VOV4.Jarai-Kiăng kah pơpha čô ƀiă hăng mơnuih ƀôn sang tơnap tap bơbeč yua mơ̆ng klin Covid 1 ngă, Khul mơnuih ngă bruă sĭ mơdrô pô thun hlăk mơdrah tơring čar Dak Nông pơphun ngă ATM braih djru soh sel kơ mơnuih tơnap tap hơdôm hơpluh tơn. Lu ATM anai hơmâo pok ƀơi hơdôm tơring glông, plơi pla bơbeč djơ̆ kli Cơvid 19.

Phrâo nao tŭ mă braih 3 kg mơ̆ng ATM braih djru soh sel, yă Trần Thị An, dŏ pơ phường Nghĩa Tân, plơi prong Gia Nghĩa, Dak Nông brơi thâo, plơi pla phun ñu pơ Cần Thơ. Sang anŏ tơnap biă mă ră anai, plơi pla pơ Cần Thơ hai hlăk bơbeč yua klin kheng ngă mơ̆n, anun ƀu hơmâo tơlơi djru ba. Hrơi anai, hmư̆ lăi nao tŭ mă braih djru soh sel anun nao tŭ mă.

“Kâo mơ̆ng plơi pla ataih rai pơ anai apah sang dŏ, hyu mă bruă duñ djah ñôm, kơsu, samơ̆ hơdôm hrơi hăng anai klin hơđuh rai anun ƀu thâo hyu mă bruă duñ djah. Yua hơmâo ƀing met anun djru braih anai hơmâo mơnong ƀong huă rơgao hrơi, kâo bơni lu biă mă”.

ATM mă braih 0 prăk yua Khul mơnuih ngă bruă sĭ mơdrô pô hlăk dŏ mơdrah ƀơi tơring čar Dak Nông

pơphun djru mơnuih tơnap tap

Kah hăng anun mơ̆n, amai H’Ñung dŏ pơ ƀôn Dak Nur, phường Nghĩa Đức, plơi prong Gia Nghĩa brơi thâo, sang anŏ gơñu hơmâo 8 čô mơnuih. Yua klin kheng kơtang anun yơh ƀu thâo đuăi hyu tơpư̆ ƀong. Hrom hăng anun, ngă hmua pla boh troh, boh ƀơr, boh sầu riêng ăt ƀu hơmâo nua ôh, tơlơi hơdip glăk tơnap tap biă mă. Yua kơ anun, mah tŭ mă 3 kg braih arăng djru mơ̆ng ATM 0 prăk, ngă kơ gơñu pơđao pran jua biă mă:

“Sang anŏ gơmơi kơnong ngă hmua anun yơh boh troh đang hmua ƀu hơmâo nua lĕ tơlơi hơdip mơda bưp lu tơlơi tơnap tap biă mă. Yua hơmâo ping gah, kơnuk kơna, djop anom bruă khul grup mơnuih mơnam pok pơhai ATM braih 0 prăk djru ba gơmơi hơdôm hrơi hơmâo asơi huă; plai ƀiă mơ̆n tơnap tap ƀu hơmâo braih huă, gơmơi ană plơi pla ƀuh tơlơi anun kơnuk kơna djru gơmơi mơak biă mă”.

Djop mơnuih ăt ngă tui djơ̆ hơdră pơhlôm, pơgang klin Covid 19 sit nao tŭ mă braih

Hăng hơdră hlơi hơmâo raih brơi, hlơi kơƀah rai mă braih ATM 0 prăk yua Khul ƀing ngă bruă sĭ mơdrô pô thun hlăk mơdrah tơring čar Dak Nông pơphun, tơdơi kơ 4 hrơi hơmâo ƀơk laih 6 tơn braih kơ 2000 wơ̆t mơnuih tơnap tap nao tŭ mă braih ƀơi Gia Nghĩa. Tui hăng ayong Nguyễn Ngọc Chính, Khua khul sĭ mơdrô pô hlăk mơdrah tơring čar Dak Nông lăi, rơngiao kơ ƀơk braih ƀơi Gia Nghĩa, ATP braih 0 prăk ăt pơphun hyu pơpha braih kơ mơnuih ƀôn sang tơnap tap pơ hơdôm tơring glông Dak Rlâp, Dak Glong, Tuy Đức:

“Khul hơmâo jak iâu djru 30 tơn braih hăng rơnoh prăk 450 klăk pioh ƀơk kơ mơnuih ƀôn sang pơ 4 anih, kiăng mơnuih tơnap tap găn rơgao tơlơi tơnap amăng bơyan klin kheng. Rơngiao kơ 30 tơn braih him lăng amra rơbêh hăng anŏ pơkă blung a, gơmơi jak iâu djru dơ̆ng 30 tơn jing abih bang 60 tơn pioh hyu ƀơk kơ mơnuih ƀôn sang pơ lu anih anom plơi pla”.

Nay Jek: Pơblang