VOV4.Jarai -  Kiăng pơhlôm kơ mơnuih mă bruă ƀơi anăp pơplih tơnap mơng klin Covid-19, Binh đoàn 15 hmâo pơphun laih glông bruă pơgang, pơgăn klin hăng jơlan gah “Kơdŏng klin kah hăng kơdŏng glăi ayăt”. Hrom hăng anun, rơngiao kơ pơhlôm bruă bơwih ƀong huă, sĭ mơdrô huăi dŏng glăi, anom bruă hmâo đing nao, ngă tui lu hơdră bruă lăng ba truh tơlơi hơdip mơnuih mă bruă.

Sit truh 11 mông yang hrơi dŏng rim hrơi, kual tum pơƀut kơtăk kơ su mơng Grŭp mrô 2, Sang bruă 72 (tơring glông Đức Cơ, tơring čar Gialai) Binh đoàn 15 glăi bơ-or pơhiăp tlao mơng ƀing mơnuih mă kơtăk kơ su pơwot glăi. Gơñu mơ-ak yua kơ tơdơi kơ sa mlăm glêh glar, kơtăk pơhrui hmâo lu hăng hiam. Lom mă bruă, rim mơnuih thâo lĕ bruă gôm adung mơbah, pel ĕp pơkă lăng pơ-iă drơi jăn hăng djă pioh djơ̆ rơwang ataih nao rai lom jao kơtăk, hơdôm tơlơi hrăm kiăng juăt mơng gơñu lom klin Covid-19 gluh đĭ. Amai Siu H’ Yien, mơnuih kuah kơtăk kơ su grŭp 2, Sang bruă 72, (tơring glông Đức Cơ, tơring čar Gialai) Binh đoàn 15 lăi pơthâo:

 “Pơ̆ anai abih bang adơi ayong mă bruă ngă klă bruă pơgang, pơgăn klin, ƀu nao rai ča čot hăng mă bruă djă pioh rơwang ataih nao rai 2 met, kơnong kơ sang anô̆ hmâo 6 čô mơnuih mă bruă samơ̆ gơñu ngă tui na nao amăng bruă pơgang pơgăn klin pơ̆ sang hăng lom nao mă bruă dong”.

Ƀing apăn bruă, mơnuih mă bruă mơng Binh đoàn 15 ngă tui na nao pơgang pơgăn klin amăng bruă mă

Ƀơi hơdôm sang măi pơkra kơtăk kơ su, Binh đoàn 15 djă pioh bruă mă ba glăi bôh tŭ yua hăng tơhnal pơkă pơhlôm amăng bruă bơwih ƀong. Hăng sa sang măi pơkra, hơnong ñu hmâo mơng 25 – 30 čô mơnuih mă bruă, ră anai kơnong kơ hmâo mơng 10 – 15 čô mơnuih đôč mă bruă pơplih nao rai kiăng pơgang, pơgăn klin. Mơnuih mă bruă ƀong huă dô̆ glăi ƀơi sang măi hăng tơlơi pơkă dưi pơhlôm klă. Thượng tá Phan Văn Phú, Kơ-iăng Khua Sang bruă 72, Binh đoàn 15 brơi thâo:

“Amăng hơdôm hrơi rơgao lĕ, hrom hăng khul ƀơi tơring glông, djă kơjăp tơlơi rơnuk rơnua kơđi čar, hơđong pơhlôm mơnuih mơnam, hơđong bruă đang hmua plơi pla ƀơi tơring glông. Ƀing gơmơi pơsit lĕ pơgang pơgăn klin pơhlôm amăng anom, laih anun prăp lui rah khul mơnuih, gơnam mă yua, braih piang djop mơta bruă mă kiăng pơhlôm djru brơi hơdôm khul grŭp, hơdôm kual, hơdôm anih anom hmâo klin ngă. Ƀing gơmơi pơsit pơ̆ anăp anai djă pioh kơjăp dong, hơđong anom bruă, plơi pla. Pơhlôm bruă bơwih ƀong huă sĭ mơdrô ba glăi bôh tơhnal hăng klă hiam”.

