VOV4.Jarai - Thun anai lĕ thun blung a rơbêh kơ 150 boh sang anŏ djuai anai Mông ƀơi kual ngă hmua pơdai giăm dơnao Krông Pač hlao, tơring čar Daklak dưi cơkă thun phrâo amăng plơi pla phrâo pơdong. Djop gưl Ping gah mơng să truh pơ tơring čar glăk hơmâo lu tơlơi đing nao biă mă hăng jai hrơi pơjing rai tơlơi gơnang nao kjăp kiăng kơ neh met wa hơđong tơlơi hơdip mơda, bơwih ƀong huă, čang rơmang pơgi kơdih hơmâo lu tơlơi hiam klă ƀiă dong.

Mơng hrơi akŏ thun 2022, ayong Ma Văn Cỡ, djuai ania Mông, dŏ ƀơi plơi Yang San, să Cư̆ San, tơring glông Ea Kar, tơring čar Daklak nao čuă hmua pơdai laih. Hmua pơdai sang anŏ ñu hơmâo 5 ar phrâo sai amăng bơyan puih phang anai, truh ră anai rơbêh ha mơkrah blan laih, lŏn ngă hmua pơdai sang anŏ hơmâo arăng kah brơi lơ̆m nao dŏ plơi pla phrâo mơng Akŏ bruă dơnao pơkŏng ia Krông Pač hlao. Ha bơnah lĕ dơnao pơkŏng ia prong, ha bơnah lĕ hmua pơdai lăng mơtah mơda bă mơta, ayong Cỡ pơsit tong neh met wa amra ƀu hŭi kơƀah asơi huă añăm ƀong dong tah. Dong hăng kli hmua pơdai, ñu anăp nao lăng glăi pơ plơi, hok mơ-ak brơi thâo, Kơnuk kơna pơdong brơi plơi pla phrâo tui anai ăt lăp djơ̆ mơn, bruă ngă đang hmua giăm plơi pla tui anai, gêh gal kơ neh met wa biă mă. Tơdơi kơ 6 blan nao dŏ pơ plơi pla phrâo, sang anŏ ñu hơđong tơlơi hơdip laih, sang dŏ hơmâo man pơdong. Ayong Cỡ đăo gơnang hơmâo tơlơi gum djru mơng Kơnuk kơna hrŏm hăng tơlơi gir run mơng rĭm boh sang anŏ, tơlơi hơdip kơ neh met wa amra jai hrơi jơnap tui:

“Neh met wa mut rai hơdip ƀơi anai lêng kơ pơmĭn amra dŏ hlao mơtăm yơh, ră anai kơnong gir run bơwih ƀong huă, pơplih tơlơi hơdip mơda. Kah hăng abih bang adơi ayong, neh met wa rai dŏ ƀơi anai hlơi hlơi lêng kơ hơđong tơlơi hơdip, bơwih ƀong huă jai hrơi đĭ tui mơn”.

Ơi Vàng Seo Sàng, khua plơi phrâo Čư̆ Yang San, să Čư̆ Ê Lang, tơring glông Ea Kar, tơring čar Daklak brơi thâo, neh met wa thâo hluh kơ bruă nao pơdong plơi pla phrâo, bruă ngă đang hmua mơng hơdôm rơtuh boh sang anŏ, hăng hơdôm rơbâo akô̆ mơnuih lĕ tơnap tap hăng kiăng hơmâo hrơi blan kah mơng hơđong. Amăng thun blan laih rơgao, gưl gong gai ƀon lan ăt hơmâo gir run kiăng kơ djru brơi neh met wa hăng hơdôm sang anŏ mơng dơnao pơkŏng ia Krông Pač hlao, ƀơi să Čư̆ San, tơring glông M’Drak nao dŏ pơ să Čư̆ Ê Lang, tơring glông Ea Kar. Blung hlâo, lu sang anŏ lơ̆m nao dŏ pơ plơi pla phrâo hơđong tơlơi hơdip laih. Sit biă ñu, bruă tuh pơ alin dăng hyu hrĕ apui lơtrik, man pơkra jơlan, sang hră, sang ia jrao amăng plơi pla phrâo giong abih laih, ƀing čơđai dưi hrăm giăm plơi, djru brơi neh met wa hơđong amăng ngă hmua pla pơjing. Ră anai, hơdôm sang anŏ nao dŏ pơ plơi pla phrâo lêng hơmâo arăng kah brơi hmua sai pơdai hăng glăk dŏ tơguăn kah brơi đang hmua pla phun kyâo boh troh. Samơ̆ neh met wa ăt ƀu djơ̆ kơnong dŏ tơguăn arăng djru lơi, hăng rơnoh prăk arăng duh lŏn sang hơđăp pơ gŭ 1 klai prăk sa boh sang anŏ hlâo kơ ba đuăi mơng dơnao pơkŏng ia, lu sang anŏ blơi lŏn ngă hmua laih. Bruă ngă đang hmua gêh gal biă mă yua kơ giăm dơnao Ea Rớt, sa amăng hơdôm dơnao ia hrŏm hăng akŏ bruă dơnao pơkŏng ia Krông Pač hlao, anai lĕ dơnao ia arăng pioh yua pruih phun pla brơi plơi pla phrâo pơdong, anai lĕ dơnao lăng yôm hăng ană plơi pla. Dong tong krah plơi pla phrâo pơdong, ơi Seo Sàng đăo gơnang brơi thâo, aka ƀu ƀuh plơi pla phrâo pơdong hơmâo lu sang pơprong hăng hiam kar hăng ƀơi anai. Hơdôm tơlơi gal anai djru brơi lu mơta kiăng neh met wa gir run bơwih ƀong huă, pơđĭ kyar:

