VOV4.Jarai - Lăi pơthâo hăng Kơ-iăng khua dêh čar ta ơi Trương Hòa Bình amăng mông jơnum mơguah lơ 1/6, Khua Jơnum min mơnuih ƀon sang ƀôn prong Hồ Chí Minh ơi Nguyễn Thành Phong brơi thâo, ƀơi anăp kơ tơlơi tơnap tap yua kơ klin lar hyu ƀơi hơdôm sang măi pơkra pơjing, pơ anăp anai ƀon prong amra pok sa, dua boh sang măi pơkra pơjing gơnam tam samơ̆ ăt guang dar pioh pơgang klin rah kiăng ngă hiưm pă ƀu brơi klin lar hyu. Ƀôn prong ăt mă yua rơnoh prăk djru tal 2 brơi hơdôm anom bơwih ƀong sĭ mơdrô bơbeč nao kơtang mơng klin Covid-19. Ră anai, ƀôn prong Hồ Chí Minh hơmâo 3 čô mơnuih mă bruă ƀơi 3 boh sang măi ƀă klin anun lĕ: Kual sang măi Tân Bình, Sang măi Tây Bắc Củ Chi, Sang măi Vĩnh Lộc - Hooc Môn.

Tui hăng ơi Nguyễn Thành Phong, Khua Jơnum min mơnuih ƀon sang ƀôn prong Hồ Chí Minh, ƀơi anăp kơ tơlơi tơnap tap mơng klin, sa amăng hơdôm bruă kiăng đing nao anun lĕ mă ia khăk, ia adung pơčrang lăng ƀing kông nhơn mă bruă amăng hơdôm sang măi pơkra pơjing, anom bruă boh thâo phrâo. Ră anai ƀôn prong hơmâo 1 klăk 600 rơbâo čô kông nhơn. Kơnong ƀơi hơdôm sang măi pơkra pơjing hơmâo 280.000 čô hăng 3.000 čô ƀing rơgơi kơhnâo, anom bruă boh thâo phrâo lĕ 45.000 čô mơnuih.

Siu Đoan: Pơblang