Tơdơi kơ sa rơwư̆ mă yua lu djuai hơbâo pruai, kmơ̆k ia jrao hăng ia jrao pơdjai hlăt pơgang phun pla đang kơphê ama Hông anăn pô Y Đưk Êban dŏ ƀơi Ƀuôn Sut Mgrư, să Čư̆ Suê, tơring glông Čư̆ Mgar thâo krăn rơđah, kơphê ñu hiam, mơtah mơda hlơ hlip samơ̆ hrŏm hăng anun ngă kơ ñu ruă akŏ, mơmŏt mơta hwing akŏ yua măt jrao. Yua kơ anun, lơ̆m hmư̆ ƀing mă bruă pơsur ngă hmua tơring glông pơčrâo brơi rông hơdŏm sao pioh pơgang hlăt pơčram phun pla, ñu čih anăn ngă hrŏm mơtam. Tơdơi kơ 1 thun ngă tui, ñu ƀuh boh tŭ yua klă mơ̆ng bruă rông hơdŏm sao amăng đang kơphê.

“Kâo ƀu anăm ôh hăng ia jrao hlăt yua hlâo adih amăng đang kơphê gơmơi kâo pruih ia jrao hlăt, kah hăng hlăt čao ƀong phun kơphê hăng hmol găm, samơ̆ tơdơi kơ rông hơdŏm sao, kâo huăi kiăng pruih ia jrao hlăt dơ̆ng tah, laih anun phun, than kơphê ăt huăi ƀuh hlăt čao ƀong lơi. Dua lĕ kmơ̆k pruai ăt ƀiă tui mơ̆n, kâo huăi pruai lu ôh”.

Bơ ơi Đặng Văn Huy dŏ pơ thôn 3, să Čư̆ Suê, tơring glông Čư̆ Mgar, ñu juăt laih hăng bruă mă pruai kmơ̆k ia jrao, anun yơh mă yua hơdŏm sao pioh pơhlôm hlăt ƀong arong pơčram lĕ hơdră kiăng ngă jĕ giăm hăng ayuh hyiăng anih dŏ jum dar.

"Rĭm thun khom mă yua ia jrao pơgang phun pla năng ai 10 wơ̆t, samơ̆ laih ta rông hơdŏm sao hă mă yua ia jrao pruih kơnong mơ̆ng 2-3 wơ̆t đôč, plai ƀiă huač prăk kăk. Biă mă ñu pruih ia jrao pơgang phun pla, ta mă yua huăi lu đơi ôh. Hnong ngă măt sat răm ñu kơnong dŏ 2-3 đôč, huăi kiăng pruih ia jrao rơgao hnong dơ̆ng tah”.

Tui hăng ơi Huỳnh Văn Tấn, Kơ-iăng Kơ-iăng khua anom bruă boh thâo ngă hmua, pơgang phun pla kual Tong krah lăi: anŏ tŭ yua mơ̆ng hơdŏm sao lĕ ñu kĕ ƀong hlăt laih anun pơgang phun pla huăi hlăt ƀong arong pơčram. Hrŏm hăng anun, hơdŏm sao dŏ djru hrŏm pơgang ba phun pla djơ̆ găl hăng ayuh hyiăng. Lu đang hmua ƀơi kual Dap Kơdư lĕ gêh găl biă mă rông hơdŏm sao kiăng pơlar tui. Anih mă bruă pơgang phun kual Tong krah amra kơsem min dơ̆ng laih anun pơtô ba hơdră ba yua hơdŏm sao pơgang phun pla pơkŏn kiăng pơđĭ tui rơnoh hơdjă laih anun huăi huač prăk kăk blơi ia jrao pơdjai hlăt kman hăng pơdjai rơ̆k tơ̆k kơñ pơgi anai.

“Ƀơi kual Dap Kơdư hơdôm pơjeh phun pla prăk klai đô lĕ rơngiao phun kơphê dŏ hơmâo boh sầu riêng, thun anai ƀing gơmơi brơi ngă tui amăng bruă pla kơphê ƀơi dua boh tơring čar Dak Nông hăng Dak Lak. Thun pơ anăp anai dơ̆ng, ƀing gơmơi lông brơi ngă tui amăng boh sầu riêng. Tơhnal pơkă kiăng djru mơnuih ngă hmua kiăng thâo hluh lu hloh kơ boh tŭ yua mơ̆ng bruă rông hơdŏm sao amăng bruă pơhlôm pơgang hlăt ƀong arong pơčram amăng phun kơphê hăng phun boh sầu riêng”.

Ta dưi lăi, rông hơdŏm sao amăng đang kơphê lĕ hơdră mă yua mơnong hơdip ba glăi boh tŭ yua, huăi huač prăk kăk đơi ôh laih anun huăi ngă hơƀao jrak ayuh hyiăng anih dŏ jum dar, djơ̆ găl hăng bruă ngă hmua tui hơdră hơdjă rơgoh hơđong kjăp. Anom bruă ngă hmua ƀơi Dak Lak ăt hlăk pơtrut pơsur mơnuih ƀôn sang ngă tui hăng pok pơhư prong hơdră rông hơdŏm sao pioh pơhlôm hlăt pơčram phun pla.