Ƀơi mông jơnum bơkơtuai, lu khua mua lăi pơtong, pơđĭ kyar bruă ngă hmua hơdjă rơgoh, mơtah mơda ƀu kơnong anăp khom ngă đôč ôh, ƀơi anăp kơ tơlơi pơblih ayuh hyiăng lŏn tơnah, dŏ jing anŏ gêh găl pơđĭ tui rơnoh yom kơ bruă ngă hmua hăng pơgang anih dŏ jum dar juăt lăi ayuh hyiăng lŏn glai adai rơhuông. Hăng tơring čar hơmâo rơbêh 1,36 klăk hektar lŏn hăng lu anŏ gêh găl kơ bruă ngă hmua pla pơjing kah hăng Dak Lak, bruă ngă hmua hơđong, hơdjă, pơgang anŏ mơtah mơda, pơsir hlom akŏ klôn lĕ sa bruă mă yom pơphăn yơh. Nai tha prin, ơi Trần Ngọc Thanh-Khua anom bruă kơsem min Bruă ngă hmua Pơđĭ kyar plơi pla brơi thâo, bruă ngă hmua pơhlom hơdjă rơgoh, pơgang anŏ mơtah mơda laih anun boh tŭ yua aka ƀu ƀuh lu ôh, sa bơnah lĕ yua lu tơlơi kơsem min ră anai dŏ ngă prong, lu đơi, kơƀah hĭ anŏ ngă tum teč rơđah rơđong pioh kơ mơnuih ngă hmua ba yua mơtam.

“Hơdôm boh tơhnal kơsem min kơ bruă ngă hmua ba yua hơbâo pruai hơdjă, ngă hmua pơsir hlom akŏ klôn mơ̆ng hlâo dŏ glăi hĭ ƀơi anăp pơphô brơi đôč. Tơlơi mơ̆ mơnuih ngă hmua kiăng lĕ ƀuh rơđah tum teč hơdră či ngă tui, ba yau kơ anom ngă hrŏm laih anun ngă hmua pla pơjing sit nik. Lŏn tơnah hơmâo laih, samơ̆ hơdră ba yua mă bruă lĕ, aka ƀu thâo tong ten kah hăng dưm hơbâo pruai kmơ̆k, anun dưm hơbâo, pruai kmơ̆k soh glăi, soh hrơi blan pơkă, ngă huač soh sel. Čang rơmang djop jơlan hơdră tañ pơblih jing hơbô̆ bruă rơđah hăng amuñ ngă tui”.

Mơ̆ng bruă ngă hmua pla pơjing, ơi Trần Thanh Thoảng, sa čô mơnuih ngă hmua kah pơpha, kiăng dưi ngă tŭ yua sit nik ngă hmua hơdjă rơgoh, pơgang anŏ mơtah mơda...anom bruă kơnuk kơna wai lăng gah bruă anai kiăng kơtưn hyu ĕp lăng boh tŭ yua hiam gơnam yua ngă hmua arăng sĭ mơdrô, biă mă ñu kmơ̆k ta juăt lăi hơbâo pruai laih anun ia jrao pơgang phun pla khom sit nik:

“Kơnuk kơna kiăng krăo lăng tong ten djop mơta kmơ̆k pruai hơbâo ngă jing phun pla, ia jrao pơgang hlăt arong aruač laih anun bơtơhmal khut khăt sang bruă pơpă sĭ mơdrô hơbâo pruai ngă mă, ƀu hiam klă, tŭ yua kơ phun pla. Mơnuih ngă hmua sit blơi gơnam sĭ mơdrô, ba yua ngă hmua lĕ khom ĕp djơ̆ hơbâo pruai tŭ yua, kiăng ba dưm amăng đang hmua ba glăi boh tŭ yua bơwih ƀong huă hăng hiam klă kơ phun pla”.

Tŭ ư hrŏm tơlơi pơgôp hiăp anun, kiăng hơmâo tơlơi djru hrŏm tong ten hloh mơ̆ng djop sang bruă kơnuk kơna pel ĕp anih sĭ mơdrô, pơkra ming rai hơbâo, kmơ̆k pruai hăng ia jrao pơgang phun pla, Kơ-iăng Khua anom bruă wai lăng phun pla hăng ia jrao pơgang arong aruač dêh čar, ơi Nguyễn Quốc Mạnh brơi thâo, ră anai Anom bruă anai hơmâo pơpha brơi laih 22 amăng 59 mơta hră pơar kơ tơring čar, hơmâo wơ̆t hơdôm pok hră pơkă kơ bruă pơkra hơbâo, kmơ̆k pruai laih anun bruă sĭ mơdrô hăng tač rơngiao. Djop tơring čar tañ ĕp lăng hăng pok pơhai ngă tui:

