VOV4.Jarai-Tlam lơ 6/10/2021, ƀơi sang bruă ĕp kman duăm ruă dêh čar, yă Robyn Modie, Khua anih jưh pơ ala dêh čar Australia ƀơi Việt Nam hơmâo jao brơi kơ Kơ-iăng Khua ding jum ia jrao ơi Trương Quốc Cường 300 rơbâo liêu vaccine AstraZeneca pơkra ming ƀơi dêh čar Australia hrom hăng lu mơta gơnam yua gah ia jrao.

Truh ră anai, Australia hơmâo jao kơ Việt Nam rơbêh 700 rơbâo liêu vaccine amăng mrô 1 klăk 500 rơbâo liêu vaccine gah dêh čar Australia ƀuăn djru. Australia ăt pôr amra djru dơ̆ng kơ Việt Nam 3 klăk 700 rơbâo liêu vaccine pơ anăp anai, kơnang kơ tơlơi bơ tŭ ư hăng UNICEF hăng Ding jum ia jrao Việt Nam, pơđĭ tui mrô vaccine Australia djru kơ Việt Nam truh 5 klăk 200 rơbâo liêu, rơnoh prăk dưm dưm hăng 60 klăk dolar Australia.

Gah dêh čar Australia ăt hlăk ngă hrom hăng Unicef kiăng djru ba gơnam pioh yua, djă pioh răk lui vaccine brơi klă, pơtô hrăm mơnuih mă bruă gah ia jrao laih anun pok pơhai tlâ̆o ia jrao vaccine pơ kual plơi pla ataih ƀơi Việt Nam. Hrơi anun mơ̆n, Khua dêh čar ơi Phạm Minh Chính hơmâo hră mơ-it bơni kơ Khua dêh čar Australia ơi Scott Morrison kơ tơlơi djru gum yôm phăn anai.

Nay Jek: Pơblang