VOV4.Jarai -  Pơdơi mă bruă, ƀu hơmâo prăk apah, khŏm pơplih bruă, anai lĕ hơdôm bruă mơ̆ ƀing nai sang hră čơđai anet pok  mă hơjăn ƀơi Daklak glăk bưp amăng hrơi blan klin Covid-19 hơđuh đĭ. Bruă bong glăi ƀing nai pơtô lơ̆m sang hră pơdơi lĕ bruă ngă tơnap tap ƀơi hơdôm sang hră pơtô čơđai anet pok mă hơjăn amăng tơring čar anai.

Giăm hơdôm pluh thun ngă nai pơtô ƀing čơđai anet, nai Trần Thị Hải, sang hră čơđai anet pok mă hơjăn Tuổi Thơ, ƀơi phường Tân Tiến, plơi prong Buôn Ma Thuột aka ƀu pơmĭn amra pơdơi bruă ƀu hơmâo prăk apah amăng sui hrơi tui ră anai. Ƀu hrup hăng ƀing nai pơtô ƀơi sang hră kơnuk kơna pơdong, ƀing nai pơtô ƀơi sang hră pok mă hơjăn kar hăng ñu ƀu hơmâo prăk djru pơpă ôh mơng sang hră. Sang hră pơdơi pơtô hrăm, ƀing nai ăt ƀu hơmâo prăk apah lơi. Kiăng kơ hơmâo prăk yua rĭm hrơi, ñu ĕp bruă sĭ gơnam online hăng čang rơmang amra tañ pơwŏt glăi pơtô brơi ƀing čơđai. Nai Trần Thị Hải brơi thâo:

“Mơng hrơi ƀing čơđai pơdơi pioh pơgang klin truh ră anai, ƀing nai kar hăng ƀing gơmơi anai ăt pơdơi ƀu hơmâo bruă mă ôh. Prăk yua rĭm hrơi juăt mơng prăk blan, hơdôm blan akŏ thun ăt huăi tơnap đơi ôh, mơ̆ sui hrơi ăt ƀu dưi lơi. Ră anai hơmâo bruă hơget kâo ngă soh, samơ̆ ăt dŏ tơguăn kiăng kơ pơwŏt glăi pơtô hrăm”.

Nai sang hră čơđai anet Tây Nguyên, plơi prong Buôn Ma Thuột, tơring čar Daklak kih rơmet, rao pơgoh gơnam čơđai ngui

Ƀu djơ̆ kơnong nai pơtô bưp tơnap tap đôč ôh mơ̆ hơdôm sang hră, hơdôm anih pơtô hrăm pok mă hơjăn ăt bưp tơnap tap lơ̆m hơdôm sang hră anai krư̆ bah amăng amăng hơdôm blan laih rơgao. Nai Đồng Thị Thuận, Khua sang hră čơđai anet Tây Nguyên, ƀơi phường Thành Nhất, plơi prong Buôn Ma Thuột brơi thâo, sang hră glăk glêh tơnap biă mă kiăng kơ ngă bơkơnar prăk pơhrui - prăk apah kiăng găn rơgao hơdôm hrơi blan tơnap tap anai. Sang hră hơmâo rơbêh 40 čô mơnuih apăn bruă, nai pơtô. Ƀing čơđai pơdơi, sang hră ƀu hơmâo prăk pơhrui samơ̆ ăt apah prăk kiăng tŏ tui na nao. Rĭm blan khua sang hră khŏm duh lu mơta prăk anun lĕ: prăk čan sang bruă prăk, duh amăng hră pơhlôm nua mơnuih mơnam, hră pơhlôm nua ia jrao, hrăm pơhlôm lơ̆m rơngiă bruă brơi kơ nai pơtô, mơnuih mă bruă tui hăng tơlơi pơkă. Nai Đònh Thị Thuận bơngŏt brơi thâo:

