VOV4.Jarai - Jơnum min mơnuih ƀon sang ƀon prong Hồ Chí Minh phrâo ngă hră mơ-it tañ kơ Ding jum ia jrao lăi pơthâo bruă blơi vaccine pơgang klin Covid-19 mơng bon prong, tong ten ñu bruă blơi 5 klăk liêu vaccine Moderna. Tui anun, Jơnum min mơnuih ƀon sang ƀon prong Hồ Chí Minh kiăng Ding jum ia jrao brơi kơnuk kơna hăng mơnuih ƀon sang ngă hrŏm, mă prăk tlâ̆o vaccine. Kơ bruă pơčrông sai hăng blơi vaccine Moderna, tơdơi kơ hơmâo Kơ-iăng khua dêh čar ơi Vũ Đức Đam tŭ ư amăng lơ 15/6/2021 kơ bruă blơi vaccine; Jơnum min mơnuih ƀon sang ƀon prong Hồ Chí Minh hơmâo jao kơ Kông ti Sapharco bơkơtuai, pơčrông sai, kĭ hră blơi vaccine pơgang covid-19. Tui anun, Kông ti Sapharco hơmâo kĭ pơkôl hră pơ-ar kơ bruă ba sĭ vaccine Moderna pơgang Covid-19. Truh mông anai, Kông ti Sapharco glăk tơguăn pô pơ ala mơng Moderna jao glăi hră pơkôl blơi 5 klăk liêu vaccine Moderna. Kiăng pơhlôm bruă hơmâo yua vaccine hăng pơtrut iâu pơthưr mơnuih ƀon sang djru blơi, Jơnum min mơnuih ƀon sang ƀon prong rơkâo kiăng Ding jum ia jrao hơmâo hră brơi Kông ti VinaCapital dưi ngă hrŏm hăng kơnuk kơna, pơphun mă prăk tlâ̆o vaccine tui hơdră “blơi 5 liêu vaccine amra brơi đôč kơ mơnuih ƀon sang 2 liêu”.

Siu H’Mai: Pơblang