VOV4.Jarai - Anom kơsem min bruă pơtôm hiăp gum hrom hăng Ƀirô anih jưh pơ ala kơ dêh čar Thái Lan ƀơi Hà Nội hăng Ƀirô anih jưh pơ ala kơ Việt Nam ƀơi Băng Čốc pơphun Bơkơtuai hơdor glăi 45 thun pơdŏng tơlơi rô nao rai pơtom hiăp Việt Nam hăng Thái Lan (6/8/1976 – 6/8/2021). Bơkơtuai dưi pơphun tui hơdră lăng nao rai mơng ataih hăng pơdah tui tlôn amăng plăng facebook kiăng lăi pơthâo kơ tơlơi rô nao rai Việt Nam – Thái Lan truh lu mơnuih lăng. Pơhiăp amăng mông pok phun Bơkơtuai, Khua anih jưh pơ ala kơ Việt Nam ƀơi Thái Lan Phan Chí Thành pơsit gru phun hơdor glăi 45 thun le\ hrơi blan yôm phăn pioh dua bôh dêh čar gum hrom lăng glăi hơdôm bôh than hmâo ngă hăng anăp nao truh pơgi kơdih anai. Hăng mông bơkơtuai tơpă ară hăng mơ-ak klă, bruă Bơkơtuai ƀu djơ̆ kơnong kơ mông bơkơtuai pioh lăi pơthâo hơdôm pran jua giăng mah klă hiam kơplah wah dua bôh dêh čar amăng 45 thun rơgao ôh mơ̆, ñu dô̆ pơsit pran ngă dơlăm hloh dong bruă gum hrom kơtưn đĭ Việt Nam hăng Thái Lan. Hơdôm tơlơi pơtrut pơsur hơdră bruă dưi lăi đĭ amăng mông Bơkơtuai hmâo pok tơbiă lu tơlơi pơmin, pơčeh phrâo kơ hơdôm bruă gum hrom sit nik kơplah wah dua bôh dêh čar pơgi kơdih anai./.

Siu H’ Prăk: Pô pơblang