VOV4.Jarai - Kơnuk kơna phrâo mă yua Tơlơi pơtrun pơsit 68 kơ sa dua hơdră bruă djru mơnuih mă bruă hăng mă yua mơnuih mă bruă bưp tơlơi tơnap yua kơ klin Covid-19 hăng nua ñu 62 rơbâo klai prăk. Amăng hơdôm hrơi klin ngă jai hrơi jai kơtang tui, anung prăk djru anai jai dưi čang rơmang lu hloh amra djru anom bơwih ƀong, mơnuih mă bruă yak rơgao tơlơi tơnap. Khă hnun hai, lu mơnuih dô̆ bơngŏt, hăng tơlơi amuñ amĕ hloh, amuñ čơkă mă hloh prăk djru hlâo, anung prăk djru anai dưi pơsir kah hăng tơlơi čang rơmang mơn? Pô mă tơlơi pơhing phrâo Kim Thanh tơña kơ ơi Phạm Quang Tú, Kơ-iăng Khua Khul Oxfam ƀơi Việt Nam jum dar tơlơi anai?

-Ơ ơi, phrâo anai, Kơnuk kơna phrâo mă yua Tơlơi pơtrun pơsit 68 kơ sa dua hơdră bruă djru mơnuih mă bruă hăng mă yua mơnuih mă bruă bưp tơnap yua kơ klin Covid-19 ngă hăng nua ñu 26 rơbâo klai prăk, hmâo 12 bôh yôm hăng khul mơnuih dưi čơkă mă hơdră bruă gum djru. Ih pơsit hiưm hơpă kơ anung prăk djru anai?

Ơi Phạm Quang Tú: “Blung a, Khul Oxfam bơni kơ Việt Nam ngă tui dong anung prăk djru tal 2 hăng hơdôm mơnuih lĕ mơnuih mă bruă hăng anom bơwih ƀong bơbeč yua kơ klin Covid-19. Tơlơi anai pơdah hơdră bruă klă hiam mơng Kơnuk kơna Việt Nam djru dong mơnuih bơbeč djơ̆ yua klin ngă hăng pran jua hmâo ba tơbiă “Ƀu lui lơi hlơi gah tlôn”. Ƀing gơmơi ăt pơsit yôm mơn mơnuih dưi čơkă mă hơdră bruă tal anai dưi pơhư prong hăng biă ñu djă pioh Kơnuk kơna hmâo ba khul mơnuih mă yua hơdơ̆ pô kiăng mut amăng Tơlơi pơtrun pơsit khă tui hră čih pơkra lăi pơthâo blung a mơng Ding jum wai lăng mơnuih mă bruă, tơhan rơka ruă hăng mơnuih mơnam dêh čar ta lĕ mơnuih anai ƀu djơ̆ mơnuih dưi ba mut amăng tơlơi pơkă blung a ôh. Anai lĕ mơnuih rơgao kơ hơduah ĕp lăng hăng kơsem min mơng ƀing gơmơi, anai jing pô hmâo bơbeč truh hăng bưp tơnap lu hloh. Yua anun, bruă Kơnuk kơna hmâo ba khul mơnuih anai mut amăng hră dưi čơkă mă lĕ tơlơi pơsit lăp djơ̆ biă hăng lăp bơni biă”.

Ơi Phạm Quang Tú

-Tui hăng ih, bruă pơsit mơnuih kiăng dưi djru tal 2 khom dưi ngă tui hiưm ñu, kiăng abih bang mơnuih anai hmâo djop tơlơi pơkă leng kơ dưi tŭ mă tañ hloh, amuñ hloh kah hăng bôh yôm Tơlơi pơtrun pơsit hmâo lăi pơthâo?

Ơi Phạm Quang Tú: “Tơlơi pơtrun pơsit 68 hmâo lăi rơđah hơdôm mơnuih laih, khă dô̆ mơn sa dua čô mơnuih dong mơ̆, tui hăng ƀing gơmơi lĕ akă dưi ôh amăng anun hmâo ƀơi Tơlơi pơtrun pơsit anai. Bơhmu tu ñu kah hăng mơnuih ngă đang hmua mơ̆ bơbeč djơ̆ yua kơ klin Covid-19 hmâo tơlơi hơdơ̆ hĭ ƀudah tơlơi guang dar amăng hơdôm kual hmâo klin ngă, gơnam ngă rai mơng gơñu ƀu dưi ba hyu sĭ ƀudah sĭ hăng nua rơgêh hloh ƀơi anih anom sĭ mơdrô ƀudah ƀiă hloh nua prăk gơñu yua ngă rai gơnam tam, anun ăt lĕ mơnuih kiăng gum djru mơn. Khă hnun hai, tui hăng tơlơi pơkă mơng Tơlơi pơtrun pơsit 68, truh kơ ră anai hơdôm mơnuih dưi pơsit hăng phun ñu ngă hiưm hơpă ƀing ta pơsit hơdôm mơnuih hmâo amăng Tơlơi pơtrun pơsit anai. Kâo pơmin hơdôm bôh anom bơwih ƀong bơbeč djơ̆, mơnuih mă bruă hmâo hră pơkôl rơngiă bruă mă ƀudah tơ̆i đưn hĭ bruă mă lĕ, kâo pơmin amuñ pơsit biă, yua kơ anun lĕ khul mơnuih mơ̆ hmâo ngă hră kah hăng anom bơwih ƀong hmâo ngă hră rơkâo bơwih ƀong sĭ mơdrô, dưi pơsit anô̆ răm rai mơng ƀing gơñu. Khă hnun hai, yôm phăn hloh lĕ mơnuih mă bruă tui hluai pô, rơđah rơđông kiăng pơplih lom ruah tui tơlơi pơkă ăt kah hăng lom pơsit khul mơnuih anai. Yua kơ tơlơi găn rơgao mơng anung prăk djru tal sa, lu mơnuih mă bruă tui hluai pô, mơnuih mă bruă ƀu sit nik djơ̆ tui tơlơi pơkă pioh dưi čơkă mă bôh tŭ yua mơng prăk djru anai, khă hnun hai yua kơ hră pơ-ar pơdah tơlơi kiăng mơng pô, mơnuih lăp dưi čơkă mă lĕ pung kơ ƀu dưi čơkă mă”.

