VOV4.Jarai - Krăp lăng mông tơña amăng lơ 11/11, ƀơi mông Jơnum lok 2, Ƀirô khua git gai pơ ala mơnuih ƀon sang dêh čar tal 15, ơi Ksor Yin, kư tri phường Đống Đa, plơi prong Pleiku, tơring čar Gia Lai lăi, Khua ding jum pơtô hăng pơjuăt ơi Nguyễn Kim Sơn hơmâo lăi glăi rơđah rơđông laih kơ hơdôm tơlơi ƀing khua tơña, lăng tơpă nao hơdôm tơlơi aka ƀu dưi ngă, ngă aka ƀu truh anih mơng anom bruă pơtô hrăm. Amăng anun ơi Yin lăng nao hloh kơ bruă kơƀah nai pơtô, samơ̆ rim thun anom bruă pơtô hrăm ăt pơhrŏ trun mrô nai pơtô. Ơi Yin kiăng, Ding jum pơtô hăng pơjuăt kiăng pơgôp hiăp hăng Kơnuk kơna, rơkâo kiăng hơmâo hơdră ngă bruă phara, đah mơng pơhlôm hăng pơđĭ tui anŏ klă mơng tơlơi hrăm hră pơ anăp. Bơ ơi Y Khút Niê, Kơ-iăng khua hơđăp grup pơ ala mơnuih ƀon sang dêh čar tơring čar Dak Lăk tal 14 lăi: Khua ding jum hơmâo lăi pơthâo glăi djŏp tơlơi tơña laih, wơ̆t hăng hơdôm bruă aka ƀu thâo rơđah mơng mông jơnum hlâo, čang rơmang Khua ding jum tañ hrŏm hăng Anom bruă pơtô hrăm dưi găn rơgao tơlơi tơnap prong yua klin Covid-19 ngă:

“Kiăo tui tơlơi tơña mơng ƀing khua, kâo pơmin Khua ding jum mah ñu phrâo ngă khua samơ̆ thâo rơđah kơ djŏp bruă, thâo pơsir brơi hơdôm tơlơi abih bang lăp đing nao. Khă hnun hai, hrơi blan pơ anăp ăt hơmâo mơn sa bruă prong biă hăng tơnap biă kơ khua ding jum lĕ kiăng dưm dăp glăi hrơi mông hrăm hră, biă ñu lĕ ƀing čơđai anih sa, anai lĕ bruă kiăng jŭ yap, pơmin tŏng ten hloh”.

Siu H’Mai: Pơblang