VOV4.Jarai - Mơguah lơ 9/12, ƀơi Hà Nội, Anom wai lăng bruă sĭ mơdrô hăng măi mok Việt Nam gum hrom hăng Khul anom bơwih ƀong yua kơ tơlơi pơđĭ kyar kơjăp Việt Nam pơphun ngă Lơphet lăi pơthâo Anom bơwih ƀong kơjăp ƀơi Việt Nam. Kơ-iăng Khua dêh čar ta ơi Vũ Đức Đam, Khua Khul pơđĭ kyar kơjăp hăng pơđĭ dlông bôh thâo bơkơtưn, git gai hơdôm Ding jum gơnong bruă, git gai hơdôm khul grŭp Jar kơmar ƀơi Việt Nam gum hrom. Hăng anăn ñu “Anăp nao 10 rơnuk thun pơđĭ kyar kơjăp klă hiam hloh: ƀu pioh hlơi lui lơi gah tlôn”, ƀing khua pơ ala đing nao bơkơtuai kơ hơdră bruă hăng kơčăo bruă đĭ kyar, bruă mă mơng lŏn ia pioh kơ pơđĭ kyar hơdjă rơwang 2021-2030, pơplih phrâo nao hrom dua mơta pơđĭ kyar tañ hăng kơjăp amăng 10 rơnuk thun phrâo. Pơhiăp amăng mông Bơkơtuai, Kơ-iăng Khua dêh čar ta ơi Vũ Đức Đam čang rơmang, hơdôm bôh anom gum hrom ngă tui dong hơdôm tơlơi pơplih khă anet hai yua kơ tơlơi pơđĭ kyar kơjăp phik. Kơ-iăng Khua dêh čar ta ơi Vũ Đức Đam lăi rơđah: Amăng klin Covid-19 ngă, ƀơi Việt Nam ăt kah hăng hơdôm bôh dêh čar brơi ƀuh rim mơnuih ƀôn sang, rim anom bơwih ƀong hmâo pơkrem, hmâo djă pioh, amra jing pran kơtang djru ngă juăt hăng pơgi kơdih anai./.

Siu H’ Prăk: Pơblang