VOV4.Jarai - Tơring čar Dak Lăk ră anai hơmâo rơbêh 10 rơbâo anom bơwih ƀong glăk ngă bruă, lu biă ñu anom bơwih ƀong anet hăng găp ƀrô. Kiăng djru ba hơdôm anom bơwih ƀong, Ping gah tơring čar Dak Lăk hơmâo ngă tơlơi pơtrun pơplih mrô rơwang thun mơng anai truh thun 2025, anăp nao truh thun 2030. Tơring čar kiăng truh thun 2025 hơmâo năng ai 60% mrô anom bơwih ƀong anet hăng găp ƀrô mă bruă sĭ mơdrô ƀơi anih sĭ mơdrô điện tử; prăk sĭ mơdrô điện tử đĭ 10% rim thun.

Yua pơplih bruă bơwih ƀong hăng mrô, lu anom bơwih ƀong ƀơi Dak Lăk hơmâo pơhrŏ lui laih mrô mơnuih mă bruă samơ̆ ăt bơwih ƀong đĭ mơn.

Kiăng dưi ngă tơlơi anai, Dak Lăk him lăng amra mă yua rơbêh 1 klai 800 klăk prăk amăng 5 thun tuh pơ plai gah bruă pơplih bruă bơwih ƀong hăng mrô hăng pơđĭ kyar bruă sĭ mơdrô điện tử. Amăng anun hơmâo bruă pơđĭ pơplih mă yua mrô amăng hơdôm anom bơwih ƀong; pơđĭ kyar anih sĭ mơdrô điện tử pơhlôm pơtruh nao rai pô pơkra gơnam hăng pô blơi yua, biă ñu lĕ nua gơnam mơng hmua, tuai hyu ngui, bruă pơkra gơnam hăng măi mok anet ƀiă lăng nao rai mơng ataih đôč. djru pơplih mrô amăng hơdôm bruă anai ƀơ̆i hlâo kah hăng ngă hmua, pơtô hrăm, ia jrao, jơlan nao rai hăng logicstics, boh thâo măi mok hăng apui lơtrik, kông ngăn lŏn adai - prăk kăk - sang bruă prăk hăng tuai hyu ngui.

Siu H’Mai: Pơblang