Dap Kơdư ƀing ta glăk pơgang klin Covid-19 mơn, samơ̆ hăng pran jua thâo pap nao rai, sa tơlŏ asơi lơ̆m rơmon kar hăng ha anung lơ̆m trơi mơn, mơnuih ƀon sang ƀơi anai amra djru pơpha brơi, amăng sang hơmâo hơget lĕ djru brơi gơnam anun kơ mơnuih ƀon sang pơ ƀon prong Hồ Chí Minh glăk dŏ pơčlah mơnuih mơnam pơgang klin kheng.

Siu H’Mai: Pơblang