VOV4.Jarai-Mơguah lơ 20/12, Jơnum min wai lăng djop djuai ania mơnuih mơnam Việt Nam ƀôn prong Hồ Chí Minh pơphun tŭ mă gơnam djru Keh prăk Yua kơ mơnuih ƀun rin mơ̆ng anom bruă, sang bruă sĭ mơdrô, mơnuih hơmâo pran jua čơmah djru kơ mơnuih ƀun rin čơkă tết Nhâm Dần 2022.

Ƀôn prong Hồ Chí Minh tŭ mă 56 klai prăk djru mơnuih ƀun rin ƀong têt

Ngă tui tơlơi jak iâu mơ̆ng jơnum min djop djuai ania mơnuih mơnam Việt Nam ƀôn prong Hồ Chí Minh, lu anom bruă anet hăng man ƀrô, pok glăi bah amăng, pơphun glăi mă bruă pơkra ming sĭ mơdrô tơdơi kơ pơdơi yua klin kheng samơ̆ ăt hur har djru hrom prăk kăk Keh prăk djru mơnuih ƀun rin.

Ƀơi mông jơnum, Jơnum min djop djuai ania mơnuih mơnam Việt Nam ƀôn prong hơmâo tŭ mă rơnoh prăk giăm 56 klai mơ̆ng dua čô mơnuih ngă pô hăng 20 boh sang bruă sĭ mơdrô. Mơ̆ng rơnoh prăk anai, Jơnum min djop djuai ania mơnuih mơnam Việt Nam ƀôn prong Hồ Chí Minh amra ba yua djru kơ mơnuih ƀun rin tơnap tap čơkă thun phrâo ƀong tết Nhâm Dần, biă mă djru kơ mơnuih djuai ƀiă, sang anŏ tơnap tap, giăm ƀun rin, mơnuih tha rơma hyiăl amăl, čơđai muai drit druai yua Covid 19 ngă hăng rơnoh prăk djru 1 klăk prăk.

Nay Jek: Pơblang