VOV4.Jarai - Tlam lơ 28/9, Kơ-iăng khua dêh čar ơi Vũ Đức Đam, Grup mă bruă yôm phara mơng Kơnuk kơna amăng bruă pơhlôm, pơgang klin Covid-19 jơnum mơng ataih hăng 19 boh tơring čar ƀon prong gah kual Dơnung hăng sa, dua boh tơring čar ƀơi Dap Kơdư, Dơnung Tŏng krah kơ bruă ngă hrŏm kơjăp krăp lăng klin duam ruă. Ƀơi mông jơnum, pơ ala kơ ƀon prong Hồ Chí Minh hăng hơdôm boh tơring čar Bình Dương, Đồng Nai, Long An čang rơmang dưi čơkă ƀing kông ñơn mơng hơdôm boh tơring čar pơkŏn pơwơ̆t glăi ngă bruă; laih dong rơkâo mơnuih mă bruă pơ hơdôm boh tơring čar anai dŏ glăi dong.

Kơ-iăng khua dêh čar ơi Vũ Đức Đam hăng ƀing khua jơnum hăng 19 boh tơring čar ƀon prong gah Dơnung.

Hơdôm boh tơring čar anai ƀuăn djru ba, tlâ̆o brơi vaccine kơ neh met wa laih anun tañ hơkrŭ glăi tơlơi bơwih ƀong, djru ĕp brơi bruă mă. Khua mua hơdôm boh tơring čar dŏ glăi lăi amra ngă hrŏm hăng ƀon prong Hồ Chí Minh, Bình Dương, Đồng Nai, Long An amăng bruă pơgang klin. Tui hăng pô pơ aka kơ Ding jum ia jrao, mah ƀon prong Hồ Chí Minh, tơring čar Đồng Nai, Long An, Bình Dương hơmâo mrô tlâ̆o vaccine arăt blung a lu laih, samơ̆ mơnuih hơmâo tlâ̆o ăt ƀă klin mơn, ƀă kơ pô pơkŏn. Yua hnun, bruă nao rai mơng mơnuih ƀon sang ƀơi ƀon prong Hồ Chí Minh, Bình Dương, Đồng Nai, Long An glăi pơ hơdôm boh tơring čar pơkŏn ăt khŏm kiăng krăp lăng, brơi pơčlah tui tơlơi pơtrun mơn.

Siu H’Mai: Pơblang