VOV4.Jarai-Gơnong bruă ia jrao ƀôn prong Hồ Chí Minh brơi thâo, mơguah lơ 9/8, ƀôn prong Hồ Chí Minh dưi hơmâo Ding jum ia jrao djru dơ̆ng 600.000 liêu vaccine AstraZeneca. Giong tŭ mă ia jrao anai, ƀôn prong pơpha pơ djop kuân, tơring glông, plơi prong Thủ Đức ba nao tlâ̆o pơgang kơ ană plơi pla.

Yap mơ̆ng lơ 22/7 truh abih lơ 8/8, ƀôn prong Hồ Chí Minh hơmâo tlâ̆o brơi kơ 2 klăk 300 rơbâo liêu. Amăng blan 8 anai, tơdah djop ia jrao vaccine, ƀôn prong Hồ Chí Minh amra dưi tlâ̆o djop kơ mơnuih ƀôn sang mơ̆ng 70-80% mrô mơnuih mơ̆ng 18 thun pơngŏ.

Pơdjơ̆ nao kơ bruă tlâ̆o pơgang vaccine, ƀôn prong Hồ Chí Minh brơi thâo, phrâo pơtrun hiăp kơ djop sang ia jrao, anom bruă ia jrao tơring glông, djop anih tlâ̆o ia jrao pơgang ngă gêh găl kơ mơnuih ƀôn sang nao tlâ̆o pơgang; pơkă ĕp lăng tong ten djơ̆ phung dưi tlâ̆o hlong tlâ̆o djop, ƀu dưi pơhrơ̆i ôh, ƀing khom pơhrơ̆i ăt pơblang rơđah yua hơgĕt aka ƀu dưi samơ̆ ƀiă hrơi đôč hơdôm ƀing hlăk dŏ yua ia jrao pơkŏn ƀudah duăm ruă kơtang.

Nay Jek: Pơblang