“Lơ̆m ngă tui hơdră ngă hră pơar pơdjơ̆ nao bruă pla pơjing hăng pơgang phun pa, tơdah Gơnong bruă ngă hmua hăng Pơgang ayuh hyiăng lŏn glai adai rơhuông tơring čar Dak Lak bưp tơlơi tơnap tap, kiăng lăi pơthâo tañ mơtam hăng Ding jum Ngă hmua hăng Pơgang ayuh hyiăng lŏn glai adai rơhuông hăng anom bruă gơmơi kiăng gơmơi thâo hăng brơi nao mơnuih kơhnăk bruă mă djru ba pơsir klă hloh djop hơdră ngă hră pơar hơmâo pơpha gưl tơlơi dưi”.

Ăt pơdjơ̆ nao kơ bruă ngă hmua hơđong kơjăp mơ̆n, Jơnum min Boh thâo ia rơgơi phrâo hăng ayuh hyiăng mơ̆ng Sang bruă khua pơ ala mơnuih ƀôn sang dêh čar ngă hrŏm hăng Ding jum Ngă hmua hăng Pơgang ayuh hyiăng lŏn glai adai rơhuông pơphun jơnum bơkơtuai “pơđĭ kyar bruă ngă hmua hơđong kơjăp lir hơbit hăng bruă mă pơgang anih hơdip jum dar”. Ƀơi mông jơnum, ƀing khua mua lăi pơtong: lơ̆m rơnuk ayuh hyiăng lŏn tơnah pơblih tơnap, kông ngăn amăng lŏn tơnah hăng mơnong hơdip hrŏ tui hĭ, tơlơi hơƀak jrak, sat kơ ayuh hyiăng plơi pla hăng kual ngă hmua pla pơjing jai hrơi lu, anun yơh sa tơlơi lông lăng prong kơ bruă ngă hmua amăng dêh čar ta, yua anun khom pơblih bruă pơđĭ kyar mơ̆ng hơdră tŭ kơ mă đut tơhnal, jing bruă khom pla hăng pơgang pioh, ngă bơkơnar ayuh hyiăng, đing nao kơ rơnoh gơnam pơhrui glăi, đing nao anŏ tŭ yua hiam kơ boh troh, anŏ tŭ yua hăng jĕ giăm ayuh hyiăng hloh, kiăng hơđong na nao.

Bruă pơđĭ kyar ngă hmua hơđong kơjăp, ƀu kơnong kơ anŏ kiăng sit nik ôh, dŏ jing bruă ngă gơgrong ba mơ̆ng dêh čar Việt Nam ngă tui tơlơi kĭ pơkôl hăng jar kmar.

Ƀơi mông jơnum bơkơtuai anai, Kơ-iăng Khua git gai pơ ala mơnuih ƀôn sang dêh čar, ơi Lê Minh Hoan lăi pơtong: Bruă ngă hmua pơgang pơhlom akŏ klôn sir krep, ƀu djơ̆ lăi pơphun ngă mơ̆ng dlông ôh, jing khom ngă mơ̆ng yŭ atur ƀơ̆i. Kiăng pơđĭ kyar hơđong kơjăp khom pơphun ngă bruă mơ̆ng hơdôm boh tơhnal, bruă anet hloh, ƀu tơguan khom hơmâo tơlơi phiăn ƀơ̆i mơ̆ng ngă, khom hơmâo prăk kông ngăn kơnuk kơna kah tơgŭ mă bruă, khom pơphun brơi mơ̆ng rim sang anŏ mơnuih ƀôn sang ngă hmua, khom mơ̆ng bruă anet hloh, rim khua apăn bruă pơsur ngă hmua pơtô lăi hăng boh pơhiăp amuñ thâo hluh, rim boh sang bruă kơsem min khom hơmâo hơdră ngă tui sit nik hloh. Pơ anăp anai,  sang bruă khua pơ ala mơnuih ƀôn sang dêh čar đing nao čih pơkra, pơblih glăi, pơhrua nao dơ̆ng lu tơlơi phiăn pơdjơ̆ nao pơsir hĭ tơlơi ngă gun, djru tuh pơ alin kơ bruă pơgang anŏ mơtah mơda hăng kơtưn krăo lăng tui lơ̆m pok pơhai brơi ngă, pơhlom brơi bruă ngă hmua Việt Nam ƀu kơnong dưi ngă djop tơhnal pơkă pơđĭ kyar đôč ôh, dŏ djru hrŏm ngă tui bruă lăng nao pơ anăp adih pơđĭ kyar ƀơi dêh čar truh thun 2045.