VOV4.Jarai -  Amăng tal klin Covid-19 tal 4, hmâo laih hơdôm rơtuh čô mơnuih mă bruă gah ia jrao ling tơhan nao djru brơi hơdôm bôh tơring čar kual klin ngă gah Dơnung dêh ccar. “Abih klin ngă kah mơng glăi” jing tơlơi pơsit mơng mơnuih mă bruă amăng khul ia jrao ling tơhan amăng rơnuk kơdŏng glăi klin ruă lom yak mut bruă ƀu hmâo jua phao. Pô mă tơlơi pơhing phrâo Gong phun jua pơhiăp dêh čar Việt Nam hmâo čih pioh pran jua hăng tơlơi pơmin mơng mơnuih apăn bruă, mơnuih mă bruă ia jrao hlâo kơ mông nao pơ̆ hơdôm bôh tơring čar Dơnung dêh čar ta kơtưn khul mơnuih kơ Sang ia jrao mă yua lŏn kiăng ƀơi ƀôn prong Hồ Chí Minh.

100 čô ơi nai ia jrao, mơnuih mơng Anom bruă ia jrao khul ling tơhan, mơnuih mơng Sang ia jrao ling tơhan mrô 7, Sang ia jrao ling tơhan 103 hăng Anom kơsem min bruă ia jrao akha kyâu Khul ling tơhan, mơng mơguah ƀuh ƀô̆ ƀơi anih anom tum pơƀut Lữ đoàn dŭ pơgiăng 971 Sóc Sơn pioh prăp lui nao mă bruă. Abih bang leng kơ sa ia sum ao mă bruă, sa bôh ƀa lô rơguăt ƀơi pra, anun lĕ abih bang gơnam nao kơdŏng klin.

Hlâo kơ nao pơ̆ hơdôm bôh tơring čar kual Dơnung mă bruă, ƀing ling tơhan kơnong kơ hmao iâu telephone kơ sang anô̆ mă ƀiă mơn. Yua kơ tŭ mă tơlơi pơtrun ječ amăng krah mlăm, truh mơguah hrơi tơdơi nao pơ̆ ƀôn prong Hồ Chí Ming, ƀing apăn bruă ia jrao ling tơhan kơnong kơ hmao prăp lui gơnam mă yua kơ pô amăng mông dô̆ gak, ƀu hmao weh nao čuă sang. Đa lĕ Thiếu tá Nguyễn Thị Kiên – mă bruă ƀơi Sang ia jrao ling tơhan mrô 7 akă hmao lăi pơhing hăng sang anô̆ ôh.

 “Rơkơi kâo lĕ akă thâo ôh, yua kơ kâo phrâo hmâo mă tơlơi pơtrun amăng mlăm mơmot, kâo akă hmâo lăi pơthâo ôh, rơkơi kâo hyu mă bruă laih, rơkơi kâo ăt amăng khul tơhan mơn, rơkơi kâo lĕ kông ang”.

Ƀing ling tơhan mă bruă ia jrao čơkă mă bruă pơtrun nao mă bruă

Tal hyu mă bruă ƀu hmao thâo hlâo anai amra lĕ 15 hrơi amra sui hloh dong, ƀu hmâo hlơi tơña kơ hrơi pơwot glăi ôh, yua kơ mrô mơnuih ruă ăt đĭ lu mơn, hăng ƀing gŏp nao hlâo ăt glăk dô̆ rim hrơi pơjrao brơi mơn kơ mơnuih ruă amăng hơdôm bôh sang ia jrao mă yua lom kiăng lu rơwang hrơi tơjuh hăng lu tơlơi tơnap tap hăng ayuh hyiăng ƀu klă, samơ̆ hlơi hlơi leng kơ gir run gơgrong kơdŏng glăi klin mơn. Hăng gơñu thâo hluh lom buh ao amăng drơi 2 ia ao ling tơhan, ơi ia jrao lĕ hơdôm mông tơnap klin ngă, hloh kơ anun lom mơnuih ƀôn sang kiăng, lŏn ia kiăng truh gơñu. Amăng pran jua čang rơmang tañ nao pơ̆ kual klin ngă, Đại uý, ơi ia jrao Đặng Văn Ba anom pơjrao hơkrŭ pran jua, Sang ia jrao ling tơhan 103, lăi pơthâo:

 “Lăng ƀuh amăng hơdôm tivi brô̆ pôr pơhing, hăng ƀing adơi ayong mă bruă amăng anun brơi thâo mrô mơnuih ruă F0, biă ñu lĕ mrô mơnuih ruă F0 kraih lu biă, drơi pô ƀing gơmơi ăt hang tơngia mơn, kiăng dưi nao kiăng gum hrom, djru adơi ayong mă bruă gah ia jrao, dưi djru brơi mơnuih ruă hơdôm hơpă lĕ klă hơdôm anun”.

