VOV4.Jarai - Klin covid-19 bơbeč ƀu ƀiă ôh kơ bruă pơkra gơnam sĭ mơdrô mơng hơdôm anom bơwih ƀong lăi hrŏm hăng anom bơwih ƀong ƀơi Dak lăk lăi hơjăn. Amăng tơlơi tơnap anai, lu anom bơwih ƀong amăng bruă pơkra kopwhê ƀơi Dak lăk pơplih phrâo na nao kiăng dưi bơwih ƀong tui hrơi blan pok glăi tui hơđăp.

Jing anom bơwih ƀong pơkra kơphê hna, kơphê pha phin hăng pha măi...ơi Nguyễn Đình Viên, Khua kông ti TNHH PM Coffee Dak Lăk brơi thâo: Mah klin Covid-19 glăk ngă anih sĭ mơdrô kơphê rơ-et rơ-ot samơ̆ anom bơwih ƀong ăt blơi thim măi mok, pơkra lu gơnam, pơplih phrâo boh thâo mrô kiăng ba gơnam sĭ kơ anih sĭ mơdrô điện tử. him lăng klin kheng amra dưi pơgang mơn amăng hrơi blan pơ anăp, anih sĭ mơdrô amra ngă tui hơđăp, yua hnun kông ti ăt gir pơkra gơnam kiăng arăng blơi gơnam amăng hrơi giăm truh Tê̆t.

“Klin Covid-19 ăt bưp lu tơlơi tơnap mơn, hơdôm anom bruă pơdơi hĭ mơn, ƀu thâo ba hyu gơnam jing gơmơi pơtô ba, djru ba ƀing tuai kiăng plơi, pơđĭ kyar anăn gơnam hmư̆ hing. Hrŏm hrŏm hăng anun lĕ pơđĭ tui anŏ klă, ba sĭ gơnam phrâo ƀơi anih sĭ mơdrô kah hăng kơphê kuor lik, kơphê jơman hmư̆ hing, kơphê djă gru kual Dap Kơdư”.

Kông ti TNHH PM Coffee Dak Lăk blơi thim măi mok pơkra gơnam tơdơi kơ hrơi blan hơmâo klin Covid-19.

Ơi Lê Văn Vương, Khua kông ti TNHH pơkra hăng sĭ mơdrô Vương Thành Công, plơi prong Buôn Ma Thuột brơi thâo, mah bưp lu tơlơi tơnap samơ̆ kông ti ăt mơ-ak mơn kơ tơlơi dưi đĭ kyar anai. Yua hnun, amăng hrơi blan pơdơi hĭ sĭ mơdrô ƀơi anăp yua pơgang klin, kông ti hơmâo pơtrut ngă pơhưč, pơƀuh anăn gơnam, hyu ĕp mơnuih blơi tui glông internet laih anun dưi đĭ kyar glăi tui hơđăp mơng 50 -60% pơhmu hăng hlâo. Ơi Lê Văn Vương ră ruai:

“Amăng hrơi mông klin kơtang lĕ kông ti Vương Thành Công hơmâo hrăm tui bruă bơwih ƀong kiăng rơgao klin lĕ gơmơi kơjăp bruă, dưi đĭ kyar hloh. Tal 2 lĕ gơmơi pơƀuh hyu gơnam tam ƀơi anih sĭ mơdrô điện tử, ăt kah hăng pơƀuh, pơhưč amăng online gơnam tam phrâo kiăng mơnuh blơi yua ƀuh nao”.

Kông ti TNHH pơkra hăng sĭ mơdrô Vương Thành Công pơƀuh gru gơnam phâo hăng mơnuih blơi yua.

Tui hăng Gơnong bruă pơkra gơnam sĭ mơdrô Dak Lăk, tơdơi hrơi dŏ pơčlah mơnuih mơnam kiăng pơgang klin Covid-19, truh mông anai hơdôm anom bơwih ƀong mơng tơring čar ƀơ brư̆ mă bruă glăi tui hơđăp laih. Lu anom bruă pơsit, tơdơi kơ lu blan tơnap tap yua klin Covid-19 ngă, mơnuih blơi gơnam lu glăi laih. Yua hnun anom bơwih ƀong glăk pơkra gơnam sĭ mơdrô kơtang hloh, čơkă mơnuih blơi amra lu amăng hơdôm blan rơnuč thun.

Tui hăng ơi Phạm Minh Tấn, Kơ-iăng khua git gai Ping gah tơring čar Dak Lăk: Klin Covid-19 ba truh lu tơlơi ƀu klă kơ bruă bơwih ƀong mơng anom bơwih ƀong ăt kah hăng mơnuih ƀon sang. Khă hnun, hăng tơlơi gir run mơng Ping gah, mơnuih ƀon sang, truh ră anai glăk dưi pơgang klin laih. Hơdôm hnong pơkă gah bơwih ƀong huă - mơnuih mơnam truh mông anai ăt đĭ mơn pơhmu hăng thun hlâo. Pơđĭ kyar bơwih ƀong mơng tơring čar hơmâo năng ai 5,3%. Prăk pơhrui kơ kơnuk kơna him lăng hơmâo rơbêh 5 rơbâo ha mơkrah klai prăk, đĭ 5,3% pơhmu hăng tơđar thun hlâo. Kiăng dưi ngă truh kih bruă mă thun 2021, hơdôm blan rơnuč thun, djŏp gưl ping gah, khul grup, hơdôm anom bruă, plơi pla amăng tơring čar kiăng kiăo tui tơlơi hơmâo ră anai mơn, hơmâo hơdră ngă bruă, pơphun bơwih ƀong tŭ yua, gir kơtir, pơmut hrŏm bruă pơgang klin hăng pơđĭ kyar bơwih ƀong huă - mơnuih mơnam. Ơi Phạm Minh Tấn, Kơ-iăng git gai Ping gah tơring čar Dak Lăk lăi:

“Klin prong Covid-19 amăng giăm 2 thun anai bơbeč prong biă kơ bruă pơđĭ kyar bơwih ƀong huă - mơnuih mơnam, samơ̆ ƀing ta ăt lêng pioh tơlơi dưi, tơlơi klă hiam mơng mơnuih ƀon sang yơh phun, laih anun lêng ngă tui djơ̆ tơlơi git gai mơng Kơnuk kơna, anun lĕ ngă dua mơta bruă hrŏm hrŏm, ƀrô pơgang klin rah, ƀrô pơđĭ kyar bơwih ƀong huă rah, hăng djŏp tơlơi bơwih ƀong pơkŏn dong. Ƀu dưi ngă amưng, pơ-ai, pơklaih lui ôh, ngă hiư̆m pă kiăng pơƀut ngă hơđong tơlơi hơdip, pơđĭ kyar bơwih ƀong huă - mơnuih mơnam, pơhlôm rơnuk rơnua, akŏ pơdong anom bruă čar kơjăp amăng tơring čar”.

Hơdôm tơlơi gir mơng anom bơwih ƀong ƀơi Dak Lăk (amăng anun hơmâo anom bơwih ƀong pơkra, sĭ kơphê), thâo hơdip hrŏm rơnuk rơnua amăng mông hơmâo klin, amra pơgôp pơđĭ kyar bơwih ƀong huă - mơnuih mơnam ƀơi tơring čar thun 2021. Mơng anun ha wơ̆t dong pơsit tơlơi hmư̆ hing, ba jơlan hlâo amăng bruă ngă kơphê hăng Dak Lăk lăi hơjăn hăng Việt Nam lăi hrŏm.

Hương Lý: Čih - Siu H’Mai: Pơblang