VOV4.Jarai-Hăng mơnuih ngă hmua sang anŏ ƀun rin, bruă dưi čan prăk tuh pơ alin kơ bruă ngă hmua, čem rông hlô mơnong ƀu amuñ ôh, yua kơ gơñu ƀu hơmâo gơnam song mă ngă anŏ gơgrong, tăp năng đang hmua, sang dŏ aka ƀu hơmâo hră ôh pioh ba ngă anŏ gơgrong čan prăk? Hơdôm thun rơgao, Sang bruă prăk djru mơnuih mơnam jing pô djru ba, ngă gêh gal kơ lu sang anŏ dưi čan prăk gơgrong mă anăn, pioh tuh pơ alin ngă hmua pla pơjing, pơđĭ kyar sang anŏ, anun dưi pơklaih mơ̆ng ư̆ rơpa hrŏ ƀiă ƀun rin.

Ơi Trần Đình Ý ba gơmơi nao čuă đang boh táo ñu amăng sang dăng hñôl. Ơi Ý pioh mơkrah đang sang 8000 mét karê pioh ngă sang hñôl pla boh táo. Boh táo pla amăng đang ngă sang hăng hñôl huăi hlăt ƀong arong aruač pơčram ôh, yua kơ anun ƀu tơguan pruih hăng ia jrao pơdjai hlăt. Tơlơi anai, phun boh troh ñu mơboh lu hloh, hyu sĭ mơdrô boh troh ăt amuñ mơ̆n arăng blơi.

Ơi Ý brơi thâo, thun hlâo lơ̆m sa phun boh táo ñu pĕ pơhrui 100 kg, ƀing sĭ mơdrô nao blơi hăng rơnoh mơ̆ng 20 rơbâo truh 25 rơbâo prăk sa kg. Laih pơhlưh hĭ prăk tuh pơ alin mă bruă, sa phun boh táo ñu hơmâo kơmlai 1 klăk prăk ta juăt lăi sa triê̆u. Dưi hơmâo đang boh táo djơh hăng anai lĕ yua mơ̆ng rơnoh prăk čan Sang bruă prăk djru mơnuih mơnam tơring glông Ƀuôn Đôn. Hrom hăng đang boh táo ñu, ơi Ý dŏ hơmâo prăk pla boh kruăi dung klĭ, kơđuh mơtah, pla kơphê hăng pla tiu dơ̆ng, prăk pơhrui glăi sa thun giăm 100 klăk prăk, anun yơh pơklaih mơ̆ng sang anŏ hơmâo anăn ƀun rin.

Hơdôm rơbâo sang anŏ mơnuih djuai ƀiă ƀun rin dưi čan prăk

pơđĭ kyar bơwih ƀong huă

Ơi Ý man pơdong sang prong kjăp laih, ăt dưi blơi măi komputer brơi kơ ană đah kơmơi ñu mut hrăm anih 6, hrăm mơ̆ng ataih lăng amăng plang internet đôč. Ơi Ý lăi: Mah aka pơdrong ôh, samơ̆ tơlơi hơdip mơda sang anŏ ñu dưi hơmâo kah hăng ră anai lĕ ñu aka ƀu khin pơmin nao ôh, lơ̆m phrâo akŏ pơdong bruă mă hơdip mơda pơ plơi Êa Mdhar, să Êa Ñuôl, tơring glông Ƀuôn Đôn:

“Dưi tŭ mă tơlơi djru čan prăk mơ̆ng sang bruă prăk djru mơnuih mơnam lĕ ăt mơ̆ng lu rơnoh prăk čan amăng kơnuk kơna mơ̆n kah hăng brơi djru ngă sang, đang añăm dăng hơñôl pioh pla boh táo, pla añăm pơtam. Truh ră anai, boh tơhnal tŭ yua lu biă mă. Kơnong amăng sa thun đôč kâo dưi tla prăk čan mơ̆ng sang bruă prăk djru mơnuih mơnam hơmâo prăk čan mơ̆ng blung a. Kâo pla 4 thun hăng anai laih, yap sa phun pơhrui glăi sa klăk prăk sa thun”.

Ơi Đào Danh Canh, khua grup brơi čan prăk plơi Êa Mdhar 3, să Êa Ñuôl brơi thâo rơnoh prăk gơgrong anăn brơi čan hơmâo 40 čô ngă ding kơna čan prăk. Gơñu lĕ sang anŏ ƀun rin soh, giăm ƀun rin ƀu hơmâo dram gơnam pioh gơgrong ôh, anun tơdah kiăng čan prăk sang bruă pơkŏn tơnap biă mă.

