VOV4.Jarai - Rơwang hrơi tơjuh rơgao, Jơnum lok 2, Ƀirô Khua git gai pơ ala mơnuih ƀon sang dêh čar tal 15 hơmâo pơphun jơnum lăi nao lu tơlơi yôm phun, amăng anun kư tri amăng dêh čar ta pơđing hmư̆ biă tơlơi tơña gah bruă hrăm hră amăng mông hơmâo klin Covid-19. Tơlơi pơmin hrŏm mơng abih bang kư tri, bruă lăi glăi mơng Khua ding jum pơtô hăng pơjuăt Nguyễn Kim Sơn hăng tơlơi anai rơđah laih, pơmin dlăm biă yơh.

Pơđing hmư̆ biă kơ bruă pơtô hrăm mơng ataih tui glông internet mơng anom bruă pơtô hrăm amăng mông hơmâo klin Covid-19 ră anai, kư tri Lưu Văn Đức, dŏ ƀơi phường Quyết Thắng, plơi prong Kon Tum, tơring čar Kon Tum brơi thâo, Khua ding jum pơtô hăng pơjuăt Nguyễn Kim Sơn lăi glăi tơlơi tơña rơđah rơđông hăng bơbrăng mơtăm yơh. Khua ding jum hơmâo lăi tơpă kơ hơdôm tơlơi aka ƀu dưi ngă, ngă aka ƀu djơ̆ mơng hơdră hrăm mơng ataih anai laih anun ba tơbiă lu hơdră pơsir brơi. Kiăo tui tơlơi bơwih ƀong, mơnuih mơnam mơng tơring čar Kon Tum ră anai ăt glăk dŏ tơnap, bruă hrăm mơng ataih kơnong dưi ngă ƀơi hơdôm kual bơwih ƀong dưi dăi đôč, kư tri Lưu Văn Đức pơgôp hiăp:

“Amăng hrơi blan hơmâo klin Covid-19, pô kâo lăng bruă ngă tui tơlơi thâo rơgơi hrăm mơng ataih anai aset biă, yua hnun amra bơbeč kơ bruă pơtô hrăm brơi mơnuih mă bruă amăng rơnuk tơdơi. Yua hnun hăng tơring čar gơmơi, Kơnuk kơna kiăng sem lăng tuh pơ plai pơkra gơnam, akŏ pơdong anih pơčlah pơƀut hrŏm, plai ƀiă mă yua sang hră ngă anih pơčlah hăng pơjrao mơnuih ƀă klin Covid. Ƀu dưi mă yua sang hră dong tah, yua dah bơbeč kơtang biă kơ bruă hrăm hră mơng ƀing čơđai”.

Pơmin nao kơ bruă pơplih phrâo pơtô hrăm, kư tri Vũ Thị Quế, dŏ ƀơi plơi prong Lai Châu, tơring čar Lai Châu lăi nao hơdôm tơlơi tơnap, tơlơi lông mơ̆ anom bruă pơtô hăng pơjuăt bưp amăng hrơi blan rơgao. Samơ̆, bruă pơplih phrâo tơlơi pơtô hrăm mơng ataih kiăng djơ̆ hăng mông hơmâo klin amra sui mơng abih mơ̆ Ding jum pơtô hăng pơjuăt ba rơbiă ăt kiăng pơmin nao kual plơi pla hăng tơlơi hrăm hră mơng ƀing čơđai pơ kual ataih yaih, kual čư̆ siăng mơn.

“Hăng tơlơi hrăm hră mơng čơđai sang hră kual čư̆ siăng kriang pơtâo, kual mơnuih djuai ƀiă tơnap mơng hơđăp ƀơ̆i laih, tơnap hloh pơhmu hăng kual dơnung, lŏn tơthă, kual plơi prong. Laih dong ră anai klin kheng jing čơđai jing hrăm online, ƀu hơmâo măi jing tơnap biă yơh. Čang rơmang Ding jum pơtô hăng pơjuăt hơmâo hơdră pơplih lăp djơ̆ pơhlôm brơi tơlơi dưi, tơlơi klă hiam kơ ƀing čơđai djuai ƀiă kual čư̆ siăng”.

