Tui anun, gơnam đang hmua mơng Dak Lak sĭ mơdrô pơ tač rơngiao lu hloh lĕ kơphê, kiăo tui dong lĕ boh ñông, tiu, kơsu, kyâo hăng boh troh. Sit biă ñu, 6 blan laih rơgao tơring čar Dak Lak sĭ mơdrô 228.000 tơ̆n kơphê, pơhrui glăi giăm 485 klăk đôlar, dưm dưm giăm 12 rơbâo klai prăk; dua dong lĕ boh ñông hăng 2.500 klai prăk; tal 3 lĕ tiu, giăm 1.800 klai prăk; dŏ glăi lĕ kơsu, hơdôm gơnam mơng kyâo laih dong boh troh, braih, makka.

Ơi Huỳnh Ngọc Dương - Kơ-iăng khua gơnong bruă brơi thâo, kiăng tŏ tui rơnoh pơhrui đĭ tui anai kah hăng pơhlôm bruă sĭ mơdrô gơnam đang hmua mơng Dak Lak dưm dưm 1 klai 610 klăk đôlar (giăm 38.000 klai) tui tơlơi pơkă thun 2023, gơnong bruă sĭ mơdrô hăng tuh tia pơkra pơjing glăk gir run pok pơhai lu hơdră djru brơi anom bơwih ƀong sĭ mơdrô kơ bruă sĭ mơdrô gơnam đang hmua.