VOV4.Jarai-Tơdơi kơ 9 hrơi jơnum mă bruă hmar, tơpă hnong, jơnum lok sa, khua pơ ala mơnuih ƀôn sang dêh čar tal XV hơmâo ngă giong  abih tơhnal bruă pơkă, tŭ yua hiam klă. Pơhiăp ƀơi mông jơnum pơđut, ơi Vương Đình Huệ, Khua git gai pơ ala mơnuih ƀôn sang dêh čar iâu pơthưr mơnuih ƀôn sang, ling tơhan, mơnuih ruah khua amăng dêh čar amăng dêh čar, djop sang bruă bơwih ƀong sĭ mơdrô, sang bruă khul mơnuih mơnam, tơpuôl grup mut phung, mơnuih ƀôn sang dêh čar ta dŏ pơ dêh čar tač rơngiao djă kjăp tơlơi gum pơgôp, ngă tui djơ̆ djop jơlan hơdră, tơlơi pơtrun mơ̆ng Ping gah, tơlơi phiăn mơ̆ng kơnuk kơna, pơtum abih bang pran jua kiăng pơgăn truh kih klin prong Covid 19, pơgang tơlơi hơdip, tơlơi suaih pral, rơnuk rơnua hơđong kơ Mơnuih ƀôn sang.

Jơnum lok sa, khua pơ ala mơnuih ƀôn sang dêh čar tal XV, pơčrông sai lu boh yôm phun, pơphun amăng hrơi blan klin kheng Covid 19 ƀă hyu kơtang, hơđuh glăi prong ƀơi ƀôn prong Hồ Chí Minh, hơdôm tơring čar gah kual Dơnung laih anun či ƀă hyu prong hloh. Djop sang bruă kơnuk kơna, ling tơhan mơnuih mă bruă pơ anăp hăng abih glông bruă kơđi čar grun drơi jăn ta pô, pơtum ngă tui khut khăt, pơhlôm, pơgang klin kiăng wai lăng tơlơi suaih pral, tơlơi hơdip, tơlơi dŏ dong ƀong huă mơ̆ng Mơnuih ƀôn sang.

Mông jơnum abih bang pơđut lok sa, khua pơ ala tal XV

Ƀơi anăp kơ tơlơi anun, Khua pơ ala mơnuih ƀôn sang dêh čar tŭ ư hră pơtrun, pơphun jơnum ƀiă hrơi hloh hăng tơhnal pơkă blung a dŏ glăi 8 hrơi, pơčrông sai pơkra glăi hơdră jơnum abih bang kiăng pơtum nao kơ bruă pơhlôm, pơgang klin Covid 19. Tơlơi anun brơi ƀuh Khua pơ ala mơnuih ƀôn sang dêh čar hơmâo ĕp lăng tong ten tơlơi pơhing sit nik amăng dêh čar, pơphun bruă ngă mơtam hmao kru, yua bruă yôm hlâo hloh hăng blung a lĕ wai lăng hăng pơgang tơlơi suaih pral Mơnuih ƀôn sang.

“Thâo dơlăm ƀơi anăp kơ tơlơi tơnap tap, lông lăng prong prin klin kheng Covid 19 ngă, khua pơ ala mơnuih ƀôn sang dêh čar, ƀing pơ ala dêh čar hơmâo pơđĭ tui tơlơi pơmin pran jua mă bruă glăm ba hăng kiăng gum pran, mơneč mă djop mông gêh găl, mă bruă gah rơngiao mông mă bruă laih anun mă bruă wơ̆t amăng hrơi pơdơi, bơblih phrâo hơdră mă bruă, pơčeh phrâo, djru pơgôp hiăp lăp djơ̆, dơlăm djơ̆ hơdră pioh kơ khua mua pơ ala ĕp glăi, pơsit hĭ laih anun čih pơkra 29 Hră pơtrun jơnum.