Thiếu tá Đỗ Mai Phương, Sang ia jrao ling tơhan 7 rŏng rơkâo nao gum djru pơ̆ ƀôn prong Hồ Chí Minh kơdŏng klin

Pơsit rơđah anai lĕ bruă mă amăng rơnuk anai, yap wot hơdôm mơnuih glăk dô̆ hrăm bruă ia jrao hlăk ai kah hăng Trung sĩ, Phạm Công Kim, glăk hrăm ƀơi Sang hră pơtô bruă ia jrao ling tơhan ăt prăp lui tuh rơyuh pran jua pô mơn hăng pơsit rơđah bruă mă lom dưi kơtưn kơ sang ia jrao mă yua lom kiăng ƀơi ƀôn prong Hồ Chí Minh:

 “Ƀing gơmơi dưi pơhrăm 3 tal laih, pơhrăm hơdôm bôh thâo mă ia adung, ia khak ăt kah hăng ba nao pơčrang lăng, ƀing gơmơi amra djru kơ bruă pơčrang lăng amăng bruă kơdŏng klin, hăng bruă wai lăng mơnuih ruă ƀing gơmơi amra dưi ngă mơn”.

Pioh glăi gah tlôn lĕ bơnai, rơkơi, ană, amĭ ama tha ƀu ai, samơ̆ bruă gah tlôn mơng ling tơhan ăt pơpŭ mơn, thâo hluh bruă mơng khul tơhan, kiăng abih pran jua, tơlơi pơmin kơ bruă kiăng ječ kơ ană bă gơñu. Yua anun ƀing ling tơhan hơđong pran jua, pơsit pran jua nao mă bruă khă ƀu ƀiă bruă gun. Biă ñu hăng hơdôm bôh sang anô̆ wot dua čô rơkơi bơnai leng hyu mă bruă amăng khul ling tơhan hăng leng kơ khul nao pơ̆ anih kiăng ječ. Pô mă bruă wai lăng mơnuih ruă gah ling tơhan Nguyễn Thị Kiên brơi thâo:

“Sa čô ană hrăm anih 10, sa čô hrăm anih 4 samơ̆ amĭ ama rơkut nao gak amăng mlăm mơmot, rơkơi kâo ră anai glăk pơ̆ kual dô̆ čơlah, mă bruă wai lăng amăng kual čơlah anun dua čô ană dưi pơhrăm dong mơng sui laih anun jing juăt hăng bruă amĭ ama rơkut anun dua adơi amai gum hrom pơhrăm pô, dŏ dŏng ƀong huă”.

Tui hăng anun Thiếu tá – Ơi ia jrao Đỗ Mai Phương ăt pioh dua čô ană anet pơ̆ sang bơwih mă pô, bơ̆ amĭ lĕ nao pơ̆ kual Dơnung kơdŏng klin mơ̆ ƀu bơngot hơget lu ôh.

 “Dua adơi amai pơ̆ sang rơnăk mă drơi pô, kâo pơsit bruă mă mơng pô lĕ nao gum tơngan hrom, djru pran kơdŏng klin hăng neh wa amăng kual Dơnung, pơsit rơđah bruă mă anun ƀu hmâo hơget dô̆ bơngot dong tah”.

 Ngă tui phiăn juăt khom dưi, khom truh kih mơng Khul ling tơhan sông kơtang, hăng pran jua abih bang yua kơ neh wa kual Dơnung adơi ayong, hăng bruă mă “kơdŏng klin kah hăng kơdŏng ayăt”, anăp nao kơtang hloh, khom khut khăt hloh, ƀing ta khom pơsit pran jua dlông hloh, prăp lui čơkă mă hăng ngă giong prong bruă mă. Hlâo kơ anun, Ding jum khul ling tơhan hmâo črâo ba ƀirô, anom bruă pok pơhai pơdŏng 7 bôh sang ia jrao mă yua lom kiăng ƀơi hơdôm bôh tơring čar, ƀôn prong gah Dơnung dêh čar hăng bruă čơkă mă, pơjrao brơi 3.500 čô mơnuih ruă hăng prăp lui pơhư prong, djơ̆ hăng rơnoh čơkă mă truh 10.000 čô mơnuih ruă.

Tơlơi pơpĕ đuăi mơng ƀing ling tơhan ơi ia jrao ăt pơphun pha ra mơn, ƀu hmâo mơnuih amăng sang anô̆, kơnong kơ ƀing gŏp mă tơngan amăng krah lu bruă mă hăng mơnuih ruă dô̆ tơguan. Gơñu nao tô̆ tui yak hơdôm rơtuh čô mơnuih apăn bruă, ƀing ơi nai ia jrao ling tơhan glăk ƀuh ƀô̆ ƀơi 7 bôh sang ia jrao mă yua lom kiăng yua kơ khul ling tơhan pơdŏng ƀơi kual klin ngă gah hơdôm bôh tơring čar kual Dơnung, anih glăk pơjrao kơ hơdôm rơbâo čô mơnuih ruă klin Covid-19 hăng pran pơsit pơgang tơlơi hơdip, tơlơi suaih pral kơ mơnuih ƀôn sang, yua kơ hrơi pơgi ƀu dô̆ klin ngă./.

Siu H’ Prăk: Pô pơblang