VOV4.Jarai - Bruă pơkra brơi hră Căn cước công dân glăk hơmâo Ding jum kông ang, kông ang ƀơi hơdôm tơring čar, ƀôn prong ječ ameč pơgiong, pơhlôm hlâo kơ lơ 1/7/2021, amra pơgiong brơi hră căn cước công dân brơi ƀing mơnuih djop hră pơ-ar. Bruă anai kiăng kơ hơmâo tơlơi gir run mơng djop gưl, djop gơnong bruă hăng biă mă ñu pran gơgrong mơng rĭm čô mơnuih ƀon sang. Kiăng kơ bruă pơkra brơi căn cước công dân djơ̆ hăng hrơi mông pơkă, mơnuih ƀon sang kiăng kơ ngă abih pran gơgrong, ngă tui klă hơdôm tơlơi pơkă amăng tơlơi phiăn pơkra căn cước công dân.

Hơdôm hrơi anai, amăng đơ đam dêh čar ta, ƀing mơnuih apăn bruă, kông ang djru gah bruă ngă hră pơ-ar brơi mơnuih mơnam mă bruă na nao ƀu hơmâo mông pơdơi amăng tơhrơi kah hăng mơmŏt mlăm laih dong nao tơl kual ataih, asuek, tơl rĭm boh sang anŏ kiăng kơ pơkra brơi căn cước công dân. Dưm wŏt chíp kiăng kơ ngă truh kih bruă pơkra truh blan 7/2021 amra pơkra brơi 50 klăk hră căn cước công dân. Ƀing apăn bruă, tơhan kông ang hơmâo găn rơgao tơnap tap kiăng kơ ngă hiưm pă brơi rĭm čô mơnuih ƀon sang lêng kơ amuñ ngă hră pơ-ar ră anai, hrŏ ƀiă hră pơ-ar kiăng ngă, huăi rơngiă hrơi mông nao rai ….

Ding jum kông ang hơmâo akŏ bruă pơkiăo nao dong mơnuih apăn bruă, tơhan kông ang hrŏm hăng măi mok pioh pơkra brơi căn cước công dân brơi kơ rĭm ƀon lan. Laih dong Ding jum hơmâo git gai tơhan kông ang ƀơi djop plơi pla pơkiăo nao lu mơnuih, lu dong mơnuih apăn bruă nao pơkra brơi căn cước công dân pơhlôm ƀiă hrơi mông mă bruă dŏ 15 mông amăng sa hrơi (mơng 7 mông truh 22 mông); laih dong pơkă brơi mrô mơnuih pơkra brơi căn cước công dân mơng kông ang ƀơi ƀon lan amăng rĭm hrơi; pơtô pơblang rĭm hrơi amăng djop plơi pla hăng hơdôm bruă mă thâo pơčeh phrâo, kiăng ngă pơgiong hăng rơgao hơnong pơkă lơ̆m pơkra brơi căn cước công dân. Mah ăt dŏ tơnap tap, bruă mă lu samơ̆ khŏm pơgiong tañ, ƀing apăn bruă, tơhan kông ang djru gah bruă ngă hră pơ-ar brơi mơnuih mơnam hăng kông ang djop plơi pla ăt glăk gir run tơhrơi kah hăng mlăm, nao tơl să, phường, tơl plơi pla kual ataih, hơdôm plơi pla giăm guai lŏn ia, bul pơtâo hăng kual čư̆ siăng pơkra brơi căn cước công dân.

Truh lơ 6/5, đơ đam dêh čar hơmâo tŭ ư mă giăm 40 klăk hră pơ-ar pioh pơkra căn cước công dân; hơmâo mơ-it glăi laih pơ plơi pla 7 klăk 400 rơbâo hrơi căn cước công dân. Bơ hăng bruă dưm dăp brơi hơbot hră pơ-ar kơ mơnuih ƀon sang pơhlôm brơi “djơ̆, djop, rơđah rơđông”, truh ră anai, Anom bruă wai lăng bruă ngă hră pơ-ar kơ mơnuih mơnam hơmâo ngă ha amăng plĕ hră pơ-ar brơi giăm 99 klăk čô mơnuih amăng đơ đam dêh čar dưm amăng plang djă pioh hră pơ-ar dêh čar kơ mơnuih ƀon sang; hơmâo pơkra glăi djơ̆ giăm 42 klăk hră pơ-ar. Hơmâo lu ƀon lan ngă klă anun lĕ: Nam Định, Hải Dương, Thái Bình, Ninh Bình, Thừa Thiên Huế, Hà Nam… Sa, dua boh tơring čar hơmâo pok pơhai ngă hmao tlôn hăng tŭ yua djơ̆ hăng tơlơi črâo trun mơng Ding jum lơ̆m ngă hră căn cước công dân brơi mơnuih glăk hơdip, mă bruă ataih mơng plơi pla anun lĕ ƀơi: Quảng Ninh, Bình Dương, ƀôn prong Hồ Chí Minh.

