VOV4.Jarai-Jơnum Khul mơnuih mă bruă djru mơnuih mơnam ASEAN tal 10 hăng akŏ ñu “Mơnuih mă bruă djru mơnuih mơnam lĕ phun mơ̆ng bruă mă rŭ glăi tơdơi kơ abih klin Covid 19” dưi pơphun mơguah lơ 21/9 tui hơdră lăng nao rai amăng tivi. Anai lĕ bruă mă yua kơ Ding jum Bruă mă Tơhan rơka hăng Mơnuih mơnam dêh čar pô gơgrong ba ngă khua Khul bruă mă djru mơnuih mơnam ASEAN mơ̆ng thun 2020-2021 pơphun.

Jơnum anai, hơmâo khua mua anom bruă wai lăng bruă mă djop dêh čar ASEAN. Hăng bruă glăm ba ngă Khua khul Bruă mă djru mơnuih mơnam ASEAN mơ̆ng thun 2020-2021, Việt Nam hơmâo ngă hrom tong ten hăng hơdôm dêh čar amăng kual ASEAN, Keh prăk djru čơđai muai sang gum hơbit djop dêh čar laih anun hơdôm bơnah pơtrut čih pơkra ngă giong Tơlơi pôr hrom Hà Nội kơ bruă pơtrut djru mơnuih mơnam, anăp nao kual ASEAN ngă hrom lir hơbit hăng hơđong djop bruă pioh pơdah thâo jơnum khua mua kual ASEAN tal 38 ĕp glăi amăng blan 10 pơ anăp.

Ƀơi mông jơnum, khua mua pơ ala kơ djop anom bruă mơ̆ng ASEAN hăng hơdôm bơnah ngă hrom, hơmâo kah pơpha djru nao rai anŏ kiăng kơ tơlơi glăm ba gah bruă djru mơnuih mơnam amăng bruă mă pơgăn glăi hăng rŭ glăi tơdơi kơ abih Covid 19, amăng anun pơtum nao kơ bruă ia jrao pơgang tơlơi suaih pral hăng pơgang anŏ tŭ yua kơ mơnuih mơnam. Amăng mông jơnum anai, hơmâo kĭ pơkôl hơdor glăi 10 thun Khul bruă mă djru mơnuih mơnam ASEAN mơ̆ng thun 2011-2021.

Nay Jek: Pơblang