Lơ 28/8, ƀơi tơring čar Dak Lak, Anom pơsur bruă đang hmua Lŏn ia gum hrŏm hăng Gơnong bruă đang hmua hăng rơhuông adai lŏn mơnai glai klô tơring čar pơphun bơkơtuai kơ “Jơlan gah pơđĭ kyar pơlir hơbit bruă pla – sĭ bôh kruăi hrĕ kơjăp phik”. Đơ đam dêh čar ră anai hmâo rơbêh kơ 10.000 ektar đang phun bôh kruăi hrĕ, mrô ñu hmâo mơ̆ng 190.000 – 220.000 tơn sa thun, lu ñu ƀơi Dap Kơdư. Năng ai ñu 80% mrô ba nao pơkra, sĭ kơ dêh čar tač rơngiao hăng prăk pơhrui glăi rơbêh kơ 170 klăk dolar Mi sa thun.

Khă hnun hai, gơnam anai ăt dô̆ bŏng glăi lu mơn tơlơi lông kah hăng pơjeh akă dưm kơnar, hơdră pla kơƀah ha amăng plĕ, pơkra mă ƀiă hăng pơlir hơbit akă kơjăp. Kơ-iăng Khua Anom pơsur bruă đang hmua lŏn ia ơi Hoàng Văn Hồng pơsit: Phun bôh kruăi hrĕ hmâo tơhnal gal jing gơnam ha klai dolar Mi, biă ñu ƀơi hơdôm anih anom blơi gơnam kah hăng EU, Mi, Australia, Hàn Quốc. Kiăng thâo tơhnal gal, bruă pla khom pơhlôm klă ha amăng plĕ hăng bruă gơgrong rơđah rơđông ƀơi rim bruă mă, mơ̆ng anun mă bruă ba glăi bôh tơhnal jơlan pơlir hơbit nua gơnam tam hăng pok prong anih anom pioh sĭ mơdrô./.