VOV4.Jarai - Dŏ rơkơi bơnai mơng anet, dŏ glăi kơnung djuai jê̆ giăm jing ba glăi lu tơlơi ƀu klă kơ ƀu ƀiă ôh mơnuih djuai ƀiă. Dŏ glăi kơnung djuai jê̆ giăm kah hăng dŏ ană anong ană wa jing ngă djuai ană mơnuih ta ƀu klă tui mơn. Ƀing čơđai hơmâo tơkeng rai juăt hơmâo tơlơi ruă mơng nge, biă ñu lĕ bơdjơ̆ nao drah kơtăk, akŏ dlô ƀu rơgơi, rơwang, akhen...Hơdôm tơlơi ƀu klă anai bơbeč djơ̆ tơlơi hơdip, bruă mă ƀing ta...Anai ăt jing sa amăng hơdôm tơlơi yôm phun ngă rơmon rơpa mơng mơnuih ƀon sang djuai ƀiă.

Dua gơñu ha kơnung, glăk 16 thun đôč, samơ̆ amai La Thị Hoa hăng ayong La Văn Nam, mơnuih Đan Lai, ƀơi plơi Cò Phạt, să Môn Sơn, tơring glông Con Cuông, tơring čar Nghệ An ăt dŏ mơn. Ană kơčua đah kơmơi gơñu 2 thun laih, samơ̆ mơng phrâo tơkeng, mô̆ anet anai jô tơkai. Amai La Thị Hoa brơi thâo:

“Dua rơkơi bơnai gơmơi bơbưp,lăng khăp lĕ dŏ. Amĭ ama hai brơi dŏ mơn, gơmơi glăi dŏ hrŏm, tơkeng ană bă, samơ̆ aka ƀu pơdô̆ ôh. Hlâo adih hmư̆ sang anŏ gơmơi ră ruai kâo hăng rơkơi kâo adơi ayong kơnung djuai mơn, samơ̆ huăi hơget ôh, ăt dưi dŏ mơn”.

Bruă ƀing čơđai djuai ania Đan Lai lui sang hră dŏ rơkơi rim thun hơmâo soh, ană dra 14 thun aka ƀu dŏ rơkơi lĕ arăng iâu dra ayuh laih. Laih dong tơlơi phiăn dŏ rơkơi bơnai huăi tơnap tap hơget lơi, ƀing čơđai gơ̆ pơkhăp lĕ pơkiăo nao ƀing gong lan nao bơyai brơi, giong anun djă kông, glăi dŏ, bơ pơdô̆ lĕ hrơi hơbin ta hơmâo lĕ ngă. Amai La Thị Nga dŏ ƀơi plơi Cò Phạt brơi thâo, bruă dŏ rơkơi bơnai aka ƀu djŏp thun, hăng dŏ glăi adơi ayong kơnung djuai pô jing tơlơi juăt hmư̆ laih.

“Ƀing gơñu amuaih dŏ rơkơi, dŏ bơnai, ta khŏm brơi yơh, hiư̆m mơng ngă, hlâo adih hai hnưr thun gơñu ăt hơmâo ană bă mơn, ƀu thâo ruai kơ kơnung djuai ôh, dŏ glăi adơi ayong amăng kơnung djuai jai jê̆ giăm mơ-ak hloh, gơñu khăp lĕ dŏ, tơkeng ană bă, ƀu khăp dong tah lĕ pơklaih, glăi dŏ pơ amĭ ama”.

Bruă dŏ ung mơng muai bơnai mơng anet hăng dŏ glăi kơnung djuai pô mơng djuai ania Đan Lai ƀơi Con Cuông, tơring čar Nghệ An lĕ tơlơi kiăng ƀing ta pơhŭi hlâo kơ tơlơi pơdô̆ rơkơi bơnai, tơkeng ană bă, yua dah ñu ba truh lu tơlơi sat răm, bơdjơ̆ nao anŏ klă mrô ană mơnuih. Tui hăng tơlơi ră ruai mơng yă Nguyễn Thị An - Khua anom bruă HealthBridge Canada ƀơi Việt Nam, ră anai anom bruă glăk pơphun ngă kơčăo bruă wai lăng tơlơi suaih pral ƀơi tơring čar Sơn La lĕ tơlơi anai bơbeč sat biă kơ tơlơi hơdip.

“Ƀing ta ƀuh rơđah anŏ klă mrô ană mơnuih bơbeč lu biă mă ƀơi ƀing čơđai aka truh prong, aka ƀu pơmin kơjăp mơ̆ tơkeng ană bă, jing ngă ană bă gơñu ƀu hiam drơi jăn, wơ̆t hăng yua ƀing čơđai dŏ rơkơi bơnai tañ đơi, ƀing dra glăk truh lui sang hră, jing ƀu hơmâo tơlơi pơmin kơjăp, ƀu thâo hluh kơ tơlơi hơdip, bruă rông ană bră, pơtô ană bă. Tơdah ăt dŏ hơmâo na nao, pŏt nao pŏt rai amra ba truh tơlơi truh prong hloh”.

Bruă dŏ rơkơi bơnai mơng anet hăng dŏ glăi kơnung djuai pô jing ngă tơlơi hơdip ƀu klă ôh. Ƀing čơđai hơmâo tơkeng rai hơmâo tơlơi ruă akă, kơƀah pran, ƀu hơmâo prăk kăk čem rông ană bă. Anai lĕ tơlơi phun ngă sat kơ djuai ană mơnuih, bơbeč kơ sang anŏ hăng mơnuih tơpuôl. Yua hnun, bruă pơtô pơblang, ƀudah pơtô hlâo kơ ƀing ngă amĭ lĕ bruă kiăng lăng ba biă mă.

Việt Phú/VOV4: Čih - Siu H’Mai: Pơblang