Mơnuih mă bruă dưi pơkă lăng pơ-iă drơi jăn lom mă bruă

Tơdơi kơ Ding jum khul ling tơhan pha brơi vaccine pơgang klin Covid-19 mơtăm, Binh đoàn 15 hmâo pok pơhai tlâ̆o ară tal sa kơ abih bang mrô mơnuih apăn bruă tơhan, ling tơhan, mơnuih mă bruă. Kiăng bruă tlâ̆o pơgang pơhlôm, Binh đoàn 15 hăng hơdôm bôh anom pơdong kơčăo bruă, pơphun pơhrăm brơi kơ mơnuih apăn bruă, mơnuih mă bruă gah ia jrao ƀơi anăp mă bruă tlâ̆o vaccine, ruah mă, lăng tui, pơsir huĭ hmâo tơlơi ba glăi tơdơi kơ tlâ̆o pơgang. Gơnang kơ anun, bruă tlâ̆o pơgang mơng anom dưi pơphun klă, hmâo akô̆ tlôn, pơhlôm khut khăt. Amai Lê Thị Liên, Grŭp 4, Sang bruă 72 (tơring glông Đức Cơ, tơring čar Gialai), Binh đoàn 15 brơi thâo:

“Lom tơlơi klin ruă ngă tơnap kah hăng ră anai, adơi amai mă bruă ƀing gơmơi bơngot biă. Kah hăng kâo lĕ mơnuih mă kơtăk kơ su mơng sang bruă 72 lĕ anom pơdŏng ƀơi tơring glông guai lŏn ia, kual asuek, ataih, dưi hmâo Ding jum Khul ling tơhan, Binh đoàn, sang bruă ngă gal brơi kơ adơi ayong ƀing gơmơi tlâ̆o vaccine lĕ, ƀing gơmơi mơ-ak pran jua biă. Dưi tlâ̆o vaccine pơgang Covid-19 lĕ ƀing gơmơi ƀuh hơđong pran jua hloh, hrưn đĭ ngă giong prong djop bruă jao”.

Ƀing apăn bruă tơhan, ling tơhan, mơnuih mă bruă dưi tlâ̆o vaccine pơgang hlôm hlâo klin ruă

Amăng 2 thun rơgao, Binh đoàn 15 hmâo pơdŏng jơlan gah tui hơdră “4 mơta hơđăp” kiăng ngă giong dua tơhnal bruă ngă klă rah bơwih ƀong huă sĭ mơdrô pơkĕ hrom hăng pơgang lŏn ia – plơi pla, laih anun pơgang, pơgăn klin ba glăi bôh tơhnal rah. Amăng anun, Binh đoàn pơsit lăi pơhing lĕ pơgang kơjăp, djru pơhlôm kơ anom bruă hăng plơi pla ƀơi anăp klin Covid-19. Mơng anun, hơdôm bruă gum hrom bơwih ƀong dưi djă pioh, hơdôm mơnuih mă bruă hmâo bruă mă hăng prăk blan hơđong. Đại tá Lê Xuân Phương, Kơ-iăng Khua pơtrun bruă tơhan Binh đoàn 15 brơi thâo:

“Pơhlôm tơlơi hơdip, biă ñu prăk blan kơ mơnuih mă bruă hmao tlôn hăng rơnoh pơhrui glăi hơnong ñu lĕ mơng 6-7 klăk prăk. Mơnuih mă bruă lĕ hơđong pran jua. Biă ñu, lom mơnuih mă bruă hơđong pran jua, đăo gơnang kơ Binh đoàn laih lĕ bruă pơgang pơgăn klin klă biă. Ƀing gơmơi mă grŭp bơwih ƀong ngă anih gơgrong, grŭp bơwih ƀong huă wai lăng đing nao kah hăng sa khul mơnuih mơnam pơƀut jing anet, ngă tui tơpă hơdôm glông bruă. Truh mông anai, bruă pơgang pơgăn klin mơng Binh đoàn pơhlôm klă biă lĕ bôh tơhnal hăng pơhlôm. Bruă bơwih ƀong huă sĭ mơdrô thun anai ƀing gơmơi pơsit amra dưi ngă hăng hloh kơ rơnoh kơčăo bruă Ding jum khul ling tơhan jao kơ Binh đoàn 15”./. 

Hoàng Qui: Pô cih – Siu H’ Prăk: Pô pơblang