VOV4.Jarai - Kiăng kơ pơhlôm brơi apui lơtrik yua amăng tal pơplông abih anih 12 thun 2021 pơ anăp anai, anom bruă apui lơtrik Dak Nông hơmâo pơjing akŏ bruă prap lui kiăng kơ pơhlôm hơđong apui lơtrik yua ƀơi hơdôm anih pơphun pơplông. Tal pơplông abih anih 12 thun 2021, tơring čar Dak Nông hơmâo 7.000 čô čơđai čih anăn nao pơplông ƀơi 18 anih pơphun pơplông. Kiăng kơ pơhlôm brơi apui lơtrik yua amăng tal pơplông anai, kông ti apui lơtrik Dak Nông brơi thâo amra ƀu pơkra ming ôh amăng hơdôm hrơi pơphun pơplông.

Hrŏm hăng anun, kông ti git gai djop anom bruă apui lơtrik mă bruă hăng djop sang hră pơphun pơplông hăng hơdôm anih wai lăng tal pơplông anai kiăng kơ gum hrŏm pel ĕp hơdôm anih dưm truă apui lơtrik amăng sang hră kiăng kơ tañ ĕp ƀuh hơmâo anŏ amuñ răm rai kiăng hmao tlôn pơkra ming kiăng pơhlôm hơđong lơ̆m mă yua. Laih dong, ƀơi hơdôm anih pơphun pơplông, gơnong bruă apui lơtrik amra pơkiăo nao mơnuih mă bruă dŏ gak ƀơi hơdôm trạm biến áp, kiăng kơ pơsir hĭ hmao tlôn tơdah ƀuh răm rai, pơhlôm hơđong apui lơtrik yua amăng tal pơplông.

Siu Đoan: Pơblang