VOV4.Jarai - Tom brơi (6/8) pơphun Bơkơtuai lăng nao rai mơng ataih lăi pơthâo nao rai tơlơi pơhing hăng tơlơi găn rơgao kơplah wah Ping gah Cộng sản Việt Nam hăng Ping gah Cộng sản dêh čar Chile. Ơi Lê Hoài Trung, Ding kơna Ping gah dêh čar, Khua Grŭp pơtom hiăp mơng Ping gah dêh čar hăng ơi Cờ-lau-đi-ô đê Nê-gờ-ri (Claudio de Negri), Khua git gai Ping gah, Khua Grup pơtom hiăp Ping gah Cộng sản Chile hmâo gum hrom git gai mông bơkơtuai. Amăng mông bơkơtuai, ơi Lê Hoài Trung lăi rơđah Ping gah dêh čar Việt Nam lăng yôm na nao, čang rơmang pơtrut hăng ngă dơlăm hloh dong tơlơi gum hrom hơbit, giăng mah mơng hlâo klă hiam hăng Ping gah dêh čar Chile. Amăng rơwang bơkơtuai, ƀing khua pơ ala mơng dua ping gah hmâo pơdah hơdôm tơlơi lăi pơthâo kơ anô̆ găn rơgao bruă pơdŏng ping gah, ngă tui tơpă; tơlơi găn rơgao amăng pơđĭ kyar bơwih ƀong – mơnuih mnam hăng mut hrom jar kơmar amăng hơdôm hrơi anai; ba tơbiă hơdôm bruă rơđah rơđông kiăng pơtrut hloh dong bruă gum hrom kơplah wah dua Ping gah, dua bôh dêh čar pơ̆ anăp anai./.

Siu H’ Prăk: Pô pơblang