VOV4.Jarai - Mơguah lơ 10/6, Grŭp Phongsubthavy dêh čar Lao hmâo nao pơ̆ Ƀirô anih jưh pơ ala kơ Việt Nam ƀơi dêh čar Lao ƀơk lăi pơhmu nao sa dua mơta gơnam tam gah ia jrao hăng prăk hmâo nua 1 klăk dolar Mi djru Kơnuk kơna hăng mơnuih ƀôn sang Việt Nam, Khua anih jưh pơ ala kơ Việt Nam ƀơi dêh čar Lao Nguyễn Bá Hùng hmâo tŭ mă gơnam hmâo bôh tŭ yua mơng Grŭp Phongsubthavy, yua kơ ơi Phongsavanh Senaphuan - Khua Grŭp ƀơk brơi.

Hmâo lu gơnam mă yua gah ia jrao hmâo nua 500.000 dolar Mi kah hăng 50.000 blah bơnal gôm adung mơbah, 25.000 get čai ia pơdjai kơman, 2000 blah sum ao pơgang, 200 sưng kơ mơnuih ruă... hrom hăng 500.000 dolar Mi prăk djru Keh prăk vaccine yua kơ Khua dêh čar ơi Phạm Minh Chính pơphun. Ơi Nguyễn Bá Hùng lăi lĕ, tơlơi gum djru anai lĕ pơdah lu mơta mơng tơlơi rô nao rai giăng mah prong prin, pran jua gum hrom hơbit pha ra, gum hrom abih bang kơplah wah dua bôh dêh čar Việt Nam – Lao./.

Siu H’ Prăk: Pô pơblang