Giăm ha mơkrah thun aka ƀu hơmâo hơjan prong ôh samơ̆ ayong Nguyễn Quang Thao dŏ amăng ƀut plơi 10, să Ea Hiu, tơring glông Čư̆ Kuin, tơring čar Dak Lak ăt gir đuăi nao hơdôm rơtuh km kiăng blơi anah kơphê ba glăi pla, kiăng kơ pla pơplih hĭ đang tiu glăk djai ruh. Ayong Thao brơi thâo, juăt amăng bơyan không phang tui anai ƀu hơmâo mơnuih tui nao plơi anah pơjeh ôh. Samơ̆ hơdôm thun anai kơphê nua đĭ kơtang biă mă, ngă anah pla sĭ abih ƀhao. Kơphê pơtlep than ƀơi hơdôm anih pla anah sĭ abih sui yơh, ayong Thao khŏm blơi anah pla mơng asar pơjeh. Ñu ăt pơmĭn mơn lơm glăk ƀuh lu mơnuih pot glăi luh nao pla kơphê, samơ̆ ăt kiăo tui, yua pơmĭn nao pơmĭn rai, pla kơphê kah lăp djơ̆ hloh:

“Hlâo anun ƀing gơmơi kơnong pla tiu đôč. Dua, tlâo thun anai pla sầu riêng. Ră anai, mơnuih ƀôn sang pơphun hơdai nao pla kơphê…Lu mơnuih luh nao pla. Mơ̆ ră anai kơnong pla kơphê, mơ̆ tơdah pla phun kyâo boh troh pơkŏn ăt ƀu thâo hiưm pă lơi”.

Ƀut plơi 11, să Hoà Thắng, plơi prong Buôn Ma Thuột, anai lĕ anih pla anah kyâo amăng tơring čar Dak Lak, bruă sĭ mơdrô anah kyâo dik dak ƀiă pơhmu hăng rĭm thun. Amai Lê Thị Vân, sa đang pla anah kyâo brơi thâo: Sa, dua đang pla anah kyâo amăng plơi pla sĭ anih dong mơng anai giăm 2 blan laih, ƀing mơnuih hyu blơi mơng Gia Lai, Dak Nông hăng Lâm Đồng, mơng hrơi anah phun pla sa, dua pok hla rai blơi yơh. Bơ ră anai, nua anah kyâo glăk đĭ tui rĭm hrơi, samơ̆ mơnuih ngă hmua ƀu dưi nao blơi yua ƀing sĭ mơdrô nao sua mă abih. Amai Vân jak iâu gơyut gơyâo hyu blơi pơhrui pơjeh phun pla mơng ƀing gơñu, yua ƀing gơñu juăt sĭ mơdrô nao rai yơh:

“Kar sang anŏ gơmơi ră anai anah phun pla sĭ abih laih. Ƀu hơmâo kiăng mơnuih ƀôn sang blơi ôh. Phun pla lêng kơ blơi mơng pô anai pô adih soh. Ƀing sĭ mlia hyu blơi pơhrui glăi lu anih. Sit biă ñu, nua pơjeh phun pla ră anai đĭ na nao. Hơdôm hrơi hlâo anun 4 rơbâo 3 rơtuh ƀu blơi ôh, samơ̆ ră anai 4 rơbâo ha mơkrah ăt bơrơsua blơi mơn”.

Tui anom bruă kơsem min boh thâo ngă hmua, pla đang glai kual Dap kơdư, nua kơphê ră anai đĭ lu hloh dong mơng hlâo anun, hăng nua sĭ mơdrô amăng blan 5/2024 lĕ 4.224 đôlar Mi sa tơ̆n, đĭ rơgao 3.150 đôlar Mi sa tơ̆n amăng blan 6 thun 1994, yua anun ngă lu mơnuih luh nao blơi anah kơphê ba glăi pla. Nai prin tha Trần Vinh, Khua anom bruă kơsem min boh thâo brơi thâo, bruă lu mơnuih luh nao pla amăng thun anai huăi ngă kơphê pĕ pơhrui lu, trun nua kar hăng hơdôm thun hlâo anun, đang hmua pla kơphê ƀơi kual Dap kơdư glăk anet tui hăng pĕ pơhrui aset tui, yua mơnuih ƀôn sang hơdai nao pla sầu riêng hăng phun kyâo boh troh. Samơ̆, anah pơjeh kơphê kơƀah glăk ngă bơngŏt kơ pơjeh ƀu hiam:

“Bruă anai ngă bơngŏt biă mă yua hŭi lu mơnuih amra hluai tui tơlơi anai đĭ nua sĭ anah kơphê, sa, dua đang pla anah ăt hyu blơi glăi mơng pơkŏn mơn, mơ̆ ƀu hơmâo pla ƀơi anai. Pơjeh pla pơkra ƀơi anai, kah hăng blơi mơng anom bruă kơsem min, ƀiă biă mă khŏm dŏ tơguăn giăm 5 blan kah hơmâo anah sĭ. Mơ̆ ră anai, blan 3, blan 4 ăt hơmâo laih, ƀing gơñu blơi mơng pơkŏn. Mơ̆ lăng anah kơphê ăt ƀu thâo hiam hă ƀŭ./.