VOV4.Jarai -  Thun hrăm phrâo 2021-2022 giăm truh laih. Khă hnun hai, bơhmu hăng rơnoh mrô nai pơtô lĕ, Gơnong bruă pơtô pơhrăm tơring čar Gialai ăt glăk kơƀah mơn 3.721 čô nai hơdôm gưl. Rơđah biă ñu, tui hăng mrô yap mơng Gơnong bruă pơtô pơhrăm tơring čar Gialai, bơhmu hăng rơnoh pơkă, thun hrăm 2021-2022 anai, tơring car glăk kơƀah 1.637 čô nai pơtô gah čơđai anet; 986 čô nai ƀơi gưl 1; 726 čô nai gah gưl 2 hăng 372 čô nai gah gưl 3.

Biă ñu, mơng thun hrăm 2021-2022, ngă tui jơlan hơdră pơtô pơhrăm phrâo, gưl čơđai anet hăng gưl sa khom hrăm mơguah čơtlăm sa hrơi anun bruă pơhrua nao nai pơtô kiăng pơhlôm klă bruă pơtô pơhrăm jing tơlơi kiăng biă. Ƀơi anăp tơlơi anai, Jơnum min mơnuih ƀôn sang tơring čar Gialai hmâo laih hră mơ-ĭt kơ sa dua ding jum, gơnong bruă bơdjơ̆ nao, rơkâo brơi tơring čar ruah nai pơtô, kĭ pơkôl, kiăng đĭ tui mrô nai pơtô, pơhlôm klă bruă pơtô hăng pơhrăm; hrom hăng anun pơdơi jăng jai tơlơi hrŏ trun nai pơtô sit djơ̆ hăng hơdră pơkă gơnong bruă pơtô pơhrăm./.

Siu H’ Prăk: Pô pơblang