VOV4.Jarai - Dong mơng lơ 1/7 truh ră anai, hơnong ñu rim hrơi ƀôn prong Hồ Chí Minh čih pioh hmâo 1.305 čô mơnuih ƀă kơman, abih bang amăng anih dô̆ čơlah, guang dar. Khă hnun hai, gơnong bruă ia jrao ăt hmâo mơn lu mơnuih ƀă kơman tui jơlan pơčrang lăng ƀơi plơi pla hăng rơgao kơ pel ĕp ƀơi Sang ia jrao. Ră anai, ƀôn prong Hồ Chí Minh hmâo giăm truh 250 čô mơnuih glăk suă jua hăng măi hăng 7 čô kiăng yua ECMO. Gah bruă dô̆ čơlah, rơngiao kơ kual dô̆ čơlah hơbit F1 hmâo laih, ƀôn prong Hồ Chí Minh pơdŏng dong 88 kual dô̆ čơlah hăng rơnoh 10.000 bôh sưng hăng 55 bôh sang jưh tuai hăng rơnoh dưi čơkă 4000 čô mơnuih pioh dô̆ čơlah F1. Jơnum min mơnuih ƀôn sang ƀôn prong mă yua hră pơ-ar kơ bruă pơdơi jăn jai hơdôm bruă mă mơng hơdôm anom bơwih ƀong ƀu pơhlôm tơlơi kiăng pơgang pơgăn klin mơng lơ 15/7. Ră anai hmâo 216 bôh anom bơwih ƀong ngă hră bơwih ƀong dô̆ čơlah rah hăng ngă rai gơnam tam rah, amăng anun 205 bôh anom glăk pok pơhai./.

Siu H’ Prăk: Pô pơblang