VOV4.Jarai-Ƀơi tơring čar Kon Tum, amăng hơdôm hrơi hăng anai, hơmâo 2 boh sang bruă sĭ mơdrô hyu blơi braih hăng akan mơ̆ng mơnuih ngă hmua amăng tơring čar laih anun ba nao djru mơnuih ƀôn sang kual hơmâo klin Covid 19 ƀơi ƀôn prong Hồ Chí Minh.

Hyu blơi djă pioh klă akan pioh mơ-it nao kơ mơnuih ƀôn sang kual klin Covid 19 ngă

Dua boh sang sĭ mơdrô prong hơmâo bruă ngă hiam anun lĕ Kông ty pơčruh ngăn Tấn Phát tơring čar Kon Tum hăng Kông ty pơčruh ngăn pơkra apui lơtrik Đại Trường Thành Holdings ƀôn prong Hồ Chí Minh.

2 boh kông ty hơmâo blơi 50 tơn braih hăng 20 tơn akan mơnuih ƀôn sang pơ să Đak La, tơring glông Đak Hà, Kon Tum laih anun pơgiăng ba nao kơ mơnuih ƀôn sang dŏ ƀơi anih pơčlah dŏ phara pơgang klin Covid 19 ƀơi kuân Bình Thạnh hăng kuân 12 ƀôn prong Hồ Chí Minh.

Bruă ngă anai djru blơi gơnam đang hmua mơnuih ƀôn sang rah, laih anun djru ba hmao kru kơ mơnuih ƀôn sang kual hơmâo klin ngă hlăk tơnap tap ră anai.

Nay Jek: Pơblang