VOV4.Jarai-Ƀrô djơ̆ Tết Trung thu Blan bơrơmi ria, mơguah lơ 20/9, khul tơdăm dra mut phung rơnuk HCM dêh čar, Khul hlăk mut phung Việt Nam hăng Khul ơi ia jrao hlăk ai Việt Nam nao ƀơk gơnam kơ anom bruă tơdăm dra mut phung Hà Nội hăng Khul ơi ia jrao hlăk ai Hà Nội 1 rơbâo 500 anung ƀañ trung thu mơ-it kơ ƀing ơi ia jrao, nai ia jrao dŏ mă bruă pơgang klin hăng 100 hruh ia jrao F0, bơwih brơi bruă pơjrao mơnuih duăm ruă ƀă Covid ƀơi Hà Nội.

Mơ̆ng lơ 12-20/9, ƀing khua mua khul tơdăm dra mut phung rơnuk HCM dêh čar, Khul hlăk ai mut phung Việt Nam hăng ƀing ngă bruă pơyơr pran jua hơmâo pơkra 12 robâo tơlô̆ ƀañ trung thu pioh ƀơk kơ ƀing ơi ia jrao, nai ia jrao dŏ mă bruă pơ anăp pơgang klin.

Lăp gleng nao, amăng rơwang hrơi tơjuh rơgao, ƀơi ƀôn prong HCM, Khul ơi ia jrao hlăk ai Việt Nam nao ƀơk 3000 hruh ia jrao F0 hăng ƀañ trung thu brơi kơ mơnuih ƀă covid 19 dŏ pơjrao pơ sang anŏ, rơnoh prăk giăm 800 rơbâo prăk sa anung. Khul ơi ia jrao hlăk ai Việt Nam ăt djru dơ̆ng 50 čô ơi ia jrao, nai ia jrao pơgang klin ba gru hlâo, sang anŏ tơnap tap, rĭm čô 10 klăk prăk, amăng anun Hà Nội hơmâo 10 čô ơi ia jrao, nai ia jrao.

Nay Jek: Pơblang