Y Tuân Ksor, Khua grup ping gah Buôn Pa, să Čư̆ Prao, tơring glông M’Drăk ră ruai: Lŏn tơnah hăng ayuh hyiăng ƀơi anai ƀu lăp tui hăng anih pơkŏn ôh. Phun tơbâo pơ să pơkŏn arăng pla hơmâo 100 tơn/ha jing bruă juăt ƀuh laih, bơ pơ anai 80 tơn lĕ lu biă yơh anun. Sa hektar phun keo 7 thun pơ kual pơkŏn hơmâo nua 100 klăk prăk, bơ pơ anai kơnong kơ 70 klăk đôč. Buôn Pa hơmâo 93 boh sang anŏ, rơbêh ha mơkrah amăng mrô anun lĕ sang anŏ rin. Hmư̆ hing hloh amăng bruă hrưn đĭ tơklaih đuăi mơ̆ng ƀun rin lĕ rơkơi bơnai Y Tài Niê. Ră anai sang ñu hơmâo 20 ha phun keo mơ̆ng 2 truh kơ 4 thun, laih anun 8 ha đang tơbâo. Bơyan laih rơgao, 8 ha đang tơbâo hơmâo giăm 600 tơn, tơbâo pơmă anun jing rơbêh rơboh glăi 350 klăk prăk. Y Tài brơi thâo, sang anŏ ñu čan prăk mơ̆ng Sang bruă prăk ngă hmua hăng pơđĭ kyar ƀôn lan mơ̆ng rơbêh 10 thun anai laih. Lơ̆m kiăng blơi kmơk pruai đang tơbâo ƀudah kiăng blơi anah phun keo, apah mơnuih pla glai rưng lĕ čan prăk mơ̆ng anun mơn. Truh bơyan koh tơbâo lĕ tla tom prăk čan blung a hăng prăk kơmlai hlao. Y Tài Niê brơi thâo, bơwih ƀong hơmâo tui anai lĕ yua hơmâo prăk čan mơ̆ng sang bruă prăk mơn.

“Hơmâo prăk čan mơ̆ng sang bruă prăk, mơnuih ƀôn sang gơmơi mơ̆ng hơmâo prăk ngă hmua. Đa čan pla tơbâo, pla kyâo; đa čan blơi rơmô. Tơlơi hơdip neh met wa amăng plơi gơmơi hơmâo pơplih lu laih, pơđĭ kyar hloh pơhmu hăng mơ̆ng hlâo”.

Y Lhu Byă, djuai ania Êđê dŏ ƀơi ƀuôn Ko Êmông, să Ea Bhôk, tơring glông Čư̆ Kuin ră anai hơmâo laih sang prong krên dên ƀơi tong krah đang kơphê, sầu riêng mơtăm. Hlâo adih rơngiao kơ bruă pla kơphê, ơi Y Lhu Byă rông rơmô truh kơ 40 drơi. Tơlơi bơwih ƀong đĭ, ană bă hơmâo hră hră truh anih.

“Neh met wa gơmơi ƀơi hơdôm boh plơi mơ̆ng să Ea Bhôk, tơring glông Čư̆ Kuin, Dak Lăk. Mơ̆ng hlâo laih gơmơi kơnang kơ prăk čan mơ̆ng sang bruă prăk či đĭ kyar rông un mơnŭ, rơmô kơbao, laih anun blơi kmơk pruai đang hmua. Tơlơi hơdip neh met wa hơđong hăng đĭ kyar ha bơnah yua kơ hơmâo prăk čan mơn”.

Hơmâo dong mơn sa čô mơnuih rơgơi ngă pơdrong kơ pô hăng thâo djru kơ lu sang anŏ pơkŏn dong pơklaih tơlơi rin rơpa, anun lĕ ơi Y Phơi Byă, djuai ania M’nông dŏ ƀơi Buôn Drên A, să Dăk Liêng, tơring glông Lăk. Ơi Y Phơi hơmâo đang pla phun sui thun prong truh 15 ha, amăng anun hơmâo 10 ha sầu riêng hăng 4 ha tiu truh bơyan mơboh soh yơh. Thun 2020 ơi Y Phơi čan 3 klai prăk rông djuai phun sui thun hăng pla phrâo 1.400 phun kyâo dổi, sa djuai phun lăp djơ̆ pơ kual anai, amra pơhrui prăk lu biă. Ơi Y Phơi brơi thâo, mrô prăk čan mơ̆ng sang prăk 3 klai thun 2020, yua pĕ sâu riêng anun dưi tla 2 klai prăk laih.

“Kâo bơwih ƀong đĭ yua hơmâo prăk čan mơ̆ng sang bruă prăk ngă hmua mơn. Ƀơi anŏ ñu kâo čan truh 3 klai prăk či ngă hmua. Mrô prăk anai kâo pơƀut pơ đang pla phun sui thun, lu biă ñu lĕ sâu riêng. Kâo ăt djru ba hơdôm boh sang anŏ pơ ƀuôn Drên A hăng Drên B kơ kmơk pruai phun pla. Kâo djru ba 9 čô mơnuih amăng plơi hơmâo mă bruă na nao rim thun”.

Ơi Vương Hồng Lĩnh, Khua sang bruă prăk Agribank ƀơi Dak Lăk brơi thâo: Truh lơ 31/7/2023 prăk brơi čan bơwih ƀong ƀơi Agribank Dak Lăk hơmâo 17.746 klai prăk, đĭ 801 klai prăk, rơnoh đĭ kyar hơmâo 4,7% pơhmu hăng akŏ thun.

“Ƀơi Agribank Dak Lăk hơmâo brơi čan rơbêh 2 rơbâo klai hăng mơnuih ƀôn sang djuai ƀiă, hăng rơbêh 10 rơbâo akŏ sang anŏ čan mă. Hăng mrô prăk anai, neh met wa hơmâo čan bơwih ƀong sĭ mơdrô ăt kah hăng ngă hmua pla pơjing phrâo dong. Neh met wa hơmâo mă yua boh thâo măi mok phrâo či pơkra gơnam klă hloh, pơđĭ tui boh tŭ yua amăng bruă ngă hmua pla kyâo hăng rông gơnam. Neh met wa hơmâo mă prăk čan či pơđĭ prăk pơhrui. Pơ kual ataih nao rai tơnap, Agribank hơmâo hơdôm anih brơi čan nao rai hăng rơdêh ô tô. Bruă Agribank brơi čan pơhlôm klă, djru ba neh met wa lŏm lui tơlơi rơmon akŏn rin”.