VOV4.Jarai - Tơlơi pơhŭi hơmâo klin Covid-19 hơđuh đĭ ƀơi đơr hơr tơring čar Bình Dương bơdjơ̆ nao sang brơi kông ñơn dŏ hăng ƀơi sang măi pơkra gơnam. Tơlơi pơhing hơmâo Anom git gai bruă čar kơ pơhlôm pơgang klin Covid-19 ba tơbiă ƀơi mông jơnum lăng nao rai amăng tivi hăng khua mua tơring čar Bình Dương, mơguah lơ 30/6. Kơ-iăng khua dêh čar ơi Vũ Đức Đam, Khua anom bruă git gai mông jơnum. Tơlơi pơhing ƀơi mông jơnum, yap truh mông anai, tơring čar Bình Dương hơmâo rơbêh 300 čô mơnuih ƀă klin Covid-19, amăng anun mrô F0 hơmâo ƀơi 32 boh kông ti, amăng anih pơkra gơnam hơmâo 39 čô mơnuih lĕ F0. Hơmâo 3 anih hơmâo klin prong laih anun ƀă hyu pơ 10 boh phường mơng 3 boh tơring glông, plơi prong. Ƀơi mông jơnum, Kơ-iăng khua dêh čar ơi Vũ Đức Đam git gai, tơring čar Bình Dương kiăng kŏm dŏ ngă bruă tum pơƀut lu mơnuih, pơtă hlâo anih amuñ ƀă klin; kiăng kah pơpha jing 2 bơnah pơčrang kman, wai lăng amăng plơi pla hăng ƀing amuñ ƀă kman hloh, kiăng pơđĭ tui mơnuih mă drah pơčrang kman laih anun gir amăng 24 mông khŏm hơmâo pơčrang giong laih anun gir ngă tom hăng realtime PCR dong.

Siu H’Mai: Pơblang