VOV4.Jarai - Jơnum min bôh thâo hăng pơtô pơhrăm mơng Khua pơ ala mơnuih ƀôn sang dêh čar ta phrâo gum hrom hăng Ding jum bôh thâo bơkơjăp drơi jăn hăng tuai čuă ngui dêh čar hăng tơring čar Nghệ An pơphun Bơkơtuai “Tuai čuă ngui Việt Nam – hơkrŭ glăi hăng pơđĭ kyar”. Pơhiăp črâo ba bruă bơkơtuai, Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn pơsit, pơđĭ kyar gơnong bruă tuai čuă ngui lĕ sa hơdră pơtrun prong mơng Ping gah, Kơnuk kơna ta.

Klin Covid-19 sui 2 thun hmâo bơdjơ̆ nao prong biă tơlơi pơđĭ kyar bơwih ƀong – mơnuih mơnam mơng lŏn ia, amăng anun hmâo gơnong bruă tuai čuă ngui. Yua bơdjơ̆ nao mơng klin ruă, truh ră anai, dêh čar ta akă hmâo čơkă tuai mơng dêh čar tač rơngiao, tuai hyu čuă ngui amăng lŏn ia hrŏ trun dong rơbêh kơ 42% bơhmu hăng thun hlâo; abih bang pơhrui mơng tuai čuă ngui hrŏ trun giăm truh 50%. Bruă bơkơtuai ngă rơđah hloh dong tơlơi rô nao rai mơng Jơlan hơdră hơkrŭ glăi bơwih ƀong – mơnuih mơnam hrom mơng đơ đam dêh čar hăng hơdôm jơlan hơdră, kơčăo bruă, pơsit jơlan gah hơkrŭ glăi, pơđĭ kyar tuai čuă ngui; rơkâo hơdôm jơlan gah, hơdră bruă, biă ñu hơdôm hơdră bruă kơ pơhlôm pơgang pơgăn klin kiăng pok bah amăng pơhlôm; hơdôm hơdră bruă pơđĭ tui bôh thâo bơkơtưn mơng bruă wai lăng tuai čuă ngui Việt Nam amăng hơdôm tơlơi hơđong phrâo./.

Siu H’ Prăk: Pơblang