Hơduah ĕp rah ayuh hyiăng amăng kual pla đông trùng hạ thảo, ayong Đoàn Quốc Anh Khôi, Khua Anom mă bruă hrŏm Đông trùng hạ thảo Kon Tum brơi thâo, kiăng bơmao đông trùng hạ thảo brô̆ prong klă, bruă ngă hơđong ayuh hyiăng amăng anih rông bơmao ăt kah hăng glông đing pruih ia lĕ yôm phăn biă. Yua anun, ñu hmâo blơi laih măi pioh pơkra phrâo, rơnuk anai kiăng pơjing rai gơnam klă hiam hloh.

Hrŏm hăng anun, anom mă bruă hrŏm ăt đing nao mơn mă yua hơdră phrâo măi mok amăng pơjing, lăi pơhưč gru rup, pơtrut sĭ gơnam hăng hơdră ba gơnam đĭ hăng glông măi sĭ mơdrô gơnam tam. Kơnang kơ anun, hmâo juăt laih hăng lu tuai blơi yua amăng đơ đam dêh čar, pơhrui hmâo lu hloh mơ̆ng 2 truh 3 wot bơhmu hăng hlâo adih. Ayong Đoàn Quốc Anh Khôi brơi thâo:

“Lăng ƀuh mơnuih ƀôn sang pơplih jơlan gah blơi gơnam lĕ anom mă bruă hrŏm hmâo pok pơhai livestream hăng sĭ ƀơi abih bang hơdôm anih sĭ gơnam tui jơlan măi mok hmâo ƀơi Việt Nam ăt pơhrui glăi mơn prăk kơ anom mă bruă hrŏm hăng đĭ kơmlai mơ̆ng 15 truh kơ 20% kơ mơnuih amăng anom rim blan".

Tơlơi mă yua “pơplih mrô” ƀu dô̆ phrâo hnuă hăng hơdôm mơnuih amăng anom mă bruă hrŏm gah Đang hmua, pơkra hăng sĭ gơnam Sáu Nhung dong tah (Anom mă bruă hrŏm Sáu Nhung), sa anom mă bruă hrŏm amra hmâo anô̆ gal gah hơdôm gơnam kơphê ƀơi tơring glông Đăk Hà, tơring čar Kon Tum. Mơ̆ng hrơi anom mă bruă hrŏm pơtrut kơtang tuh pơplai, mă yua bôh thâo phrâo măi mok – bôh thâo phrâo amăng ngă đang hmua, pơkra gơnam, sĭ gơnam pơđĭ dlông laih mrô gơnam, pran bơkơtưn, bôh tơhnal ngă rai gơnam hăng sĭ mơdrô. Amai Ngô Thị Mai, mơnuih amăng anom mă bruă hrŏm Sáu Nhung lăi pơthâo:

“Lơm gum hrŏm anom mă bruă hrŏm, hmâo tơlơi tuh pơplai kơ hơdră phrâo măi mok pơplih phrâo lu biă bơhmu hăng hlâo adih. Kual lŏn sang kâo glăk pruih pơkrem ia ƀơi phun pla, măi anai pơkrem lu ia, kơmok pruai hăng pran mă bruă. Bơwih brơi tui glông hơdră hơdjă ăt ba glăi mơn kơ đang phun pla pơđĭ kyar kơjăp phik”.

Tui hăng ơi Nguyễn Tri Sáu – Khua Khul wai lăng Anom mă bruă hrŏm Sáu Nhung, ră anai anom mă bruă hrŏm hmâo rơbêh kơ 100 čô mơnuih hăng abih bang đang pla rơbêh kơ 300 ektar kơphê. Bruă mă yua pơplih phrâo ƀu kơnong kơ pơsir tơlơi wai lăng anom bơwih ƀong, mă tơlơi đăo kơnang mơ̆ng mơnuih blơi yua ôh mơ̆, dô̆ ba glăi lu bôh tŭ yua pơkon dong, kah hăng dưi ngă juăt hăng lu mơnuih blơi yua, rim thun pơhrui hmâo mơ̆ng gơnam sĭ tui jơlan măi mok đĭ truh rơbêh kơ 10%, biă ñu lĕ kơphê pơkra lui hlâo. Sa bôh tŭ yua prong pơkon lĕ pơplih mrô hmâo djru laih bruă djă pioh anăn păn tañ rơguăt, amuñ hơduah ĕp, hrŏ trun hră pơ-ar. Ơi Nguyễn Tri Sáu lăi:

“Ƀing gơmơi pơsit na nao ba gơnam mơ̆ng anom mă bruă hrŏm tui tơlơi pơkă jơlan gah blung a lĕ ngă klă gơnam pioh pơđĭ dlông anăn gơnam hyu ataih. Ƀing gơmơi đing nao bruă lăi pơhưč mơ̆ng hơdôm pôr pơhing kiăng mơnuih blơi thâo gơnam klă. Dua dong lĕ gơnam ră anai ƀing gơmơi pơkra djuai kơphê blơi mơñum mơtăm, kơphê asar klai, asar mlôm”.

Ơi Nguyễn Lâm Cảnh, Khua Khul pơlir hơbit Anom mă bruă hrŏm tơring čar Kon Tum brơi thâo, pơplih mrô lĕ jơlan gah phun mơ̆ng tơlơi pơđĭ kyar, bơwih ƀong khul ăt ƀu dŏng gah rơngiao mơn. Khă hnun hai, ră anai mrô hơdôm bôh anom mă bruă hrŏm amăng tơring čar mă yua hơdră phrâo amăng bruă ngă đang hmua, git gai dô̆ ƀiă hăng anet raih daih. Ơi Nguyễn Lâm Cảnh lăi pơthâo:

“Kiăng ngă tui klă bruă anai Khul pơlir hơbit ăt gum hrŏm mơn hăng hơdôm gơnong bruă kơ hơdôm bôh anom mă bruă hrŏm gum hrŏm hơdôm jơnum ngui sang čơ pơtrut sĭ mơdrô, mơ̆ng anun pơjing rai tơlơi djru gum kơ anom mă bruă hrŏm hăng anom bơwih ƀong pioh sĭ gơnam. Dua lĕ djru hơdôm anom mă bruă hrŏm pơđĭ dlông anô̆ klă gơnam, mơ̆ng anun pơjing hơdôm gơnam pơhlôm djơ̆ tui tơlơi kiăng sĭ blơi pioh pơđĭ dlông nua gơnam mơ̆ng kual bơwih ƀong khul”.

Kiăng pơđĭ dlông bôh thâo pơplih mrô mơ̆ng anom mă bruă hrŏm, pơ̆ anăp anai, Khul pơlir hơbit anom mă bruă hrŏm tơring čar amra gum hrŏm hăng hơdôm bôh ƀirô bơdjơ̆ nao pơphun pơhrăm, pơtô juăt, bơkơtuai tui akô̆ bruă pơđĭ dlông tơlơi thâo, bruă mă kơ mơnuih apăn bruă wai lăng anom mă bruă hrŏm gah bôh tŭ yua mơ̆ng bruă mă yua bôh thâo măi mok mrô; pơphun hyu čuă lăng hơdôm anom mă bruă hrŏm hmâo mă yua măi mok mrô, mơ̆ng anun hrăm tui, pok pơhai prong hyu amăng đơ đam tơring čar./.