VOV4.Jarai - Dŏng amăng hơdôm tơlơi anăp nao Hrơi Sang anô̆ Việt Nam, mơguah anai (28/6), Khul pơlir hơbit Đah kơmơi dêh čar Việt Nam gum hrom hăng Anom kơsem min Sang anô̆ hăng bơnai hăng rơkơi, Anom kơsem min bôh thâo phrâo mơnuih mơnam Việt Nam pơphun mông Bơkơtuai bôh thâo phrâo lŏn ia “Ba Tơlơi pơtrun pơsit Jơnum tal 13 mơng Ping gah mut amăng tơlơi hơdip mơda: Pơpŭ bôh yôm Sang anô̆ Việt Nam – Thâo krăn hăng jơlan gah pơsir”. Amăng mông bơkơtuai, mơnuih pơ ala hơdôm Ding jum, Gơnong bruă, ƀing kơhnâu gah bruă sang anô̆ hăng bơnai hăng rơkơi bơkơtuai hơdôm bôh tơhnal kơsem min bôh thâo phrâo hăng tơlơi găn rơgao amăng hơdôm bôh yôm sang anô̆ Việt Nam; kơsem min črâo tơbiă hơdôm nua yôm sang anô̆ phun ñu, djơ̆ hăng tơlơi čang rơmang mơng đah kơmơi ăt kah hăng djơ̆ tui bruă mă, bruă jao mơng Khul pơlir hơbit đah kơmơi Việt Nam. Hrom hăng anun, ba tơbiă, lăi pơthâo kơ hơdôm bruă, bruă pơsur kơ sang anô̆ hăng hơdôm tơhnal ba tơbiă rơđah djơ̆ hloh kiăng pok pơhai pơ̆ anăp anai. Bruă bơkơtuai dưi pơphun tui hơdră lăng nao rai amăng tivi ƀơi anih tô hyu pơ̆ Hà Nội hăng pơdah hyu đơ đam dêh čar tui glông SureMeet./.              

Siu H’ Prăk: Pô pơblang