VOV4.Jarai-Sang hră đôm lăm kơnuk kơna čem rông ba čơđai sang hră djuai ania ƀiă gưl dua Krong ƀơi kual tơnap tap să Krong, tơring glông Kƀang, tơring čar Gia Lai. Hrom hăng anun bruă pơtô hrăm, ƀing nai pơtô dŏ hơmâo tơlơi khăp prong mơ̆ng gơñu hyu jak iâu pơtrut čơđai sang hră djuai ƀiă nao hrăm hră.

Mơguah sing bring hrơi sa akŏ rơwang hrơi tơjuh, ƀing nai neh pơ sang hră đôm lăm kơnuk kơna čem rông ba čơđai sang hră djuai ƀiă Krong, tơgŭ mơ̆ng pit, buh ao pơđao, buh ao hơjan hyu pơ djop plơi, gơñu truh pơ plơi Tung Gut, ataih 10 km mơ̆ng sang hră, ĕp čơđai sang hră. Truh pơ akŏ plơi, ayong Đinh Uyt, Khua plơi Tung Gut dŏ tơguan laih pơ anun, hrom hăng ƀing nai pơtô hrăm hră, pơpha dua klâo grup, nao tơl sang jak iâu pơtrut čơđai sang hră glăi hrăm hră.

Giăm 7 mông mơguah, hơmâo 6 čô čơđai sang hră djă kơdung sum ao đĭ gah klôn pơgiăng hăng rơdêh thut, ƀing nai ba nao pơ sang hră. Khua plơi ơi Đinh Uyt lăi:

“Tal anai lĕ tal dua laih kâo ngă hrom ƀing nai pơtô hyu jak iâu čơđai sang hră glăi hrăm hră, ƀơi anŏ ngă hrom anom bruă kơnuk kơna, khul grup mơnuih tơpuôl, mơnuih ping gah, ƀơi anŏ ngă hrom amĭ ama ƀing čơđai sang hră brơi ană bă gơñu nao hrăm hră, ngă hrom ƀing nai hyu bưp hăng pơtô lăi djop sang anŏ amăng mơmŏt mlăm”.

Sa amăng hơdôm čô nai pơtô thun dŏ hlăk ai hloh mơ̆ng sang hră, nai Nguyễn Quốc Triều ră ruai glăi, lu wơ̆t ñu hăng ƀing nai đĭ rơdêh răm hĭ krah jơlam, rơbuh ƀơi jơlan lu wơ̆t mơ̆n, sum ao hlŭ lŏn hñip hnap.

Ƀing nai pơtô hrăm hră hyu jak iâu čơđai sang hră mơ̆ng mơguah sing bring

“Amăng thun blan mă bruă 4 thun hăng anai, hơdôm thun blung a tơnap biă mă, jơlan rô nao rai ƀu klă ôh. Kâo pơmin čơđai sang hră ta kiăng kơ ta biă mă, pioh djru pơtô boh hră anun gir run djru ba ƀing čơđai sang hră dŏ ƀơi kual ataih, tơnap tapkiăng  dưi hrăm hră laih anun ba tơlơi thâo thăi phrâo kiăng ngă anŏ djă đôm lui amăng drơi jăn gơñu mut nao amăng tơlơi hơdip mơda kơñ pơgi”.

Ataih mơ̆ng tơring glông Kƀang 40 km, sang hră đôm lăm kơnuk kơna rông ba čơđai sang hră djuai ƀiă Krong, pơdong ƀơi anih giăm kriăng tơkai čư̆. Sang hră man pơdong 17 thun laih, ră anai hơmâo 14 čô nai pơtô hăng 322 čô čơđai sang hră, lu kơ djuai ania Bahnar. Nai pơtô Phan Danh, Kơ-iăng Khua sang hră brơi thâo, hlâo adih, lơ̆m aka ƀu hơmâo klin Covid 19 hơđuh rai, čơđai sang hră ƀu djop gơnam hrăm mơ̆ng ataih lăng amăng tivi, ƀing nai pơtô čih hră pơkra hơdră pơtô ba nao tơl sang kơ čơđai hrăm mă pơ sang.

Jơlan nao pơ sang hră mơ̆ng ƀing nai rô čun čue tơnap tap biă mă

Mơ̆ng plah wah blan 11 anai, čơđai sang hră pơwơ̆t glăi pơ sang hră. Samơ̆ mrô čơđai sang hră pơdơi lu biă mă, nai pơtô khom nao jak iâu glăi. Rĭm wơ̆t nao jak iâu lĕ, tơnap tap biă mă. Nai Phan Danh lăi:

“Tơlơi thâo hluh kiăng hrăm hră mơ̆ng čơđai ƀu lu ôh, wơ̆t ƀing amĭ ama čơđai sang hră hai, gơñu ƀu kiăng ôh ană bă nao hrăm hră yua ră anai sang hră gưl dua ƀing čơđai sang hră gơñu pơprong laih, thâo ngă bruă hăng sang anŏ lăng gơñu yơh mơnuih mă bruă phun kơ sang anŏ. Lu mơnuih amĭ ama ƀu brơi ană bă nao hrăm hră ôh.

Đơ đam hơmâo mơ̆n ƀing nai nao anur mă kiăng brơi čơđai nao sang hră, samơ̆ amĭ ama gơñu hil rơ̆t kơ ƀing nai, kiăo taih puh đuăi ƀing nai, anun tơnap tap biă mă. Tơdah ƀuh čơđai sang hră pơwơ̆t glăi hrăm hră aka ƀu hơđong, ƀing nai mơ̆ng klăm hrơi tơjuh khom ƀuh ƀô̆ mơta pơ sang hră truh mơguah hrơi sa ăt nao jak iâu ƀing čơđai kiăng nao sang hră mơ̆n”.

Găn rơgao hĭ tơlơi tơnap tap, ƀing nai pơtô pơ sang hră đôm lăm kơnuk kơna čem rông ba čơđai djuai ania ƀiă Krong ăt abih pran jua khăp kơ čơđai sang hră, hur har kơ bruă pơtô hrăm hră. Sit mơ̆n tơlơi mơak prong hloh kơ ƀing gơñu pơ anai lĕ čơđai sang hră ƀu lui sang hră, ƀu lui anih hrăm, kiăng kơ kơñ pơgi anai tơlơi ư̆ rơpa ƀun rin huăi dŏ ƀel tui kơ djop pô, djop drơi.

Hoàng Qui pô čih-Nay Jek: Pơblang