 Kiăng hmao kru djru pơsir hơdôm tơlơi kiăng ječ biă mă ƀơi anăp, laih anun pơsit bruă yơyôm phun, sui thun pơ anăp adih, djru hrom ngă giong jơnum tŭ yua hăng lu mơta bruă, dưi hơmâo Mơnuih ƀôn sang hăng mơnuih ruah khua čih pioh, tŭ ư hrom, bơni biă mă”.

 Ƀơi mông jơnum lok blung a rơwang bruă phrâo, khua pơ ala mơnuih ƀôn sang dêh čar ngă giong bruă pơtrun phun lĕ sem lăng, pơsit kơ bruă ruah khua mua pơprong kơ dêh čar, ngă djơ̆ tơlơi pơkă, anŏ gêh găl, djơ̆ hơdră akŏ klôn, tơlơi pơtrun mơ̆ng Ping gah hăng tơlơi phiăn dêh čar.

Hăng tơlơi bơtŭ ư hrom laih anun ruah khua, Khua pơ ala mơnuih ƀôn sang dêh čar ruah Khua mir sir, Khua git gai pơ ala mơnuih ƀôn sang dêh čar, Khua dêh čar hăng khua mua pơprong pơkŏn ƀơi gơnong dlông gưl dêh čar.

Hrom hăng anun, khua pơ ala mơnuih ƀôn sang dêh čar hơmâo sem glăi, pơsit djop akŏ bruă yua prăk kăk amăng 5 thun mơ̆ng thun 2021-2025: Akŏ bruă pơđĭ kyar bơwih ƀong huă mơnuih mơnam; akŏ bruă yua prăk kăk kơnuk kơna, prăk čan, tla hnưh bruă čar; akŏ bruă tuh pơ alin thun blan man ƀrô. Laih dơ̆ng, sem glăi, pơsit jơlan hơdră tuh pơ alin Hơdră dêh čar pơkă man pơdong plơi pla phrâo hăng Hơdră dêh čar pơkă kơ bruă pơhrŏ ƀun rin hơđong kjăp mơ̆ng thun 2021-2025.

Bruă sem glăi, pơsit abih bang djop akŏ bruă, hơdră thun blan man ƀrô 5 thun, amăng tal jơnum lok blung a anai mơtam ƀuh rơđah sa tơlơi gir run prong biă mă mơ̆ng khua pơ ala mơnuih ƀôn sang dêh čar, kơnuk kơna, djop sang bruă kơnuk kơna; hơmâo tơlơi kiăng yôm biă mă hăng bruă pơđĭ kyar lŏn ia, ngă gêh găl pioh kơ kơnuk kơna, djop sang bruă kơnuk kơna, djop gưl, djop tơring čar tañ pok pơhai ngă tui hơdôm Hră pơtrun jơnum mơ̆ng khua pơ ala mơnuih ƀôn sang dêh čar kah hăng Hră pơtrun Jơnum ping gah dêh čar ta tal XIII.

Khua git gai pơ ala mơnuih ƀôn sang dêh čar ơi Vương Đình Huệ đĭ pơhiăp pơđut jơnum lok sa

Pơčrông sai, pơtong glăi boh tơhnal ngă tui akŏ bruă pơđĭ kyar bơwih ƀong huă mơnuih mơnam, rơnoh prăk kơnuk kơna amăng 6 blan akŏ thun hăng ĕp hơdră pơsir amăng 6 blan rơnuč thun 2021, khua mua pơ ala mnuih ƀôn sang bơni mơ̆n tơlơi gir run mơ̆ng khua mua amăng kơnuk kơna amăng bruă git gai wai lăng, ngă tui dua bruă pơtrun: Ngă bruă pơhlôm, pơgang klin Covid 19 rah, laih dơ̆ng pơtrut bơwih ƀong huă rah, djă hnong pơđĭ kyar, gleng nao djru ngă hơđong tơlơi hơdip mơda mơnuih ƀôn sang, pơgang tơlơi suaih pral ană plơi pla.

