VOV4.Jarai - Khua dêh čar phrâo hơmâo hră pơsit mă yua braih pơđom lui amăng Dêh čar brơi kơ hơdôm boh tơring čar Bình Phước, Bạc Liêu, Sóc Trăng djru ba mơnuih ƀon sang tơnap tap yua klin Covid-19 ngă. Mrô braih hơmâo brơi lĕ rơbêh 4.117 tơn. Tơlơi pơtrun lăi rơđah: Kiăo tui tơlơi rơkâo mơng Ding jum mơnuih mă bruă - tơhan rơka hăng mơnuih mơnam, Ding jum prăk kăk, tom brơi lơ 16/8, Khua dêh čar hơmâo tơlơi pơtrun kơ Ding jum prăk kăk brơi rơbêh 4.117 tơn braih mă mơng braih pơđom lui amăng Dêh čar brơi kơ tơring čar Bình Phước, Bạc Liêu, Sóc Trăng djru ba mơnuih tơnap tap yua klin Covid-19. Tui anun, tơring čar Bình Phước hơmâo mă 559 tơn, Bạc Liêu hơmâo mă rơbêh 636 tơn hăng tơring čar Sóc Trăng hơmâo rơbêh 2.921 tơn braih. Khua dêh čar jao kơ Ding jum Mơnuih mă bruă - Tơhan rơka hăng Mơnuih mơnam, Ding jum prăk kăk ngă bruă tui tơlơi pơtrun, lăi pơthâo rơđah tơlơi djru anai hăng čih pioh hră pơ-ar.

Siu H’Mai: Pơblang