VOV4.Jarai - Ƀơi Sang mă bruă Khua pơ ala mơnuih ƀôn sang, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng Khua git gai wai lăng pơ ala mơnuih ƀôn sang dêh čar Lao ơi Xay-xổm-phon Phôm-vi-hản hmâo gum hrom git gai mông Bơkơtuai tơlơi găn rơgao bruă kơplah wah Khua pơ ala mơnuih ƀôn sang dêh čar Việt Nam hăng Khua pơ ala mơnuih ƀôn sang dêh čar Lao. Mông bơkơtuai lĕ bruă mă rơđah pơplih phrâo hơdôm bruă gum hrom, lăi pơthâo nao rai tơlơi găn rơgao kơplah wah Khua pơ ala mơnuih ƀôn sang dua bôh dêh čar amăng bruă pơdŏng phiăn, lăng tui, pơsit hơdôm tơlơi yôm phăn mơng lŏn ia. Amăng rơwang bruă phrâo rơgao, Khua pơ ala mơnuih ƀôn sang dua bôh dêh čar hmâo pơphun 8 mông Bơkơtuai amăng anun hmâo 4 mơta tơlơi Bơkơtuai yua kơ Khua git gai wai lăng pơ ala mơnuih ƀôn sang dua bôh dêh čar git gai. Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi lĕ, rơgao hơdôm mông Bơkơtuai, Khua pơ ala mơnuih ƀôn sang dua bôh dêh čar hmâo lăi pơthâo laih lu tơlơi găn rơgao yôm phăn amăng hơdôm bruă mă. Tô̆ tui truh kih anai, bruă Bơkơtuai tơlơi găn rơgao bruă mă kơplah wah Khua pơ ala mơnuih ƀôn sang Việt Nam hăng Lao đing nao bơkơtuai kơ bruă tơña hăng lăi glăi tơlơi tơña amăng tal jơnum Khua pơ ala mơnuih ƀôn sang Việt Nam hăng tơlơi găn rơgao mơng Khua pơ ala mơnuih ƀôn sang Việt Nam amăng bruă pel ĕp, pơsit hơdôm rơwang bruă yôm phăn lŏn ia hmâo bôh tŭ yua hăng tơlơi pơđĭ kyar bơwih ƀong – mơnuih mơnam mơng lŏn ia./.

Siu H’ Prăk: Pơblang