“Kâo đăo gơnang neh met wa amra gir run na nao, yua kơ tơlơi hơdip kơ ană tơčô. Neh met wa ƀơi anai hơmâo jơlan nao rai hăng apui lơtrik yua, jơlan hơmâo man pơkra, dơnao ia yua hăng sang hră lêng kơ hơmâo soh, neh met wa kiăng kơ gir kiăng pơđĭ kyar tơlơi bowih ƀong huă pơ anăp anai”.

Ơi Mã Văn Cương, Kơ-iăng khua Jơnum min mơnuih ƀon sang tơring čar să Čư̆ Ê Lang, tơring glông Ea Kar, tơring čar Daklak brơi thâo ră anai hơmâo laih 160/230 boh sang anŏ ƀơi să Čư̆ San, tơring glông M’Drak nao dŏ pơ plơi phrâo mrô 1 tui akŏ bruă Dơnao pơkŏng ia Krông Pač hlao. Abih bang mơnuih ƀon sang lơ̆m nao dŏ lêng kơ hơmâo gong gai să jao brơi tơhan djru mơnuih ƀon sang man pơdong sang, ƀơƀrư̆ hơđong tơlơi hơdip amăng plơi pla phrâo. Kar hăng ơi Cương hơmâo arăng ruah ngă rah khua apăn bruă Ping gah amăng plơi phrâo, mơng anun, ñu kiăng jê̆ giăm kah mơng thâo tơlơi kiăng mơng mơnuih ƀon sang, hmao tlôn pơsir hĭ hơdôm bruă tơnap tap ƀudah tơlơi rơkâo đĭ gưl glông. Ră anai, djop mơta bruă pơprong kơ tơlơi hơdip mơda amăng plơi pla phrâo hơmâo pơsir brơi lăp djơ̆. Ră anai dŏ kơnong kơ bruă lŏn ngă hmua, neh met wa hơmâo arăng jao 5 ar lŏn ngă hmua pơdai, dŏ 5 ar lŏn tơjŭ pla ăt dŏ tơguăn. Tơdah pơgiong bruă anai, plơi pla phrâo anai amra gêh gal brơi mơnuih ƀon sang. Kiăng kơ pơsur brơi neh met wa dưi čơkă thun phrâo blung a amăng plơi pla phrâo, tơring glông hăng să hơmâo kah mă prăk kak, jak iâu gum pơgôp, prap lui lui anung gơnam, blơi un, blơi mơnŭ djru brơi neh met wa hơmâo gơnam ƀong amăng hrơi čơkă thun phrâo pơđao pran jua, mơ-ak mơ-ai:

“Tơring glông gum hrŏm hăng să kah hăng hơdôm anom bruă amăng plơi pla, ƀơi anai akŏ pơjing djop anih anom, mơng khul apăn bruă, grup wai lăng plơi pla hơmâo akŏ pơjing mơng blan 9/2021 laih. Djru brơi neh met wa gơnam tam, jak iâu sa, dua anom bơwih ƀong sĭ mơdrô amăng tơring glông djru brơi anung gơnam. Gir run kiăng kơ neh met wa dưi čơkă hrơi ƀong tết mơ-ak”.

Thun phrâo 2022 jê̆ giăm laih, tơlơi hơdip kơ neh met wa amăng plơi pla phrâo mrô 1 ƀơi Dơnao pơkŏng ia Krông Pač hlao, să Čư̆ Ê Lang, tơring glông Ea Kar, tơring čar Daklak ăt glăk ƀơƀrư̆ hơđong mơng sang dŏ truh pơ bơwih ƀong huă. Hơdôm boh sang pơprong glông glăk man pơdong, hmua pơdai mơtah mơda, hơdôm đang pla boh kruăi kam, ƀưởi hăng hơdôm phun kyâo boh troh glăk hơmâo arăng pla anah, bluh đĭ hiam, hăng tơlơi čang rơmang sa tơlơi hơdip hiam klă brơi kơ neh met wa amăng plơi pla phrâo Čư̆ Ê Lang anai.

Công Bắc: Čih

Siu Đoan: Pơblang