Khua pơ ala mơnuih ƀôn sang rơkâo, tơdơi kơ jơnum anai, kơnuk kơna, khua dêh čar kơnuk kơna, djop anom bruă kơnuk kơna ăt khom bơblih phrâo, pơđĭ tui anŏ tŭ yua amăng bruă mă, pơtrut bruă pơpha bruă djop gưl, pơpha tơlơi dưi, jao bruă, nao hrom hăng bruă krăo lăng ngă tui, sem glăi, lir hơbit hăng bruă mă glăm ba, gơgrong kơtang mơ̆ng sang bruă, anom bruă tơpuôl, khul grup mơnuih mơnam mut phung, rĭm čô mơnuih ngă khua, biă mă ñu pô ngă khua phun.

Ơi Vương Đình Huệ, Khua git gai pơ ala mơnuih ƀôn sang dêh čar rơkâo, djop sang bruă mơ̆ng anom bruă khua pơ ala mơnuih ƀôn sang dêh čar, khul grup khua pơ ala mơnuih ƀôn sang dêh čar ƀơi djop tơring čar ăt khom bơblih phrâo bruă mă pơđĭ tui boh tŭ yua lơ̆m bruă mă, kơtưn krăo lăng ăt bơblih phrâo kơtang hloh bruă ngă tui djop Hră pơtrun tal jơnum anai.

“Rơkâo abih bang ƀing pơ ala mơnuih ƀôn sang dêh čar tañ lăi pơthâo hăng mơnuih ruah khua boh tơhnal jơnum tal anai, khom djă bong tơlơi bưp nao rai re se hăng mơnuih ruah khua. Khua pơ ala mơnuih ƀôn sang dêh čar iâu pơthưr mơnuih ƀôn sang, ling tơhan, mơnuih ruah khua amăng dêh čar, djop sang bruă sĭ mơdrô, mơnuih ƀôn sang dêh čar ta dŏ pơ tač rơngiao khom pơđĭ tui yơh gru grua gum pơgôp, djru ba, gum hrom tơlơi khăp pap, ngă hrom, đăo kơnang, dong yua, ngă tui djơ̆ djop jơlan hơdră, tơlơi pơtrun mơ̆ng Ping gah, tơlơi phiăn Kơnuk kơna, pơtum lu hrơi mông, pran jua hăng ai hơtai mă bruă kiăng pơgăn hĭ truh kih klin Covid 19, wai lăng tơlơi hơdip, pran jua, tơlơi rơnuk rơnua hơđong kơ mơnuih ƀôn sang”.

Boh tŭ yua mơ̆ng jơnum lok sa, khua mua pơ ala mơnuih ƀôn sang dêh čar tal XV lĕ sa bruă phun pok pơhai hiam klă kơ sa rơwang bruă pơ anăp phrâo. Kơnang kơ bruă mă tơlơi dưi djơ̆ hăng Phiah phiăn hăng tơlơi dêh čar phiăn pơkă, thâo hluh tong ten hram tơma dơlăm rơđah bruă mă phun, hơdôm anăp ngă bruă prong amăng Tơlơi  pơhiăp git gai ƀơi mông pok jơnum mơ̆ng ơi Nguyễn Phú Trọng Khua git gai Ping gah dêh čar hơmâo lăi, ngă giong klă hơdră mă bruă ngă tui Hră pơtrun ruah khua ping gah dêh čar tal XIII, hăng tơlơi kiăng bơblih phrâo, ngă hlôm bôm, pơđĭ tui gru grua hing ang 75 thun, gah yŭ kơ tơlơi git gai mơ̆ng Ping gah, tơlơi ngă hrom mơ̆ng glông kơđi čar, tơlơi gum pran jua, sa ai hơtai, tơlơi đăo kơnang hăng dong yua mơ̆ng Mơnuih ƀôn sang, mơnuih ruah khua amăng đơ đam dêh čar, mơnuih ƀôn sang ta dŏ pơ dêh čar tač rơngiao laih anun gơyut gơyâo jar kmar, khua pơ ala mơnuih ƀôn sang dêh čar tal XV amra ngă giong hiam klă bruă mă mơ̆ng Ping gah hăng Mơnuih ƀôn sang jao brơi.

Nay Jek: Pơblang