Lăi glăi tơlơi tơña mơng ƀing khua kơ bruă pơtô hrăm mơng ataih amăng internet ƀu dưi ngă klă tui hăng pơtô ƀơi anăp ôh, jing bruă sem lăng, pơtŏng glăi tơlơi hrăm hơmâo ngă hlao mơtăm hă ƀudah kơdun glăi ha thun dong, Khua ding jum Nguyễn Kim Sơn lăi:

“Pơtô hrăm mơng internet aka ƀu phiah hơmâo djơ̆ ôh mơng hlâo, hơmâo lu tơlơi ƀing ta kiăng ƀrư̆ pơkra glăi amăng ƀrư̆. Bơ yua hơmâo anŏ tơnap mơ̆ ƀing ta ƀu nao sem lăng, pơtŏng glăi, kơdun glăi ha thun dong kâo pơmin ƀu djơ̆ ôh. Hrăm dơ̆ hơpă lĕ ƀing ta sem lăng dơ̆ anun laih anun ăt pơmin nao laih hơdôm tơlơi bơbeč mơng klin hăng kiăo tui hnong pơkă dưi đĭ anih mơng jơlan hơdră phun”.

Khua ding jum pơtô hăng pơjuăt Nguyễn Kim Sơn lăi glăi tơlơi arăng tơña.

Tui hăng tơlơi pơtŏng glăi mơng ƀing khua pơ ala mơnuih ƀon sang dêh čar, Khua ding jum Pơtô hăng Pơjuăt Nguyễn Kim Sơn mah phrâo ngă bruă đôč samơ̆ thâo rơđah abih djŏp mơta tơlơi, prăp lui rơđah rơđông hăng lăi glăi rơđah rơđông, bơbrang mơtăm hăng hơdôm tơlơi mơ̆ ƀing khua pơđing hmư̆. Ơi Y Khút Niê, Kơ-iăng khua hơđăp grup khua pơ ala mơnuih ƀon sang dêh čar tơring čar Dak Lăk tal 14 lăi: Ƀing khua hơmâo tơña hơdôm tơlơi yôm phun laih, djơ̆ tui tơlơi pơplih rơnuk anai, lơ̆m bruă pơtô hrăm bưp tơlơi bơbeč kơtang mơng klin Covid-19.

“Kiăo tui bruă tơña hăng lăi glăi tơlơi tơña mơng ƀing khua, kâo lăng khua ding jum mah phrâo ngă khua samơ̆ thâo rơđah djŏp djel bruă, thâo kơjăp hăng dưi pơsir brơi hơdôm tơlơi kiăng pơsir hlâo. Samơ̆ amăng hrơi blan pơ anăp ăt hơmâo mơn bruă prong hăng tơnap biă kơ khua ding jum lĕ kiăng dưm dăp glăi hrơi mông ƀing čơđai hrăm hră, biă ñu lĕ ƀing čơđai gưl sa, anai lĕ bruă kiăng jŭ yap pơmin tŏng ten”.

Tum pơƀut glăi hơdôm bruă gah pơtô pơjuăt, Khua git gai pơ ala mơnuih ƀon sang dêh čar ơi Vương Đình Huệ pơsit, klin Covid-19 ƀu kơnong bơbeč kơtang bruă pơtô hrăm đôč ôh mơ̆ ngă kaih bruă pơplih phrâo pơtô hrăm gưl prong. 28 čô khua tơña, 10 tơlơi pơgôp hiăp, bơkơtuai nao rai, 20 čô khua rơkâo tơña samơ̆ aka ƀu hơmâo tơña ăt pơƀuh anŏ lăng ba mơng ƀing khua pơ ala mơnuih ƀon sang, hơdôm pluh klăk čô čơđai sang hră, amĭ ama ƀing čơđai amăng dêh čar ta. Khua ding jum pơtô hăng pơjuăt ơi Nguyễn Kim Sơn phrâo ngă khua đôč, samơ̆ thâo abih mơn hơdôm tơlơi hơmâo amăng bruă pơtô hrăm, bruă ñu gơgrong wai lăng, hơmâo lăi glăi rơđah hơdôm tơlơi pơgôp hiăp mơng khua pơ ala mơnuih ƀon sang ăt kah hăng hơdôm tơlơi hơmâo ba bơrơjah. Khua git gai pơ ala mơnuih ƀon sang ơi Vương Đình Huệ lăi pơtŏng:

“Kiăng Ding jum pơtô hăng pơjuăt ngă hrŏm kơjăp hăng Ding jum ia jrao hăng hơdôm anom bruă kơsem min, tañ tlâ̆o pơgang vaccine kơ ƀing čơđai. Anai lĕ sa amăng hơdôm tơlơi phun akha đah mơng tañ brơi čơđai sang hră pot glăi hrăm tañ hloh. Hơmâo prăp lui bruă ba čơđai sang hră hrăm glăi, kiăng hrăm pơƀut pơ sang hră. Tañ ngă anet tui tơlơi pleh ploh čơđai hrăm hră pơ plơi prong hăng plơi pla anet, biă ñu lĕ kual ataih yaih, kual mơnuih ƀon sang djuai ƀiă dŏ, kual čư̆ siăng kriang pơtâo”.

VOV Tây Nguyên: Čih - Siu H’Mai: Pơblang