-Tui hăng tơlơi pơkă amăng Tơlơi pơtrun pơsit 68, mơnuih mă bruă tui hluai pô amra yua kơ rim anih anom ngă tui ngăn drăp anih anom anun hăng rơnoh djru ƀu ƀiă hloh sa klăk prăk sa čô mơnuih. Tơlơi anai lăp djơ̆ mơn, ơ ơi?

Ơi Phạm Quang Tú: “Gah mrô prăk djru, kâo ƀuh ƀiă biă. Bôh nik, amăng tal djru hlâo, mrô ñu lu hloh, năng ai ñu 1 klăk 500 rơbâo prăk, samơ̆ yua kơ ngă hră pơ-ar glêh tơnap, hrom hăng mrô prăk djru ƀu lu, anun yơh hmâo lu mơnuih mă bruă gơñu ƀu nô̆p hră pơ-ar yua kơ mrô prăk anun ƀu lăp djơ̆ hăng ƀu djop lu pioh djru sang anô̆ gơñu hăng bơhmu hăng prăk yua pioh ngă hră pơ-ar, hră pơ-ar lu rơgao đơi anun gơñu pơsit ƀu nô̆p hră pơ-ar dong tah. Anun lĕ bôh than yua hơget anung prăk djru tal sa kơ mơnuih mă bruă rô hyu, mrô prăk djru hăng pơsir prăk ƀiă biă. Tơdah kơnong kiăng hmâo bơbeč djơ̆ lĕ dưi gum djru thơ amra amuñ amĕ hloh hăng ƀu tơnap ôh. Tui anun, gong gai plơi pla hăng hơdôm ƀirô juăt bruă gơgrong ba bruă ngă tui hơdră bruă anai ăt phing kơ pran hloh mơn lom ngă tui. Kơ yua dah tơlơi găn rơgao brơi ƀuh, lom ngă tui anung prăk djru tal sa, lu mơnuih apăn bruă gong gai plơi pla hăng ƀirô gơgrong bruă anai gơñu bơngŏt biă kơ bruă gơgrong pơsit djơ̆ hă ƀu djơ̆ mơnuih”.

-Mơnuih phrâo dưi ba mut anai ăt hmâo dong mơn hơdôm tơlơi bơngŏt amra hmâo tơlơi mă tŭ bruă anai ngă bruă pơkon, tui hăng ih kiăng hmâo bruă mă hơpă mơn pioh hơdư̆ hĭ tơlơi anai?

Ơi Phạm Quang Tú: “Kiăng plai ƀiă tơlơi anai, tơlơi ba tơbiă blung a lĕ jơlan gah mă bruă pơlir gơnong bruă, mă bruă tui hơdră grŭp hyu mă bruă kah hăng Jơnum min mơnuih ƀôn sang să, phường, khul grŭp, jơnum min djop djuai ania mơnuih mơnam, grŭp mơnuih ƀôn sang. Anun lĕ khom mă bruă hrom, lăng nao rai tơlơi pơhing hăng pơsit tơlơi pơhing kơplah wah hơdôm ƀirô hmâo bơdjơ̆ nao gơgrong ba phara. Tui anun ƀơi yak blung a ñu amra plai ƀiă tơlơi ƀu phă mă yua tơlơi anai kiăng ngă bruă pơkon kơ pô ƀudah kơ khul hơpă thơ. Yua kơ lom pô jao kơ hlơi ƀudah kơ khul hơpă, tơdah ƀu hmâo tơlơi pel ĕp, gum hrom lăng tui mơng grŭp pơkon hă, amra ƀu ba glăi bôh tơhnal ôh hăng amra hmâo tơlơi mă tŭ bruă anai ngă tơlơi pơkon prong biă. Hăng mơnuih mă bruă hyu rô, kiăng pel ĕp plah nao rai tơlơi pơhing kơplah wah mơnuih ƀơi anih anom hmâo mơnuih mă bruă đuăi hyu hăng anih anom hmâo mơnuih mă bruă nao, hăng hơdră anun amra hmâo tơlơi pơhing ƀing ta sa wot dong dưi pel ĕp pơhmu nao rai, amra djơ̆ hrom hăng tŭ mă yua kơ pô tal dua dưi pơhrŏ trun. Tơlơi yôm phăn dong lĕ Ding jum wai lăng mơnuih mă bruă, tơhan rơka ruă hăng mơnuih mơnam dêh čar khom čih pioh mrô pơdah tui tlôn, yap tui hrơi pơkă sit, anun lĕ lom hmâo mơnuih mă bruă hơpă ngă hră čơkă mă prăk djru mơng anung prăk anai, lom anun tơlơi pơhing lăi nao kơ pô anun amra pơdah ƀơi tivi. Tui anun, ƀing ta amra dưi thâo rơđah tong ƀing či la mă tơlơi anai hưp kơ pô”.

-Hai! Rơkâo bơni kơ ih hŏ!

Siu H’ Prăk: Pô pơblang