VOV4.Jarai - Amăng hrơi mông klin Covid-19 glăk kơtang ƀơi lu anih, kiăng bruă tla prăk blan djŏp, tañ, rơnuk rơnua kơ ƀing pơdơi thun lơtret, prăk pơhlôm nua mơnuih mơnam, Anom bruă pơhlôm nua mơnuih mơnam Việt Nam kiăng Phun kông ti Dăng kông Việt Nam hăng Anom bruă pơhlôm nua mơnuih mơnam djŏp tơring čar, ƀon prong brơi prăk lơtret, prăk pơhlôm nua mơnuih mơnam blan 9 hăng blan 10 thun 2021 hrŏm ha wơ̆t mơtăm. Tui anun, Anom bruă pơhlôm nua mơnuih mơnam hơdôm tơring čar hơmâo hơdră brơi prăk mơta pơhlôm rơnuk rơnua pơgang klin. Bruă pơphun brơi prăk kiăng bĕ hĭ pơƀut lu mơnuih; lăi pơhmư̆ kơ ƀing hơmâo anăn ƀong prăk thâo tơlơi pơplih hơdră brơi prăk, hrơi blan brơi prăk, anih nao mă prăk. Anai lĕ tal 4 amăng thun anai, Anom bruă pơhlôm nua mơnuih mơnam Việt Nam git gai anom bruă pơhlôm nua hơdôm boh tơring čar, ƀon prong ngă hrŏm hăng Sang dăng kông brơi prăk lơtret, prăk pơhlôm nua pơƀut dua blan lơ̆m sa wơ̆t tla kiăng pơhlôm tơlơi dưi kơ mơnuih ƀong prăk hơmâo mă djŏp mrô prăk, mă tañ, laih dong djru pơgang klin mơn.

Siu H’Mai: Pơblang