Thượng tá Trần Thanh Phong, Kơ-iăng khua anom bruă tơhan pôlih wai lăng gah bruă ngă hră pơ-ar brơi mơnuih mơnam kông ang tơring čar Đồng Tháp hơmâo lu tơlơi bơră ruai, kiăng kơ bruă pơkra brơi hră căn cước công dân brơi djơ̆ hrơi mông pơkă, mơnuih ƀon sang lơ̆m nao ngă hră căn cước công dân kiăng kơ ngă tui djơ̆ tơlơi pơkă mơng tơlơi phiăn căn cước công dân laih dong tơlơi phiăn bơdjơ̆ nao.

Amăng bruă pơkra brơi căn cước công dân ră anai ƀing gơmơi kiăng ngă tui djơ̆ tơlơi pơkă lơ̆m pơkra căn cước công dân hơmâo Ding jum kông ang pơtrun, lăi pơthâo brơi abih bang mơnuih ƀon sang. Tui tơlơi sit nik ră anai. Lơ̆m neh met wa nao ngă hră căn cước công dân, neh met wa kiăng kơ ngă tui hơdôm bruă tui anai: Sa lĕ neh met wa kiăng ngă hmư̆ tui hăng lăi pơthâo tơlơi črâo trun mơng gong gai ƀon lan lơ̆m gong gai hơmâo tơlơi pơhing hơget thơ, ba hyu hră jak iâu kiăng kơ nao hră hră căn cước công dan djơ̆ anih, djơ̆ hrơi mông, pơhlôm huăi rơngiă mông hăng gêh gal brơi kơ ƀing ta dong. Dua lĕ tơdah mơnuih ƀon sang aka ƀuh čih rơđah hrơi blan thun tơkeng amăng hră akŏ sang kah hăng amăng hră chứng minh nhân dân, neh met wa kiăng nao bưp gong gai ƀon lan, sit biă ñu ƀing apăn bruă ngă hră pơ-ar ƀơi să, phường, tơring kual ƀơi anih ƀing ta dŏ hơdip kiăng kơ arăng pơtô brơi hăng ngă glăi hră, čih glăi tong ten hrơi blan, thun tơkeng kiuăng kơ amuñ amăng bruă ngă hră pơ-ar hlâo kơ ngă căn cước công dân.

Yua anun, lơ̆m mơnuih ƀon sang ngă hră căn cước công dân kiăng kơđiăng:

- Ngă tui tơlơi pơkă amăng tơlơi phiăn anai hăng tơlơi phiăn bơdjơ̆ nao pơkŏn;

- Ngă hră pơ-ar, pơplih, pơkra glăi hră căn cước công dân brơi djơ̆ hăng tơlơi pơkă amăng tơlơi phiăn;

- Čih brơi tong ten, rơđah, djơ̆ tui arăng rơkâo kiăng kơ dưm amăng plang djă pioh hră pơ-ar dêh čar kơ mơnuih ƀon sang hăng anih wai lăng căn cước công dân tui tơlơi pơkă amăng tơlơi phiăn anai hăng tơlơi phiăn bơdjơ̆ nao pơkŏn dong;

- Pơdah brơi hră căn cước công dân lơ̆m arăng rơkâo kiăng kơ pel ĕp tui djơ̆ tơlơi pơkă amăng tơlơi phiăn;

- Djă pioh klă hră căn cước công dân arăng pơkra brơi; lơ̆m rơngiă kiăng kơ tañ lăi pơthâo brơi anom bruă wai lăng căn cước công dân;

- Kiăng brơi glăi hră căn cước công dân kơ anom bruă bơdjơ̆ nao tơdah kiăng pơplih, pơhrui glăi, mă pơkŏng jang jai tui tơlơi pơkă amăng črăn 23 hăng 28 amăng tơlơi phiăn anai.

Siu Đoan: Pơblang