VOV4.Jarai -  Amăng lơ 14/10, Trung đoàn Gia Định – Anom pơtrun bruă ling tơhan ƀôn prong Hồ Chí Minh hăng Jơnum min mơnuih ƀôn sang sa dua bôh quận, tơring glông mơng ƀôn prong hmâo pơphun hơdor tơngiă, ba khul glăi pơ̆ anih pô mă bruă, ơi ia jrao ling tơhan mơng hơdôm tơring čar, ƀôn prong hmâo gum hrom djru ƀôn prong pơgăng klin Covid-19.

Giăm hmâo 2 blan rơgao, rơbêh kơ 300 čô mơnuih mơng Anom pơtô bruă ia jrao ling tơhan lom dưi iâu nao mă bruă mơng Hà Nội nao pơ̆ ƀôn prong Hồ Chí Minh kiăng djru pơgang pơgăn klin Covid-19. Ră anai pơwot glăi puih kơđông, tô̆ tui dong bruă pơhrăm, lu ling tơhan hlăk ai ƀu dưi dŏp tơlơi mơ-ak mut nao hrom tơlơi ƀu her đuăi mơng ƀôn prong. Ăt amăng lơ 14/10 mơn, Jơnum min mơnuih ƀôn sang quận 1 hăng quận 5 hmâo gum hrom hăng Sang bruă wai lăng tuai čuă ngui Ảnh Việt hăng Sang djă pioh gru grua blah ngă pơphun bruă hơdor tơngia hơdôm khul ling tơhan hmâo djru laih pơgang pơgăn klin ƀơi ƀôn prong amăng hơdôm hrơi rơgao. Tơdơi giăm hmâo 2 blan dưi iâu nao gum djru amăng ƀôn prong Hồ Chí Minh pơgang pơgăn klin Covid-19, hơdôm bôh puih kơđông gah Ding jum khul ling tơhan dêh čar ta amra iâu glăi ling tơhan ƀơ ƀrư̆ lom ƀôn prong Hồ Chí Minh yak mut rơwang “hơđong phrâo”./.

Siu H’ Prăk: Pô pơblang