VOV4.Jarai -  Lu anom bơwih ƀong wai lăng tuai čuă ngui ƀơi Đà Lạt – Lâm Đồng glăk brôk tơnap yua kơ akă djop tơlơi kiăng pok bah amăng čơkă tuai. Bôh than ba truh lu ñu mơnuih mă bruă amăng gơnong bruă anai leng kơ akă tlâ̆o djop 2 ară vaccine tui tơlơi pơkă.

Mơng hrơi Kơnuk kơna mă yua tơlơi pơtrun pơsit mrô 128 kơ “pơkă jăng jai ngă juăt pơhlôm, pơpih tañ, wai lăng ba glăi bôh tơhnal klin Covid-19”, tơring čar Lâm Đồng pơtrut kơtang bruă hơkrŭ bruă bơwih ƀong huă, sĭ mơdrô amăng tơlơi hơđong phrâo, ơi Lê Hồng Thanh, Khua wai lăng sa anih anom tuai čuă ngui ƀơi plơi prong Đà Lạt mơ-ak biă mă. Yua kơ tơdơi kơ ha mơkrah thun sang jưh tuai krư̆ bah amăng yua kơ klin Covid-19, ră anai hmâo laih tơhnal pioh pok glăi bah amăng. Tui anun mơn, ră anai sang jưh tuai mơng ñu ăt ƀu dưi mă bruă mơn yua kơ ƀing mă bruă ăt akă tlâ̆o djop 2 ară vaccine tui tơlơi pơkă mơn. Ơi Thanh rơngôt lăi:

 “Mơng blan 6/2021 truh ră anai sang jưh tuai jăng jai pơdơi mă bruă, khă hmâo pok bah amăng glăi laih, samơ̆ ƀu hmâo čơkă tuai yua kơ tơhnal pơkă mơ̆ Ding jum ia jrao ba tơbiă lĕ khom tlâ̆o 2 ară vaccine hăng mơnuih mă bruă wai lăng tuai čuă ngui, lom anun sang jưh tuai ƀing gơmơi kơnong kơ dưi tlâ̆o hmâo sa ară đôč. Tui hăng tơlơi pơkă, tơdah tlâ̆o ară tal 2 thơ khom rơngiă 6 rơwang hrơi tơjuh dong, anun lĕ truh rơnuč blan 11 ƀing gơmơi mơng dưi tlâ̆o. Hăng tơdah mă yua tơlơi pơkă hmâo 14 hrơi dong thơ, anun lĕ krah blan 12, djơ̆ hrom hăng abih thun kah mơng cơkă tuai. Anun lĕ tơlơi păp ñai prong kơ gơnong bruă tuai čuă ngui Đà Lạt”.

Plơi prong Đà Lạt, anih hmâo anô̆ gal pơđĭ kyar tuai čuă ngui amăng tơlơi hơđong phrâo

Tui hăng ơi Nguyễn Viết Vân, Khua Gơnong bruă bôh thâo, bơkơjăp drơi jăn hăng tuai čuă ngui tơring čar Lâm Đồng, abih bang anom bruă wai lăng tuai čuă ngui hmâo hơdôm pluh rơbâo čô mơnuih mă bruă, kơnong kơ hơdôm bôh sang jưh tuai, anih anom tuai pơdơi pơdă dô̆ glăi hmâo truh rơbêh kơ 18.500 čô mơnuih mă bruă hmâo tơlơi kiăng tlâ̆o vaccine. Khă tơring čar Lâm Đồng hmâo gir run pơpha đing nao mrô tlâ̆o vaccine kơ gơnong bruă tuai čuă ngui, sa amăng hơdôm gơnong bruă bơwih ƀong ba jơlan hlâo mơng tơring čar, samơ̆ truh kơ ră anai ăt kơnong kơ phrâo tlâ̆o mă 1 ară đô̆c. Yua anun, ră anai ăt akă djop tơlơi kiăng mă bruă mơn, bơwih bruă tuai čuă ngui. Tơlơi anai ƀing gơmơi hmâo rơkâo laih kơ Jơnum min mơnuih ƀôn sang tơring čar Lâm Đồng kiăng ĕp jơlan gah pơsir.

 “Ƀing gơmơi hmâo hyu hơduah ĕp lăng laih akah hăng abih bang hơdôm anih anom dô̆ glăi, kual, anih čuă ngui hăng păp ñai hăng hơdôm anom tuai čuă ngui amăng hơdôm hrơi rơgao. Biă ñu ƀơi Đà Lạt, lom mơ̆ prăk pơhrui glăi mơng bruă tuai čuă hmâo truh kơ 79% samơ̆ hmâo krư̆ bah amăng giăm truh kơ sa thun hăng anai. Hăng bruă tlâ̆o vaccine, ră anai hăng khul mă bruă wai lăng tuai čuă ngui mơng Đà Lạt truh pơ̆ Cát Tiên leng kơ dưi tlâ̆o samơ̆ kơnong kơ sa ară đô̆c. Kâo rơkâo laih hăng Grŭp črâo ba ăt kah hăng Jơnum min mơnuih ƀôn sang tơring čar amra đing nao tlâ̆o tañ hloh kơ gơnong bruă tuai čuă ngui kiăng hmâo djop tơlơi gal, pơtlaih hơdôm tơlơi tơnap, tơlơi gun kơ abih bang hơdôm bôh anom tuai čuă ngui pơ̆ anăp anai".

Samơ̆ kah hăng abih bang anih dô̆ glăi ƀơi Đà Lạt leng kơ akă djop tơlơi pioh pok bah amăng čơkă tuai mơng tơring čar pơkon ôh

Hrom hăng tơlơi gir run pơsir tơlơi tlâ̆o djop 2 ară vaccine, pơhlôm tơlơi kiăng bơwih brơi kơ tuai čuă ngui, gơnong bruă tuai čuă ngui tơring čar Lâm Đồng ăt glăk pơtrut ngă giong mơn Tơhnal pơkă pơhlôm amăng pơgang pơgăn klin pioh kơ bruă tuai čuă ngui mơng tơring čar. Hmâo tui anun, Đà Lạt – Lâm Đồng mơng jing anih anom nao pơhlôm klă mơng tuai čuă ngui amăng tơlơi hơđong phrâo./.

            Quang Sáng: Čih – Siu H’ Prăk: Pơblang