“Hơdôm blan giăm anai, sang hră ƀu hơmâo prăk apah brơi ƀing nai pơtô yua anun ƀing nai bưp tơnap tap biă mă. Čang rơmang djop gưl hơmâo hơdră djru brơi gơnong bruă pơtô pơjuăt. Sit biă ñu ƀing nai sang hră čơđai anet hơmâo hơdră djru phara kiăng kơ pơsur ƀing nai tŏ tui pơtô hrăm dong lơ̆m ƀing čơđai pơwŏt glăi nao sang hră. Laih dong, hơdôm rơnoh prăk djru ăt pơtrut tañ kiăng mơnuih mă bruă dưi tŭ mă măng hrơi blan bưp tơnap tap yua klin Covid-19 ngă”.

Lu nai pơtô sang hră čơđai anet pok mă hơjăn sĭ gơnam online amăng hơdôm hrơi pơdơi pioh pơgang klin

Đơ đam tơring čar Daklak ră anai hơmâo 70 boh sang hră čơđai anet pok mă hơjăn hăng rơbêh kơ 80 anih pơtô čơđai tư thục, dân lập. Bruă pơtô hrăm ƀơi hơdôm sang hră anai lĕ kiăng kơ đing nao čem rông ba ƀing čơđai anet yua anun tơnap pơtô lăng nao rai mơng ataih. Hơdôm sang hră krư̆ bah amăng pioh pơgang klin Covid-19, ƀing nai pơtô sang hră čơđai anet pok mă hơjăn pơdơi, yua anun ƀu hơmâo prăk pơhrui. Kơ bruă djru brơi ƀing mơnuih anai, ơi Phạm Đăng Khoa, Khua anom bruă pơtô pơjuăt tơring čar Daklak brơi thâo:

“Hơdôm tơlơi tơnap tap ƀơi hơdôm sang hră pok mă hơjăn, sit biă ñu lĕ sang hră čơđai anet, Jơnum min mơnuih ƀon sang tơring čar ăt git gai Gơnong bruă pơtô pơjuăt jŭ yap glăi mă bruă amăng hơdôm sang hră pok mă hơjăn ƀơi sang hră čơđai anet kiăng pơphôô bruă brơi Jơnum min mơnuih ƀon sang tơring čar lăi pơthâo kơnuk kơna kiăng kơ dưi tŭ mă prăk djru tui tơlơi pơsit mrô 68 mơng Kơnuk kơna mơ̆ tơdah ƀu hơmâo hơdră djru mơng Kơnuk kơna hơdôm sang hră pok mă hơjăn, biă mă ñu lĕ hơdôm sang hră čơđai anet amra bưp tơnap tap lơ̆m amăng sui hrơi lơ̆m hơdôm sang hră krư̆ bah amăng”.

Hơdôm sang hră pơtô čơđai anet pok mă hơjăn ăt lăng yôm mơn, kiăng kơ ngă plai ƀiă glêh tơnap hăng hơdôm sang hră čơđai anet kơnuk kơn pơdong, sit biă ñu ƀơi hơdôm anih dŏ hơdip lu mơnuih, laih dong pơgôp hơmâo lu dong anih pơtô hrăm ƀơi tơring čar Daklak. Samơ̆ amăng hrơi blan klin Covid-19 dŏ ngă tơnap tap tui ră anai, hơdôm sang hră čơđai anet pok mă hơjăn hrŏm hăng ƀing nai pơtô glăk glêh tơnap yua ƀu hơmâo prăk pơhrui kiăng kơ hơmâo prăk yua rĭm hrơi kah hăng tŏ tui na nao bruă pơtô hrăm. Yua anun, hơdôm hơdră djru brơi sang hră čơđai anet pok mă hơjăn kơ gơnam tam măi mok, pơhrŏ mă jia; djru brơi čan prăk mă kmlai ƀiă kiăng kơ hơmâo lu dong.

Siu Đoan: Pơblang