VOV4.Jarai -  Ƀrô djơ̆ tal hơdor glăi 76 thun bruă Hơkrŭ blan 8 (19/8) hăng hrơi pơdŏng Lŏn ia lơ 2/9 (1945-2021), mơguah lơ 31/8, Anom kơsem min Hồ Chí Minh hăng ƀing khua mua mơng Ping gah (Anom pơtô bruă kơđi čar Hồ Chí Minh) gum hrom hăng Kual djă pioh gru grua Khua mir sir Hồ Chí Minh ƀơi Anih mă bruă Khua mir sir pơphun Bơkơtuai bôh thâo phrâo tui hơdră lăng nao rai mơng ataih hăng anăn ñu: “Khua mir sir Hồ Chí Minh hăng tơlơi čang rơmang rơngai – dưi pô – yâu mơ-ak”. Ha rơnuk mơng Ñu, Khua mir sir Hồ Chí Minh hmâo gir run hrưn đĭ, pơsăn drơi yua kơ hơdôm tơhnal pơkă, nua yôm mơng djuai ania hăng ană mơnuih, amăng anun biă ñu lĕ tơlơi čang rơmang rơngai, dưi pô, yâu mơ-ak. Amăng mông bơkơtuai, Kơ-iăng nai tha prin, nai prin tha Lê Văn Lợi, Kơ-iăng Khua Anom pơtô bruă kơđi čar Hồ Chí Minh lăi rơđah, ră anai, abih bang Ping gah abih bang mơnuih ƀôn sang abih bang ling tơhan glăk run pran pok pơhai ngă tui Tơlơi pơtrun pơsit Jơnum tal 13 mơng Ping gah, pơtrut kơtang bruă pơsur hrăm, ngă tui tơlơi pơmin, pran jua hăng kơnuih Hồ Chí Minh, ngă tui hơdôm bruă khŏp kiăng pơgăn, kơdun hĭ klin Covid-19, pơgang tơlơi suaih pral mơnuih ƀôn sang./.

Siu H’ Prăk: Pô pơblang