VOV4.Jarai - Čơtlăm (15/6), amăng rơwang Jơnum lăng nao rai amăng tivi Khua ding jum Khul ling tơhan hơdôm bôh dêh čar ASEAN tal 15 (ADMM-15) hmâo pơphun laih bruă bưp ƀu sit nik kơplah wah Khua Ding jum Khul ling tơhan ASEAN hăng Khač. Khua Grŭp dêh čar Việt Nam – Thượng tướng Phan Văn Giang, Khua Ding jum khul ling tơhan dêh čar ta nao pơhmư̆ mông jơnum.

Đĭ pơhiăp amăng mông jơnum, Thượng tướng Phan Văn Giang pơsit yôm bruă mă mơng dêh čar Khač hăng gum hrom pơgang lŏn ia – rơnuk rơnua plơi pla kơplah wah ASEAN hăng Khač hơdôm hrơi rơgao, biă ñu amăng rơwang jơnum Khua Ding jum khul ling tơhan ASEAN pơhư prong (ADMM+) hăng Bơkơtuai kual ASEAN. Bơ̆ tơlơi Ia rơsĭ ngŏ, Khua Ding jum khul ling tơhan ơi Phan Văn Giang rơkâo hơdôm bơnah khom pơjing anih anom gêh gal kơ bruă bơkơtuai kơ tơlơi pơsir ƀơi Ia Rơsĭ Ngŏ (COC), biă ñu hluai tui hơdôm bruă pơdŏng pran đăo gơnang, ngă hơdư̆ bruă ngă, bĕ ngă tơnap đĭ kơđi tơlơi, pơsir tơlơi bơrơsua hăng jơlan gah mơ-ak klă, hluai tui tơlơi phiăn jar kơmar, amăng anun hmâo tơlơi pơkôl Sang gum hơbit djop dêh čar kơ Phiăn ia rơsĭ thun 1982./.

Siu H’ Prăk: Pô pơblang