VOV4.Jarai - Lơ 27/10, hrơi mă bruă tal 8, jơnum lok 2, Khua pơ ala mơnuih ƀon sang dêh čar tal XV, pơgôp hiăp hrŏm kơ bruă ngă tui hơdră djru hră pơhlôm nua ia jrao, ƀing khua pơ ala mơnuih ƀon sang tơring čar Kontum rơkâo kiăng kơ tŏ tui djru brơi hră pơhlôm nua ia jrao kơ ƀing mơnuih ƀu hơmâo prăk blơi. Anai lĕ bruă mă sit nik kiăng kơ djru brơi mơnuih ƀon sang, sit biă ñu djru brơi mơnuih djuai ania ƀiă dưi tŭ mă hơdôm hơdră djru amăng khăm pơjrao, plai ƀiă duh prăk kak.

Tui hơduah ĕp sit nik mơng khua mua pơ ala mơnuih ƀon sang tơring čar Kontum brơi ƀuh, amăng mrô mơnuih ƀu hơmâo Kơnuk kơna djru brơi hră pơhlôm nua ia jrao, hơmâo lu mơnuih lĕ sang anŏ tơnap tap, ƀu hơmâo prăk blơi hră pơhlôm nua ia jrao brơi kơ ƀing gơñu pô hăng mơnuih amăng sang anŏ. Amăng mrô rơbêh 51.800 čô mơnuih amăng tơring čar Kontum ƀu hơmâo Kơnuk kơna djru brơi hră pơhlôm nua ia jrao hơmâo truh pơ rơbêh 49.300 čô mơnuih djuai ania ƀiă, dưm dưm rơbêh 95%.

Siu Đoan: Pơblang