Lu sang anŏ pơklaih mơ̆ng ư̆ rơpa yua hơmâo prăk čan čem rông hlô mơnong, ngă hmua pla pơjing

Hơdôm thun laih rơgao yua hơmâo prăk čan mơ̆ng kơnuk kơna, lu sang anŏ anai dưi găn rơgao hĭ tơlơi tơnap tap pơklaih mơ̆ng tơlơi ƀun rin. Amăng 40 boh sang anŏ čan prăk anun, ră anai hơmâo laih 4 boh sang anŏ dưi pơklaih mơ̆ng tơlơi ư̆ rơpa, gơñu tla abih laih prăk čan.

"Ană plơi pla gơmơi dưi čan prăk pioh tuh pơ alin amăng bruă pla kơphê hăng tiu, rông rơmô hăng bê tŭ yua biă mă. Mơnuih ƀôn sang dưi pơklaih mơ̆ng ƀun rin, hơdôm sang anŏ dưi tla prăk čan hăng kơmlai kơ sang bruă prăk djru mơnuih mơnam”.

Amai H’Ly Kƀuôr, dŏ pơ ƀôn Kŏ Êđŭng A, thun anai 31 thun, dŏ rơkơi bơnaiơ giăm 10 thun hăng anai laih samơ̆ yua kơƀah lŏn ngă hmua anun yơh tơlơi hơdip mơda rơkơi bơnai ñu tơnap tap biă mă, sang dŏ ƀu hơmâo. Sui mơ̆ng anai, 5 thun pơ klôn adih, gơñu čan 30 klăk prăk mơ̆ng sang bruă prăk djru mơnuih mơnam, amai H’Ly dưi blơi pơjeh kơphê ba glăi pla hăng blơi 2 drơi rơmô rông. Ră anai, khă sang anŏ ăt tơnap tap hai samơ̆ pơkă hăng hlâo kơ anun plai ƀiă laih, sang anŏ huăi kơƀah đơi dơ̆ng tah.

“Ră anai, sang anŏ gơmơi hơmâo 8 drơi rơmô, kâo sĭ hĭ 3 drơi laih, ăt dưi hơmâo 23 klăk prăk laih anun ră anai dŏ 5 drơi. Bơni kơ Ping gah, kơnuk kơna ngă gêh găl kơ gơmơi dưi čan prăk pơđĭ kyar bơwih ƀong huă hăng hơmâo tơlơi hơdip mơda đĭ đăi hloh”.

Yă H’Ñat Ƀuôn Yă (Ƀyă) khua grup čan prăk Ƀôn Kŏ Êđŭng A brơi thâo: grup gơñu hơmâo 70 ding kơna. Abih bang grup čan prăk dưi mă yua rơnoh prăk čan djơ̆ hơdră soh, kah hăng blơi kmơ̆k, hơbâo pruai kơ phun pla, blơi rơmô pioh rông. Aka ƀu hơmâo pô hlơi tla prăk kaih ôh, kơmlai ăt tla rĭm blan mơ̆n.

“Ră anai, mơnuih ƀôn sang grup gơmơi dưi čan prăk mơ̆ng sang bruă prăk djru mơnuih mơnam, kơnuk kơna ngă gêh gal hăng brơi čan prăk blơi rơmô, blơi bui rông, pla kơphê. Sa boh sang anŏ čan prăk dưi blơi rông mơ̆ng 3-4 drơi rơmô, gơñu gir run rông hăng čan dơ̆ng prăk djru mơnuih mơnam pioh pơđĭ kyar bơwih ƀong huă. Čang rơmang pơ anăp anai, kơnuk kơna amra ngă gêh gal hăng brơi čan prăk lu hloh pioh kơ mơnuih ƀôn sang hơmâo prăk tuh pơ alin, lui rơmŏn akŏn run”.

Ơi Võ Khắc Huy, khua sang bruă prăk djru mơnuih mơnam tơring glông Ƀuôn Đôn brơi thâo: Ră anai, hơmâo 9.480 boh sang anŏ, amăng anun 4.900 boh sang anŏ mơnuih djuai ƀiă, dưi čan prăk hăng rơnoh prăk 342 klai. Abih bang ƀing kaih tla prăk laih anun jing ƀing dong hnưh sat samơ̆ gơñu yua tơlơi truh lŏn adai ngă, răm đang hmua hăng klin kheng.

“Sang bruă prăk djru mơnuih mơnam hơmâo lu hơdră laih brơi kơ tuai čan hăng pơhlưh hnưh čan, tơguan truh bơyan hmua pơdai dơ̆ng tla glăi prăk. Tơdah yua mơ̆ng hơmâo tơlơi truh pơhlưh ƀiă tla hnưh tui tơlơi pơtrun mơ̆ng kơnuk kơna. Rơngiao kơ anun rơkâo kơ sang bruă prăk djru dơ̆ng rơnoh prăk čan yua tơlơi tơnap tap ră anai, mơnuih ƀôn sang kiăng biă mă prăk tuh pơ alin bơwih ƀong huă”.

            Nay Jek: Pơblang